2 Kolinte 6 - Livulu lya Shukulu Kalunga

¹ Ngecivene, njimilomba ngwange, mu vipangi vyetu vyakupanga amo na Njambi, yeni munatambula mema ku mbunge a Njambi, co kesi muvyecelele ngwe vyangoco.

² Tolilileni vika Njambi alinakwendeka ngwendi, “Njamitolililile mu simbu yange yaivwa, njamikwasele mu litangwa lyakwovoka.” Kengeni, eyi ikeyo simbu yaivwa, kengeni, lelo likelyo vene litangwa lyakwovoka!

³ Kutushaka umo awane mulonga a vipangi vyetu, ngecivene, tulinakweseka ngeci kesi twake citanukiso mu ngila ya munu umo.

⁴ Mu ngila eyi vene, mu vyoshe vyuma tulinakupanga, tulinakusholola ngeci tunapu vangamba va Njambi, a lukakateya na mu tuyando, mu n̄avava na mukukaluwa na mu vitanga.

⁵ Vatupupile, vatwakele mu kamenga na mukulwa na mukuundangana, co twakele lalo mu cilavu-lavu nakujeneka vyakulya.

⁶ Akujela kwetu na mukuzivuka na mu lukakateya na mu kutetela twamwesele kupwa tu vangamba va Njambi, ali Munzinzime Wakujela, na a cizemo cakujeneka makuli,

⁷ na a lijwi lyetu lya vushunga na a nzili ya Njambi. Vushunga tunavupwisa vitwa vyetu vwakulwisa navyo na vyakutwamena.

⁸ Valinakutusingimika nakutwombwanesa, valinakutushaula nakutushangazala. Valinakutupangesa ngwe tu vaka-makuli, kuma yetu twendeka vushunga,

⁹ ngwe vanu kuvatuzivuka, kuma voshe vatuzivuka, ngwe tunatsi vene, oloni, tulinakuyoya. Nambe valinakutunyanyamesa, oloni kuvasa kututsiya,

¹⁰ nambe tulinakuviilila, oloni simbu yoshe tulinakujolela, tulinakusholoka ngwe tu tuutu, oloni tunapwisa vanu vavangi vaka-kufuka, tulinakusholoka ngwe kutwesi nacimo cai, kuma tunafuku vyuma vyoshe.

¹¹ Vasamba vange va mu Kolinte! Tunendeka kuli yeni mutanya mwelu, vimbunge vyetu vyinashokoloka.

¹² Kesi yetu tunashoko vimbunge vyetu kuli yeni, oloni yeni munashoko vimbunge vyeni kuli yetu.

¹³ Ololo njilinakwendeka kuli yeni ngwe vene munapu mu vana vange, tusholweleni cizemo ngwe cije tulinaco kuli yeni. Vimbunge vyeni vishokoloke manene!

Kunangula ali vaka-kujeneka kukulaela

¹⁴ Kesi mulikutiiye mukambo umolika na vaka-kujeneka kukulaela, omwo kucitava kulinga ngacije. Omwo vushunga na vuvi vyasa kulikumbasana vati? Nambe ceke na lisusulungu vyasa kuyoya amo ndi?

¹⁵ Kilistu na Liyavola vasa kulizivasana vatijo? Muka-kukulaela asa kulitombola vatijo na muka-kujeneka kukulaela?

¹⁶ Vatijo Njuvo ya Shukulu Kalunga ilikumbasana na tumponya? Omwo yetu tunapu Njuvo ya Shukulu Kalunga wakuyoya! Ngwe mwanendeka vavenya Njambi ngwendi, “Njikatunga njuvo yange akati ka vanu vange, co njikayoya akati kavo. Njikapwa nji Njambi yavo, co vakevo vakapwa vanu vange.”

¹⁷ Ngecivene, Shukulu Kalunga alinakwendeka ngwendi, “Munapande kuvaseza, co tundeni kuli vakevo. Kesi mulinge cuma cimo a vyuma vyakujwala, co njikamitambula.

¹⁸ Njikapwa nji ishweni, co yeni mukapwa vana vange va vanalume na ava va vanakazi, mwanendeka Shukulu Kalunga Muka-nzili yoshe.”