2 Kolinte 8 - Livulu lya Shukulu Kalunga

Kulambula kwa vaka-Yesu

¹ Tushaka ngeci muzivuke vakwetu, vati kutetela kwa Njambi kunalingiwa mu vikungulukilo vya mu Masendoniya.

² Vakevo visimbu vyavingi vanaveseka mu tuyando twatungi, oloni kujolela kwavo kwakama manene ngeci vakevo valambwile manene-nene, nambe vapwile vaka-kuutwa.

³ Mwa vushunga vene njimileka ngwange, vaanene ngwe kwasa kwavo, nambe kuhyana vije. Na cizango cavo coshe,

⁴ vatulombele nakutusindiya ngeci tuvane simbu yakukwasa vanu va Njambi vaje vali mu Yundeya.

⁵ Kuvalingile ngwe mutwayongwele yetu! Oloni akulivanga valilambwile kuli Mwene, asinoni ku cizango ca Njambi, co valyanene vakevo vavenya kuli yetu.

⁶ Ngecivene, twasindiiye Tito, uje washangumukile vipangi evi, kutwalelelao nakumikwasa noo munamanesa vipangi evi vya cizemo.

⁷ Munapu vaka-kufuka vene a vyoshe vije mulinavyo, mukukulaela, mwendekesi na mukuzivisisa na mu lukakateya lweni lwakutukwasa na mu cizemo ceni ali yetu. Ngecivene, tushaka lalo mutwaleleleo mu vipangi evi.

⁸ Kesi ngwe njilinakwaka mashiko embwe. Oloni mukumimwesa vati veka vanakwasa, njilinakweseka kuwana mucinafu cizemo ceni.

⁹ Omwo mwazivuka mema ku mbunge a Mwene yetu Yesu Kilistu, nambe wapwile muka-kufuka, oloni walilingisile kupwa muka-kuutwa vavenya omwo yeni, ngeci amipwise vaka-kufuka a vuutu vwendi.

¹⁰ Viyongola vyange a n̄anda eyi vinapu ngeci mwamuvwa kuli yeni kumanesa vije mwashangumuka mwakawali. Mwapwile vaka-kulivanga, kesi kulinga lika embwe, oloni na cizango lalo cakupanga.

¹¹ Ngecivene, a cuma eci, maneseni vipangi! Kaleni na lukakateya lwakumanesa vipangi ngwe mumwashangumukile vutumbe vwavyo, co vilingeni na vije mulinavyo ololo.

¹² Omwo nga yeni muli na cizango cakwana, co Njambi akatambula vwana vweni ali vije mulinavyo kuvihana, oloni kesi ali vije kumwesi navyo.

¹³ Omwo kunjashakele ngwange veka vawaneko kuhwima, co yeni mwambate citele embwe,

¹⁴ oloni ngwange mupwise amo omwo muli na vyavingi simbu ino mwamuvwa manene kukwasa vaje vanajeneka. Ngeci omo mukajeneka, co vakevo vakakala na vyavingi, co vakamikwasa yeni lalo. Mu ngila eyi vene ikeyo ikwasa mwoshe.

¹⁵ Ngwe muvyendeka visoneka ngwavyo, “Munu uje wakungulwile vyavingi kakele na vyavingi manene, co uje wakungulwile vyavindondo kakele na vyavindondo manene.”

Tito na vakwavo

¹⁶ Twakandelela kuli Njambi omwo natakamesa Tito na vakwavo ngwe mwatakamesele yetu lalo kumikwasa.

¹⁷ Kesi ngwe omwo twamulanyele embwe, oloni omwo watakamene mukumikwasa mu cizango cendi vavenya ngwe mwayongwele kwija kuli yeni.

¹⁸ Tulinakutuma amo nendi ndolome yetu ivanasingimika mu vikungulukilo vyoshe mu vipangi vyendi vyakwambulula lijwi.

¹⁹ Co lalo vanamwangula nakumwimika mu vikungulukilo ngeci ende amo netu ngwe omo tulinakutwala vipangi evi vya cizemo omwo vumpau vwa Mwene nakumwesa ngeci tushaka kukwasa.

²⁰ Tunalingi mwamuvwa ngeci kesi tushangumune vyakulinyenga a vwana vuvanalingi kuli yetu.

²¹ Cizango cetu cinapu akulinga vya vushunga, kesi lika ku mesho a Mwene embwe, oloni na ku mesho a vanu lalo.

²² Ngecivene, tulinakutuma ndolome yetu amo navo, omwo tunamweseka visimbu vyavingi, co tunawana ngeci wapwa muka-lukakateya mukukwasa. Co omwo namikulaela, ali na lukakateya manene lwakumikwasa.

²³ Nga vamo vehula ali Tito, ikeye mukwetu, lalo mukwasi wange mutukapangela vipangi vyakumikwasa, co nga vehula ali vandolome vetu vakwavo vaje valinakuya amo nendi, vakevo vanapu vaka-kwimanena vikungulukilo nakunena vumpau kuli Kilistu.

²⁴ Mweseni cizemo ceni kuli vakevo, ngeci vikungulukilo vyoshe vikazivuke ngeci tulinakulinga vushunga akulyalesela ali yeni.