2 Kolinte 9 - Livulu lya Shukulu Kalunga

Kukwasa vakwetu vaka-Yesu

¹ Kunjapandele lalo kumisonekela a ngila yakukwasa nakutuma vwana kuli vanu va Njambi vali mu Yundeya.

² Njazivuka ngeci muli na cizango cakukwasa, co njalyalesele ali yeni kuli vanu va mu Masendoniya. Njendekele ngwange, “Vakwetu vali mu Akaya vanalivwaesela cimweja kukwasa kutunda ku mwakawali.” Kunyanyama kweni kunatakamesa vavangi.

³ Co ololo njilinakutuma vandolome ava, ngeci kulyalesa kwetu ali yeni kesi cikeluke ngoco na majwi amupulungwa embwe. Oloni ngwe muje munjendekele ngwange yeni munalivwaesela cimweja na vukwasi vweni.

⁴ Nameme ngoco, nga va ku Masendoniya vaija amo nange, co vakuwana kanda mulivwaesele cimweja, twakuziva shwamwa, naumo wai akendeka a shwamwa yeni, omwo vaziva laja lutsimo lweni!

⁵ Ngecivene, njayongola ngeci nga citava njitume vwasi vandolome ava kulutwe lwange ngeci vaminangule mulivwaesele cimweja a vwana vuje vumwakulaesele kwana. Asinoni omo njeta, munavuvwaesa laja, co eci cikamwesa ngeci kuma yeni mulinakwana omwo mulinakushaka kucilinga, kesi ngwe omo valinakumisindiya embwe.

⁶ Anukeni eci, munu uje akuna vimbuto vyavindondo akawana lalo vyavindondo, co uje akuna vyavingi akawana lalo vyavingi.

⁷ Ngecivene, umo na umo napande kwana ngwe mwanayongwela, kesi ngwe kuvyana na vusiwa nambe ngwe akusindiya, omwo Njambi azema uje ana nakujolela.

⁸ Co Njambi akasa kumyana kutuvakana ngwe kukujeneka kweni, ngeci mukakale navyo vyavingi ngwe kukujeneka kweni, nakukala lalo na vyavingi vyakupwisa a vuvwa vwoshe.

⁹ Ngwe muvyendeka visoneka ngwavyo, “Aana vyuma vyendi kuli vaje vanajeneka na mbunge yendi yoshe, kutetela kwendi kwapwa kwa ku myaka yoshe.”

¹⁰ Co Njambi, uje mukakwana vimbuto vyakukuva na likende lyakulya, ikeye lalo akamyana vimbuto vyoshe vije munajeneka, co akavikulisa, akamyana kuteja vyavingi manene kutunda ku vungulu vweni.

¹¹ Co ikeye lalo simbu yoshe akamipwisa vaka-kufuka vakupwamo ngeci mwane a simbu na simbu, ngeci vavangi vakakandelele Njambi a vwana vweni vuje vutunda kuli yetu.

¹² Omwo vipangi vije mulinakupana kesi ngwe vikwasa lika vanu va Njambi, oloni cinasholola lalo kushemutuka kwa kukandelela kwakama kuli Njambi.

¹³ Co omwo vukaleo vuje vwa vipangi vyeni vunasholoka, vavangi vakana vumpau kuli Njambi omwo kulongwa kweni ku muzimbu wauvwa wa Kilistu, uje umunatava, na vungulu vweni mukulipangela navo na voshe veka lalo.

¹⁴ Ngecivene, vakevo vakamilombelela manene a mana a ku vimbunge omwo kutetela kuje kwanamisholwela Njambi.

¹⁵ Tukandeleleni kuli Njambi omwo vwana vwendi vuje kutwasa kulumbununa.