2 Kolinte 3 - Livulu lya Shukulu Kalunga

Vangamba va cikumiiyo caciha

¹ Kuma eci calumbunuka ngwe twalishashele lalo yetu vavenya ndi? Kuma cinapande, yetu ngwe vanu veka, kukala na mikanda ya vukaleo vwetu kuli yeni nambe yakutunda kuli yeni ndi?

² Yeni vene munapu mikanda tulinayo, ije vanasoneka mu vimbunge vyetu kuli munu na munu kuyizivuka nakuyilava.

³ Cinasholoka mwamuvwa ngeci Kilistu ikeye vavenya wasonekele uje mukanda nakuutuma amo netu. Uje kuvasonekele na musumbele, oloni na Munzinzime wa Njambi wakuyoya, kesi a vitale vya mamanya oloni mu vimbunge vya vanu.

⁴ Tulinakwendeka evi omwo tunakulaela kuli Njambi ali Kilistu.

⁵ Omwo muli yetu kumwesi cuma cimo cai cije citulingisa ngeci kwambulula kwetu kunapu kwakwasi. Kukwasa kwetu kulinakutunda kuli Njambi.

⁶ Ikeye natwasesa kupangela cikumiiyo caciha, cije kesi cakusoneka mu lishiko, oloni na Munzinzime. Lishiko lyakusoneka linena kutsa, oloni Munzinzime anena mwonyo.

⁷ Lishiko valitalekele a vitale vya mamanya, co vumpau vwa Njambi vwasholokele omo vavwanene. Nameme cihanga ca Mosesa cakuvyazima catsitsivalele, oloni cakele na nzili manene nambe vanu va Isalele kuvasele kukenga ku mesho endi. Nga Lishiko lije linena kutsa omo lili na nzili lyezile na vumpau vwakufwa ngacije,

⁸ kuma vumpau vwa Munzinzime kuvwapwile vwakama manene ndi?

⁹ Nga vipangi vije vyanenele cihiso kuli vanu vyakele na vumpau, kuma vipangi vya vumpau vije vinatuvakana kwamena kuvyapwile vyakama manene ndi?

¹⁰ Twendeka ngeci ngwetu omwo vumpau ovu vuliko vwakuvyazima ololo vunatuvakana vumpau vwakuvyazima vuje vwakeleko laja.

¹¹ Omwo nga kwakele vumpau mu vyuma vije vyakele kasimbu lika, kuma vumpau vuje vukakalako myaka yoshe kuvwatuvakanene manene ndi?

¹² Omo tuli na cinyangavili eci, co tunasimpi manene vene.

¹³ Yetu kutwapwile ngwe Mosesa uje wafwikile lilesu ku cihanga cendi ngeci vanu va Isalele kesi vamone vumpau omo vwakele nakutsitsivala.

¹⁴ Mwa vushunga vene mana avo vawashokele nakweta ku litangwa lya lelo mana avo anga vanawafwiki na lilesu lya cifwa cije vene ngwe omo valava mavulu a cikumiiyo calaja. Lilesu eli valitundisa kuvanga omo munu ali muli Kilistu.

¹⁵ Nameme lelo vene, omo valava Lishiko lya Mosesa, co lije lilesu licili nakufwika mana avo.

¹⁶ Oloni vasa kulitundisa, ngwe muje muvyendeka visoneka ali Mosesa ngwavyo, “Lije lilesu lya Mosesa valitundisile, omo watengulukilile kuli Mwene.”

¹⁷ Co ololo lijwi “Mwene” mu majwi awa linemanena Munzinzime, co kuje kuli Munzinzime wa Mwene, kukekwo kuli kupatuka.

¹⁸ Ngecivene, yetu voshe tulinakusholola vumpau vwa Mwene yetu na vihanga vyakujeneka kufwika, vumpau vuje vumolika vulinakutunda kuli Mwene, ikeye Munzinzime, uje muka-kutwimukisa mu cifwa cendi, mu vumpau vuje vwahyana simbu yoshe.