2 Mizimbu 13 - Livulu lya Shukulu Kalunga

Nzita ya Aviya na Yelovowame

¹ Mu mwaka wamulikumi na itanu na itatu omo Yelovowame wapwile mwene wa mu Isalele, Aviya wapwile mwene wa mu Yunda,

² co washwanene myaka itatu mu Yelusalema. Vaina vapwile Mikaya muna Ulyele wa ku nganda ya Ngimbeya. Co kwakele nzita mukati ka Aviya na Yelovowame.

³ Aviya wakungulwile mashwalale vakupwa 400,000, oloni Yelovowame wezile na mashwalale vakupwa 800,000.

⁴ Co mbunga ya mashwalale valiwanenene mu lifuti lya malundu lya Efalime. Mwene Aviya wemanene a Munkinda wa Zemalaime, co wendekele kuli Yelovowame na vaIsalele ngwendi, “Njitolilileni!

⁵ Kuma kumwazivukile ngeci Shukulu Kalunga, Njambi ya Isalele walikumiiye cikumiiyo cakukola na Ndaviti, akumwana ikeye na vatekulwila vendi kushwana Isalele ku myaka yoshe?

⁶ Yelovowame muna Nembate ngamba ya Solomoni muna Ndaviti watengulukilile Solomoni mwene yendi nakumulwisa.

⁷ Co munima yevi wakungulwile viyambangani vakujeneka seo, vakevo vafungulwile Lehovowame muna Solomoni, omwo wapwile mwanike wamundondo, wakele na lyova, co kasele kuvalwisa.

⁸ Ololo mwayongola kulwisa vumwene vuje vwaanene Shukulu Kalunga kuli vatekulwila va Ndaviti. Muli na mashwalale vavangi, co lalo muli na vingombe va ngolinde vaje vapangele Yelovowame ngeci vapwe vinjambi veni.

⁹ Mwashekele vaka-kukombelela va Shukulu Kalunga, vatekulwila va Alone, lalo mwashekele vaLevi. Co munemika vaka-kukombelela veka mu myela yavo ngwe muje muvakalingi vaka-miyati yeka. Munu woshe aija na muna ngombe nambe na vimanga vatanu na vavali nakulijelesa, yeni mumupwisa muka-kukombelela ku vinjambi veni vangoco.

¹⁰ “Oloni yetu anga tucili nakupangela Shukulu Kalunga Njambi yetu, kutwamusezele. Vaka-kukombelela va ku naanga ya Alone vakapanga vipangi vyavo, co vaLevi vakavakwasako.

¹¹ A mutondo a mutondo na a cingwezi na cingwezi vakamukombelelela insense na vimuna vakwenyeka voshe vamutunu. Co vakana vin̄ombelo vya makende vakawaaka a mesa yakujela, co ku cingwezi na cingwezi vakashwameka vindeya a vitumbikilo vya vindeya vya ngolinde. Co tukalingi vije vyanatushiki Shukulu Kalunga, oloni yeni munamuseza.

¹² Co kengeni, Njambi vavenya ikeye wapwa ntwama yetu, na vaka-kukombelela vendi tuli navo vakevo vali na malupembo avo akwimba kashashutwiya nakutuleka ngeci tulwe neni. Yeni vanu va Isalele kesi mulwise Shukulu Kalunga Njambi ya vakukulwila veni! Kumukahyana embwe!”

¹³ A simbu ije vene kuma Yelovowame natumu laja mashwalale vendi kukavandamena kunima ya mashwalale va vaYunda, co vamo valikengele navo kulutwe.

¹⁴ Omo vaYunda valikenukile, vamwene ngeci vanavazengeleka. Co vatambekele kuli Shukulu Kalunga ngeci avakwase, co vaka-kukombelela vembile malupembo.

¹⁵ Co vaYunda vakangokele nakutambeka, co Aviya wavatwamenenene kuya nakulwa. Ngecivene, Njambi wahyanene Yelovowame na mbunga ya mashwalale va vaIsalele.

¹⁶ VaIsalele vatewele vaYunda, co Njambi watavele ngeci vaYunda vafungulule vaIsalele.

¹⁷ Co Aviya na mbunga ya mashwalale vendi vatsiile manene vaIsalele, litambelo lya mashwalale va vaIsalele vakulwa mwamuvwa vapwile 500,000 vatsiile aje vene.

¹⁸ Ngecivene, vaYunda vahyanene vaIsalele, omwo vakulaelele kuli Shukulu Kalunga Njambi ya vakukulwila vavo.

¹⁹ Aviya washekele mashwalale va Yelovowame, co wamutambwile vinganda vyendi vya Mbetele, na Njeshana, na Efelone, na membo aje azengelekele vinganda evi.

²⁰ Co Yelovowame kakele lalo na nzili a simbu yashwanene Aviya. Akukotoka Shukulu Kalunga wamupupile, co watsile.

²¹ Ngecivene, nzili ya Aviya yapwile yakama. Wakele na vanakazi likumi na vawana, co wakele na vana va vanalume makumi avali na vavali, co vana va vanakazi vapwile likumi na vatanu na umo.

²² Muzimbu woshe wa Aviya, na vije vyendekele na vije vyalingile, vavisoneka mu Livulu lya Mizimbu lya Indo Muka-kwimanena.