2 Kolinte 11 - Livulu lya Shukulu Kalunga

Paulu na miluwa va makuli

¹ Nga mwasa kunjitolilila, nambe omo njilinga ngwe nji cilema kamandondo. Mukemwo vene njitolilileni!

² Njili na lifuwa ali yeni ngwe lije lyakala nalyo Njambi, omwo munapu ngwe mumbanda uje kanda alimone na munalume uje njinakulaesa kumushombwesa kuli munalume umolika, ikeye Kilistu.

³ Oloni njili na lyova ngwange ngwe omo linyoka wakwisile Eva nakunyanyama kwendi, amo viyongola vyeni vikazimbalesa kulikundika kweni kwamutunu kwakujela kuli Kilistu.

⁴ Omwo yeni mulinakutambula nakujolela munu woshe uje aija kuli yeni nakwambulula Yesu wa muyati weka, oloni kesi uje itwambulwile yetu kuli yeni, co yeni munatambula munzinzime na muzimbu weka kesi uje watundile ku Munzinzime na muzimbu wauvwa uje umwatambwile kuli yetu!

⁵ Kunjayongwele ngwange yange njapwa wamundondo kuli vaje vakama vamutumbula ngweni “miluwa.”

⁶ Nambe njinapu wamundondo akwendeka, oloni mwa vushunga vene kesi mu mana embwe, omwo mu vingila vyoshe na a visimbu vyoshe tunamisholwela vyuma evi.

⁷ Kunjasele kumifwetesa cuma cimo omo njambulwile Vin̄anda Vyavivwa vya Njambi kuli yeni, njalikeesele mukulingisa yeni kupwa vakama. Kuma njaviisile ndi?

⁸ Simbu ije omo njakele nakupanga akati keni, vikungulukilo vyeka vyakele nakunjifweta. Co njevile kuli vakevo, ngeci njimipangele.

⁹ A simbu ije njakele neni kunjamiyandesele mukujeneka kwange vimbongo, omwo vandolome vaje vatundile ku Masendoniya vanjitikile vyoshe ngwe kukujeneka kwange. Ngwe matangwa a kunima, ngecivene, na kulutwe, kunjikamitwiki citele!

¹⁰ A vushunga vwa Kilistu vuje vuli muli yange, njimikulaesa ngwange kulishasha kwange oku kuvakasa kucolwesa mu lifuti lya Akaya.

¹¹ Kuma njendeka ngeci omwo njamizinda ndi? Njambi azivuka ngeci njamizema!

¹² Njitwalelelao kulinga vije njilinakulinga ololo,ngeci njivindike “miluwa” veka vaje valinakulishashela a vyuma vyoshe nakwendeka ngwavo vakevo vipangi vyavo vinapu vya cifwa cimo ngwe vije tulinakupanga yetu.

¹³ Vanu ava kuvapwile miluwa va vushunga embwe, vendeka makuli a vipangi vyavo, co vemuka mweka ngeci vasholoke ngwe miluwa va Kilistu vavavwa.

¹⁴ Mukemwo vene, kutwasa kukomoka, nambe vene Liyavola akalipwisa ikeye vavenya ngwe kangelo wa mutanya!

¹⁵ Ngecivene, eci kesi cikeco cuma cakukomokesa nga vangamba va Liyavola valisholola vakevo vavenya ngwe vangamba va vushunga. Oloni akukotoka vakatambula fweto yavo ngwe ku vilinga vyavo.

Tuyando twa Paulu omo wapwile muluwa

¹⁶ Njiilukilamo lalo ngwange, naumo napande kuyongola ngwendi njapwa nji cilema. Oloni nga muyongola ngweni nji cilema, co njitambuleni ngeci njilishashe lika kamandondo.

¹⁷ Mwa vushunga vene, evi njilinakwendeka kesi ngwe vikevyo vije vyashaka Mwene ngeci njivyendeke embwe, a vin̄anda evi vyakulishasha mwa vushunga njilinakwendeka ngwe nji cilema vene.

¹⁸ Oloni omwo kuvali vavangi vaje vakakulishasha ngoco a vyuma vya vunu, nange lalo njilishasha.

¹⁹ Ngecivene, yeni munapu vaka-kunyanyama, co mukatambula vilema nakuvatolilila!

²⁰ Omwo mukatambula woshe uje amikovelesa mu vundungo, nambe amilandesa, nambe amitela mweto, nambe alyalesa, nambe amipupa mbanda.

²¹ Njilinakwendeka na shwamwa, omwo twapwile tu vaka-kuzeya! Oloni nga umo aamuka kulishashela a cuma cimo, njendeka ngwe nji cilema, co nange lalo njikaamuka a cifwa cangacije.

²² Vakevo vanapu vaHevelu ndi? Co nange lalo munjinapu. Vanapu vaIsalele? Nange lalo munjinapu. Vanapu vaka-naanga ya Avilahama ndi? Nange lalo munjinapu.

²³ Vanapu vangamba va Kilistu ndi? Njinapu ngwe munu wakuzaluka, oloni njinapu ngamba wamuvwa kutuvakana vakevo! Omwo njinaundangana manene, vanjakele mu kamenga visimbu vyavingi kutuvakana vakevo, co vanjipupile manene kutuvakana vakevo, co visimbu vyavingi njetele kuyehi na kutsa vene kutuvakana vakevo.

²⁴ Visimbu vitanu vanjipupile makote makumi atatu na makote atanu na awana a makiki kuli vaYunda,

²⁵ visimbu vitatu vanjipupile kuli vaLoma, co lumo lwakunjasha mamanya. Njakele visimbu vitatu mu vwato omo vwavombelele mu mema, co lalo njakele visimbu makumi avali na awana mu mema.

²⁶ Co mu mangenzi ange amangi njakele manene mu vushonde vwa mavazi na ku vezi, mu vushonde vwa vakwetu vaYunda na vaje kesi vaYunda, na vushonde lalo vwa mu vinganda, na vushonde lalo mu mambo, na vushonde lalo vwakama a mema a kalunga, na vushonde lalo vwa kuli vasamba va makuli.

²⁷ Kwakele vipangi na tuyando, visimbu vyavingi njalalele cilavu-lavu, co njakele na njala na lihwila, co lalo visimbu vimo njajenekele vyakulya vyakupwisamo, nambe vyakunjivingilikiya ku lisika, nambe vuzalo.

²⁸ Co kesi ngwe njikumbulula vyuma vyeka, a litangwa na litangwa njili na citele cakushota mbunge mu vikungulukilo vyoshe.

²⁹ Ngecivene, nga umo nazeye, co nange lalo njinazeye, nga umo nawila mu vuvi, nange lalo njiziva kuvavala ku mbunge.

³⁰ Nga yange njilishasha, njilishasha a vyuma vije visholola kuzeya kwange.

³¹ Njambi na Ishe ya Mwene Yesu, lizina lyendi lipwe lyakuvezika ku myaka yoshe, azivuka ngeci kunjesi nakwendeka makuli.

³² Omo njakele mu Ndamasiku, nguvulu uje wakele mwisi ya Mwene Aletase waakele vaka-kunyunga ku vikolo vya nganda ngeci vanjikwate.

³³ Oloni vanjakele mu lishenge nakunjisosela asi mu mbengwa ya civumbe, co njaputumukile kutunda kuli ikeye.