2 Kolinte 4 - Livulu lya Shukulu Kalunga

Vufuko vwa munzinzime vwa mu vindeo vya vuma

¹ Njambi mukutetela kwendi natwana vipangi evi, ngecivene, kutwasa kujuka.

² Ngecivene, a vyuma vyoshe vyalaja vyakushwekesa tunavyumbila kuti, kutwesi nakupanga na vilinga lalo vyakukwisa, nambe kutanganesa lijwi lya Njambi. Oloni mu mutanya mwelu wa vushunga tulinakuyoyela ku mesho a Njambi nakweseka kulikundika yetu vavenya ku munu na munu mu vuvwa vwa citaku-taku cendi.

³ Oloni nga lijwi eli tulinakwambulula linapu lyakushweka, vanalishweka lika kuli vaje vanazimbala.

⁴ Vakevo kuvasa kukulaela omwo njambi uje wa vuvi wa kano kaye nazivalesa mana a vaka-kujeneka kukulaela ngeci kesi vamone mutanya uje wa Vin̄anda Vyavivwa vya vumpau vwa Kilisitu, uje vene wafwa cifwa ca Njambi.

⁵ Omwo kesi ngwe yetu tulyambulula yetu vavenya embwe, oloni tulinakwambulula Yesu Kilistu ikeye Mwene, co netu tunapu tu vangamba veni a lizina lya Yesu.

⁶ Njambi uje wendekele ngwendi, “Mu lisusulungu mukatwa ceke!” Ikeye Njambi uje vene umolika watwisile ceke mu vimbunge vyetu, mukututwisila ceke ca vumpau vwa Njambi vuje vunatu mu cihanga ca Kilistu.

⁷ Oloni yetu tuli na vufuko ovu tunapu ngwe vindeo vya vuma mukumwesa ngeci nzili yakushemutuka ikeyo yapwa ya Njambi, kesi yetu embwe.

⁸ Visimbu vyavingi tukakala mu vukalu, oloni kuvesi nakututsena, visimbu vimo tukakala mu vitanga, oloni kutwesi kwombwa,

⁹ vitozi vavangi kuvali, oloni kutwesi kujeneka musamba, na visimbu vimo tukavulumuka manene vene, oloni kuvesi kutunyongesa.

¹⁰ A simbu yoshe twambata kutsa kwa Yesu mu mivila yetu, ngeci mwonyo wendi usholoke mu mivila yetu lalo.

¹¹ Nambe mukuyoya kwetu simbu yoshe twakala mu vushonde vwa kutsa omwo Yesu, ngeci mwonyo wendi lalo ukasholoke mu mivila yetu ya kutsa.

¹² Co eci cinalumbunuka ngeci kuma kutsa kulinakupanga muli yetu, oloni mwonyo ulinakupanga muli yeni.

¹³ Visoneka vyendeka ngwavyo, “Njendekele omwo njakulaelele.” Mu munzinzime wa cifwa cimolika lalo twendeka omwo tukulaela.

¹⁴ Omwo twazivuka ngeci Njambi uje wasangwile Mwene Yesu ku vatsi, ikeye akatusangula lalo amo na Yesu nakutusholola amo neni, ku mesho endi.

¹⁵ Vyuma vyoshe evi vilingiwa omwo yeni, co ngwe kutetela kwa Njambi kukatuma manene nakushemutuka a vanu vavangi, co vakalomba malombelo amangi akukandelela vumpau vwa Njambi.

Kuyoya akukulaela

¹⁶ Omwo cuma eci kutwasa kwombwa nambe muvila wetu ulinakunyonga, oloni munu wetu wa mukati akatulingisa vuhwa a litangwa na litangwa.

¹⁷ Co otu tuyando twetu twatundondo lika ngwe twa kasimbu lika nakutunenela vumpau vwa myaka yoshe, vuje vwakama manene kutuvakana tuyando.

¹⁸ Omwo twakengelela, kesi ngwe ku vyuma twamono embwe, oloni ku vyuma vije kanda tumone. Vyuma vije kutwasa kumona vyasa kukala kasimbu lika, oloni vyuma vije kutwasa kumona vya ku myaka yoshe.