2 Kolinte 12 - Livulu lya Shukulu Kalunga

Vimona vya Paulu

¹ Njilyalesa, nameme ngwe kucasa kulinga cimo cacivwa. Oloni ololo njendeka a vimona na a vyakunjijombolokela vije vyanjanene Mwene.

² Njazivuka munalume umo wa Muka-Yesu uje ivatwalele mwilu te kuneti laja myaka likumi na iwana (kunjasa kuzivuka nga eci mwa vushunga calingiwile, nambe wamwene cimona, kuvanga Njambi lika azivuka.)

³ Njiilukilamo lalo ngwange, njazivuka ngeci uje munalume vamutwalele mu Lipela (lalo kunjizivuka nga eci mwa vushunga calingiwile, nambe capwile cimona, lika kuvanga Njambi lika azivuka),

⁴ co kuje wakazivile vyuma vije naumo wai asa kuvilumbununa mu majwi, vyuma vije, munu kasa kuvyendeka na kanwa.

⁵ Ngecivene, njili na kulyalesa ali munalume ou, oloni kunjasa kulyalesa yange vavenya, kuvanga vyuma vije visholola kuzeya kwange muje munjafwa.

⁶ Nga njashakele kulyalesa, ngwe kunjalipwisile nji cikolokomba, omwo nga njinendeka vushunga. Oloni kunjilyalesa, omwo kunjishaka umo ayongole vyakama ali yange kutuvakana omo nanjimono njipanga nakunjiziva omo njendeka.

⁷ Oloni mukunjinyunga kutewa njilyalesa omwo vyuma vije vyakukomokesa vinjamwene, co vanjanene mushongo wa lulanga mu muvila, uje wakele nakupanga ngwe muluwa wa Satana mukunjisindakana nakunjinyunga kutewa njilyalesa.

⁸ Visimbu vitatu njalombelele kuli Mwene a cuma eci, co njamwihwile ngeci acitundise.

⁹ Co ikeye wanjikumbulwile ngwendi, “Kutetela kwange kunapumo ku vyoshe, omwo nzili yange yapwa yakukomokesa omo unazeye.” Ngecivene, njilinakuvwaelela manene a vyuma vyakuzeya vyoshe-ivyoshe nakujolela akunyunga kwa Kilistu na nzili eyi ili ali yange.

¹⁰ Yange njinahwimi mu mbunge akuzeya, mukunjishaula na mukukalekeya na mu mapakeso na mukukaluwa omwo lizina lya Kilistu. Omwo njinazeye, asinoni njikale na nzili.

Paulu atetela vaka-Kolinte

¹¹ Njilinakupanga ngwe cikolokomba, oloni yeni munanjilingisamo. Yeni mwapandele kusholola vukaleo ngeci munanjitambula. Nameme nga njinapu nji wangoco, yange kunjakele mwisi ya vaje “miluwa” veni.

¹² Vizivukiso na vikomokeso vyavingi vyalingiwile na lukakateya akati keni visholola vukaleo ngeci yange njinapu nji muluwa.

¹³ Cuma mukajo camyonwesele kutuvakana vikungulukilo vyeka? Kuvanga lika yange kunjashakele kumiyandesa nakutonda vyakulikwasa navyo kuli yeni. Vakwetu njisambeseni a cuma cakufwa ngacije!

¹⁴ Eyi ololo inapu simbu yamucitatu ije njalivwaesela kwija kuli yeni nakumisikamesa, co lalo kunjishaka kumitwika citele. Oloni cuma njishaka lika kuvanga yeni, kesi vimbongo vyeni embwe. Munima ya vyoshe evi, vanike kuvapandele kukwasa visemi vavo, oloni visemi vakevo vapandele kukwasa vana vavo.

¹⁵ Njikavwaelela manene nakwana vije vyoshe njilinavyo, amo nange vavenya vene, mukumikwasa. Kuma yeni Kuma mwanjizema kamandondo, omwo yange njamizema manene ndi?

¹⁶ Ngecivene, munjitava omwo kunjamitwikile citele. Oloni vamo vendeka ngwavo njamikokweyeye nakunyanyama nakumikwata na makuli.

¹⁷ Mu ngila mukajo? Kuma kuli cuma cimo njatambwile kuli yeni ali vaje njatumine ndi?

¹⁸ Njalombele Tito kuya kuli yeni, co lalo njatumine ndolome Muka-Yesu weka amo nendi. Kuma mwasa kwendeka ngweni Tito watambwile cuma cimo kuli yeni ndi? Kuma kesi ikeye amolika nange twapangele mu ngila eyi vene na cifwa cimo nakulinyunga mu ngila ya cifwa eci vene ndi?

¹⁹ Amo muyongola ngeci tulinakulisambesa yetu vavenya ku mesho eni ndi? Embwe! Tulinakwendeka ngwe omo Kilistu atuleka mukemwo twendeka ku mesho a Njambi, co vyuma vyoshe tulinga, vasamba vange, tulinakuvilinga mukukwasa yeni.

²⁰ Njili na lyova ngeci omo njakweta okwo kuli yeni, njakumiwana muli mweka kutunda mu cifwa cije njayongwele ngeci njakumiwanemo, co lalo amo mwakunjimona lalo njatundu mu cifwa cije mwayongola ngeci mwakunjimone naco. Njili na lyova amo njakuwana vimata vya mafuwa na vukalu nakulyamesa nakulishaula nakulifweya na kulyalesa na kapopolwezi.

²¹ Njili na lyova ngeci ku simbu ikwavo omo njiija, Njambi yange akanjikeesa ku mesho eni, co njikalila ali vavangi vaje vanalingi vuvi a simbu ya kunima, co kuvatenguluka kutunda ku vupangala na ku vyuma vije vivanalingi.