2 Kolinte 7 - Livulu lya Shukulu Kalunga

¹ Vikulaeso vyoshe evi vavilingilile yetu, vasamba vange. Ngecivene, tulijeleseni ku vyuma vyoshe vije vijwalesa muvila nambe mwonyo, co tupweni vakujela njwa akuyoya kwetu mukusingimika Njambi.

Kujolela kwa Paulu

² Tushokolweleni vimbunge vyeni. Kutwalingile mwamuvi munu naumo wai wai itunaviisila, nambe kweseka kwambata cuma cimo mu ngila ya makuli.

³ Kunjasa kwendeka ngwe kumhisa embwe, oloni ngwe omo njendekele akulivanga ngwange yeni munapu vasamba amo netu ngeci mwa vushunga vene tuli amo neni simbu yoshe, nambe tuyoya nambe tutsa.

⁴ Mwa vushunga njinasimpi manene ali yeni, co lalo njilinakujolela ali yeni! Mu tuyando twetu twoshe njinashulu nevi vyakunjizembeleka, njishulu nakujolela.

⁵ Nambe omo twetele mu Masendoniya kutwasele kuhwima. Kwoshe-ikwoshe kwakele vipakeso na vimata na vyeka lalo na lyova mu vimbunge vyetu.

⁶ Oloni Njambi, uje muka-kutakamesa vaka-kuzeya, watutakamesele akwija kwa Tito.

⁷ Kesi akwija kwendi lika embwe, oloni nakuzembeleka kuje mwamuzembelekele nakwo. Natuleka lalo ngwendi mushaka kunjimona, muli na mangunge nakulila omwo yange, ngecivnene, njavwaelela manene.

⁸ Nambe njamizivisile vusiwa mu mukanda wange, yange kunjiliveye nga kunjamisonekelelewo, omwo njamono ngeci uje mukanda wamizivisile vusiwa, oloni kasimbu kakandondo lika.

⁹ Oloni ololo njilinakuvwaelela kesi ngwe omwo njamizivisile vusiwa embwe, oloni omwo vusiwa vweni vunatengulwisa vingila vyeni. Omwo vusiwa ovu Njambi wavupangesele, co yetu kutwamivulumwine.

¹⁰ Omwo vusiwa vwa cizango ca Njambi navupangesa mukumitwala kukutenguluka kwa vimbunge vyeni nakumitwamenena kukwovoka, co eci naumo wai asa kucivyana! Oloni vusiwa vwa ku cisemwa ca vunu vutwala ku kutsa.

¹¹ Kengeni Njambi vati nalingi na vusiwa vweni ovu, vati vunamilingisa ngeci munyanyame manene! Nakusholola sholovya yakulishungamesa na vukaleo vwavuvwa na cizemo na mukulikundika nakuzambula kunyanyamesa vilinga vyavivi! Co munalisholola yeni vavenya ngeci munajeneka mulonga mu vyuma vyoshe.

¹² Ngecivene, nambe njasonekele uje mukanda, njalingilemo vene kesi ngwe omwo uje walingile mwamuvi nambe uje uvaviisilile embwe. Oloni njasonekele ngeci cimilumbunuke mwamuvwa ku mesho a Njambi, ngeci kulikundike kweni kuli yeni kunapu kwakama manene.

¹³ Eci cikeco catutakamesele manene. Kesi ngwe akututakamesa lika embwe, oloni Tito watuvwaelelesele manene nakuvwaelela kwendi a vyuma vije vyalingiwile ali ikeye vije yeni voshe mwamukwasele ngeci avwaelele.

¹⁴ Co njalishashele manene kuli ikeye ali yeni, co yeni kumwanjizivisile shwamwa. Yetu simbu yoshe tunendeka vushunga ali yeni, co mu ngila eyi vene, kulishashela kwetu ali Tito cinasholoka ca vushunga.

¹⁵ Ngecivene, cizemo cendi kuli yeni cilinakukola, akwanuka vatijo yeni muvavoshe mwononokele kukunangula kwendi, na muje mwamutambwile na lyova nakujaja.

¹⁶ Njivwaelela omo njasa kumikulaela mwa vushunga vene!