2 Kolinte 10 - Livulu lya Shukulu Kalunga

Paulu aakwila vipangi vyendi

¹ Yange, Paulu njimilambelela, yange uje ivalinakwendeka ngwavo, walikeesa na kulyononwesa omo njili amo neni, oloni nji wamukalu omo njili kulyala neni. Njilinakumilomba a kwoloka na kutetela kwa Kilistu ngeci

² kesi munjisindiye kupwa wamukalu omo njiija, omwo mwa vushunga vene njasa kupwa wamukalu na vaje vendeka ngeci tulinakupanga ngwe na futisi ya kano kaye.

³ Mwa vushunga vene tulinakuyoyela mu kaye kano vene, oloni kesi ngwe tulinakulwa ngwe ku futisi ya kano kaye embwe.

⁴ Vitwa vije tulinakupangesa mukulwa kwetu kesi ngwe vitwa vya kano kaye, oloni vitwa vya nzili ya Njambi, ije yasa kunyongesa vimbongi. Tulinakumanesa vimata vya makuli,

⁵ tulinakutundisa kulyalesa kwoshe kuje kwakutanukisa kuje kulinakulwisa mana a Njambi, tulinakutundisa viyongola vyoshe nakuvyaka ku vundungo ngeci vyononoke kuli Kilistu.

⁶ Co munima yevi omo munamwesa manene kulongwa kweni, co yetu tukalivwaesela cimweja kutundisa vilinga vyoshe vyakujeneka kwononoka.

⁷ Yeni mulinakumona vyuma ngwe muvinafu ku mutambela wa anja. Kuma kuli munu umo alinakulimona vavenya ngwendi nakundama kuli Kilistu ndi? Eyo, mweseleni aliyongole vavenya lalo, omwo netu lalo tunapu vanu va Kilistu ngwe muje mwanafu ikeye.

⁸ Omwo kunjesi na shwamwa, nameme nga njili na kulyalesa manene ngwe a moko ije yanatwana Mwene, moko yakumitunga ngeci muye kulutwe, kesi yakumishandola embwe.

⁹ Kunjishaka kulisholola kuli yeni ngwe njeseka kumizivisa lyova mu mikanda yange.

¹⁰ Omwo umo endeka ngwendi, “Mikanda ya Paulu yaikalu, ya nzili, oloni omo ali netu napu wakuzeya na vyendeka vyendi vyangoco!”

¹¹ Munu wa cifwa cangacije napande kuzivuka ngwendi kukwesi kulitepesa akati ka vyuma vya mu mikanda yetu omo tulikulyala na vije vene tukalingi omo tuli amo neni.

¹² Mwa vushunga vene kesi ngwe tulyeseka yetu vavenya nambe kulipwisa yetu vavenya na vamo vaje valinakulyamesa vakevo vavenya nakulyaka ku vukama. Vakevo vapwa vikolokomba! Vakevo valyeseka akati kavo vavenya ngwe kuseteko ya vukama vwavo vavenya a vyuma evi, co valyeseka akati kavo vavenya, vakevo kuvesi na mana!

¹³ Nameme ngoco, ali yetu, kulyalesa kwetu kesi ngwe ciya a seteko eyi embwe, kulyalesa kwetu casikisila a seteko ngwe a vipangi vya Njambi vije vivanatwana, kuwezelela ku vipangi vyetu akati keni.

¹⁴ Omwo yeni mwakundama ku vipangi vije, co kutwasele lalo kuvijomboka omo twakele nakwija kuli yeni nakunena Vin̄anda Vyavivwa vya Kilistu.

¹⁵ Ngecivene, kutwasa kulyalesa a vipangi vya veka vije vivanalingi nakutuvakana seteko ije yanatwimikila Njambi. Oloni tuli na cinyangavili ngeci kukulaela kweni cikakula, co ngeci tukase kupanga vipangi vyakama manene akati keni, oloni simbu yoshe tulinakupanga mu seteko eyi yanatwimikila Njambi.

¹⁶ Asinoni twase kwambulula Vin̄anda Vyavivwa kuli vaje mu mafuti kulutwe lweni, co kutwasa kulyalesa a vipangi vyanalingi munu weka laja.

¹⁷ Oloni ngwe muje muvyendeka visoneka ngwavyo, “Woshe uje ashaka kulyalesa, napande kulyalesa kuli vije vyanalingi Mwene.”

¹⁸ Omwo munu vanamwakako omo Mwene namuyongwela vyavivwa ali ikeye, kesi ngwe omwo vavenya naliyongwela ikeye vavenya ngeci napu wamuvwa embwe.