2 Kolinte 2 - Livulu lya Shukulu Kalunga

¹ Ngecivene, njayongwele mu mbunge yange ngwange kunjikaija lalo kuli yeni nakumizivisa vusiwa embwe.

² Omwo nga njikamizivisa vusiwa, co iyajo lalo akanjivwaelelesa? Kuvanga vaje lika njinazivisa vusiwa.

³ Eci cikeco cuma njasonekelele mukanda uje, kunjashakele kwija lalo kuli yeni nakuzivisa vusiwa vanu vaje vanapandele kunjivwaelelesa. Omwo njinakulaela ngwange kuvwaelela kwange, kunapu kuvwaelela kweni muvavoshe.

⁴ Njamisonekelele nakuviilila kwakama manene na n̄avava mu mbunge, na misozi yaingi, ngeci kesi njimiviililise lalo embwe, oloni munanguke ngeci kuma njamizema muvavoshe.

Kusambesa uje navulumuna

⁵ Oloni nga umo nazivisa mukwavo vusiwa, kesi nacilingi kuli yange lika, oloni na kuli yeni lalo, njinendeka ngeci omwo kunjashakele ngeci njipwe wamukalu kuli yeni.

⁶ Eci cinapumo kuli munu uje ivananyanyamesa kuli vanu voshe vavangi.

⁷ Co ololo, nameme ngoco, munapande kumusambesa nakumutakamesa, kutewa aziva vusiwa manene, co akonwa.

⁸ Ngecivene, njimilomba ngwange musambeseni, ngeci amone ngwendi kuma mwa vushunga vene mumuzema.

⁹ Njamisonekelele uje mukanda, omwo njashakele kumyeseka ngeci njizivuke vati nga mulinakwononoka ku lijwi lyange.

¹⁰ Omo musambesa munu ku vije vyanalingi, co nange lalo njinamusambesa. Omwo nga njinasambesa vuvi, njilinakucilinga ku mesho a Kilistu, omwo yeni,

¹¹ kutewa Satana akatuhyana, omwo tuzivuka vutumbe vwendi ali yetu.

Kulishoshomwena kwa Paulu mu Tolowasi

¹² Omo njetele mu Tolowasi nakwambulula lijwi lya Kilistu, njawanene Mwene nanjishokolwela cikolo a vipangi vyendi kuje.

¹³ Oloni njalinyengele manene omo kunjawanene ndolome yetu Tito. Ngecivene, njendekele kuli vakevo ngwange saleniho yeni voshe, co njaile ku Masendoniya.

Kuhyana muli Kilistu

¹⁴ Oloni kukandelela kuli Njambi! Omwo muli Kilistu simbu yoshe ikeye natutwamenena ngwe mbunga ya vinzinda vaka-kuhyana muli Kilistu. Njambi akatupangesa mukulingisa Kilistu ashandoke ngwe lwengo lwaluvwa lwakumuzivuka kwoshe-ikwoshe.

¹⁵ Omwo tunapu ngwe lwengo lwaluvwa lwa insense kuli Njambi luje lulinakuya kuli vaje vanovoka na kuli vaje vaka-kunyonga.

¹⁶ Co kuli vaje vananyongo tunapu lwengo lwakutunda ku kutsa lutwala ku kutsa, oloni kuli vaje vanovoka, lunapu lwengo lwaluvwa lwakutwala ku mwonyo, ngecivene, iyajo muka-mana asa kuzivuka vipangi evi?

¹⁷ Omwo kutwafwile ngwe vavangi vaje vatanganesa lijwi lya Njambi, ngwe kulandulula vyuma vyakujeneka seo, oloni omwo Njambi natutumu, twendeka na kalemeso ku mesho endi, ngwe vangamba va Kilistu.