2 Kolinte 5 - Livulu lya Shukulu Kalunga

¹ Omwo tunazivuka ngwetu omo mbalaka yetu ya muvila wa ano asi omu tulinakuyoyela nga inasiwuka, Njambi akatwana njuvo mwilu mutukayoyela, njuvo ije yanatungu ikeye vavenya ije ikakala myaka yoshe.

² Co ololo tulinakukemanga, tulinakushungwiya manene ngeci vatuzike na njuvo yetu ije itunda mwilu,

³ omwo vanatuzikayo, kuvakasa lalo kutwana cakujeneka muvila embwe.

⁴ Omwo tucili nakuyoya mu mbalaka ya ano asi tulinakukemanga vene nakuyanda, kesi ngwe tushaka vatutundisemo mu muvila wa ano asi embwe, oloni tushaka vatuzike na muvila wa mwilu, ngecivene, cije ca kutsa vakacimwisa ca mwonyo.

⁵ Njambi ikeye natuvwaesela kwimuka oku, co natwana Munzinzime wendi ngwe cishimbikiya ca vyoshe vije natutulikila.

⁶ Ngecivene, simbu yoshe tunasimpi manene. Twazivuka ngeci omo tucili mu muvila uno kutwesi mu njuvo ya Mwene embwe.

⁷ Omwo mwonyo wetu uli akukulaela lika, kesi wakumona na mesho embwe.

⁸ Tunasimpi manene ngeci tucili nakushaka manene kutunda mu njuvo ya muvila uno, ngeci tukatumbame na Mwene.

⁹ Kutuvakana manene vene, nameme ngoco, tushaka kumuvwaelelesa ikeye, nambe mu njuvo yetu kuno nambe kuje.

¹⁰ Omwo yetu voshe tunapande kukasholoka ku cisompeselo ca litanda lya Kilistu, ngeci umo na umo akatambule vije vyanapangele, vyavivwa nambe vyavivi, kupwisa ngwe mukuyoya kwa mwonyo wendi wa mu muvila.

Vusamba vwetu na Njambi ali Kilistu

¹¹ Tunazivuka muje mukwalumbunukila kukomoka Mwene, ngecivene, tulinakweseka kusindiya veka. Njambi atuzivuka mwamuvwa, co njayongola ngeci mwanjizivuka mwamuvwa mu vimbunge vyeni.

¹² Kesi ngwe tulinakweseka kulyalesa yetu vavenya embwe, oloni tulinakweseka kumyana ngila imo yaivwa ngeci mukalyalesele ali yetu, ngecivene, mukasa kukumbulula kuli voshe vaje vakalishasha akusholoka kwa cifwa ca munu, oloni kesi a vilinga vyendi vavenya.

¹³ Kuma mwa vushunga vene yetu tunazaluka ndi? Eci cili kuli Njambi. Nambe nga kutwazalukile, eci cili kukushaka kweni.

¹⁴ Omwo cizemo ca Kilistu cinatushwana, co ololo tunananguka ngeci munalume umo watsililile vanu voshe, eci cinalumbunuka ngeci vanu voshe vanatambula ku kutsa kwendi.

¹⁵ Co watsililile vanu voshe, ngecivene, vaje valinakuyoya kuvapandele kuliyoyela vakevo vavenya embwe, oloni vanapande kuyoyela kuli uje wavatsililile, co vamusangwile omwo yetu.

¹⁶ Ngecivene, kukwesi simbu yeka lalo itukasompa munu woshe-iwoshe mu cisemwa ca ano asi, nambe nga ku simbu imo twasompele Kilistu ngwe ku cisemwa ca ano asi, kutukelukilamo lalo kulinga ngacije.

¹⁷ Ngecivene, woshe uje ali muli Kilistu, napu munu wamuha, vyuma vyalaja vineti, muli ikeye munaija vuhwa.

¹⁸ Vyoshe evi vyatunda kuli Njambi, uje natwimwisa ali Kilistu kutunda ku vutozi nakutupwisa vasamba vendi, co natwana vipangi vyakutengulwisa veka lalo ngeci valyambe nendi.

¹⁹ Majwi etu akewo apwa ngeci Njambi waambesele vanu voshe ali Kilistu. Njambi kasa kuvalavela lalo vuvi vwavo, co ikeye natwana majwi aje atuleka vati navambesela.

²⁰ Ngecivene, omo tuli ano, tulinakwendeka vya Kilistu, ngwe ikeye vavenya Njambi alinakumilanya ali yetu. Tulinakumilambelela ali Kilistu ngwetu, lyambeni na Njambi!

²¹ Kilistu kalingile vuvi, oloni Njambi wamupwisile vuvi omwo yetu, co akukala muli ikeye, vanatupwisa vaka-vushunga vwa Njambi.