2 Kolinte 13 - Livulu lya Shukulu Kalunga

Kunangula kwakumanesela na viindu

¹ Eyi ololo ikeyo simbu yamucitatu njilinakwija kuli yeni nakumisikamesa. “Mulonga woshe unapande kukala na vakaleo vwa vavali nambe kutuvakana.” Ngwe muje muvyendeka visoneka.

² Njishaka kwendeka kuli vaje veni vanalingi vuvi simbu ya kunima na kuli voshe veka lalo, njendekele laja, a vungenzi vwange vwamucivali vwakwija kuli yeni, oloni njicilukilamo lalo omo njili kuno, omo njikaija simbu ikwavo lalo naumo wai akaputumuka kunyanyamesa.

³ Mushaka cizivukiso ca Kilistu uje alinakwendeka muli yange. Uje kekuzeya akati ketu, oloni napu muka-nzili.

⁴ Nameme vamushukikile a cilindakano omwo kuzeya, oloni anga alinakuyoya omwo nzili ya Njambi. Omwo yetu lalo tunazeye muli ikeye, oloni tukayoya amo nendi omwo nzili ya Njambi kuli yeni.

⁵ Lyesekeni yeni vavenya nakuliilula nga munapu vaka-kukulaela. Kuma mwa vushunga mwazivuka ngeci Kilistu Yesu ali muli yeni ndi? Nga kesi ngacije, co munonwa vene.

⁶ Njakulaela ngwange mwazivuka ngeci kesi tu vaka-kwonwa embwe.

⁷ Tulinakulomba kuli Njambi ngeci kesi mukalinge vyuma vyavivi embwe, nambe kumwesa ngeci yetu vaka-kuhyana, oloni ngeci yeni mulinge vya vushunga, nambe tupwa ngwe vaka-kwonwa.

⁸ Omwo kutwasa kuvyana vushunga vwa Njambi, oloni kuvanga kuvukwasa.

⁹ Tulinakuvwaelela omwo tunazeya, oloni yeni muli na nzili. Ngecivene, tulinakumilombelela lalo ngeci mupwe vakulumbunuka.

¹⁰ Ngecivene, omwo kunjesi oko kuli yeni, njinamisonekela vyuma evi ngeci omo njakweta oko kesi njakupange neni na vukalu ngwe ku moko ije yanjanene Mwene, moko yakukolesa, kesi yakumishandola.

¹¹ Akumanesa, vakwetu, saleniho! Kakateyeni kulumbunuka, tolilileni kukulambela kwange, kaleni na mbunge imo, kaleni mu kwoloka. Co Njambi muka-cizemo na kwoloka akakala amo neni.

¹² Liindwiseni umo na mukwavo nakulitsemba kwa kwoloka.

¹³ Vanu va Njambi voshe vanatumu viindu vyavo kuli yeni.

¹⁴ Kutetela kwa Mwene Yesu Kilistu na cizemo ca Njambi na kulitombola kwa Munzinzime Wakujela vikale neni voshe.