1 Yowano 5 - Livulu lya Shukulu Kalunga

Kuhyana kwetu kwa vya a kaye

¹ Woshe uje akulaela ngeci Yesu ikeye Wakuvwavesa, napu muna Njambi, co woshe uje azema cisemi azema lalo munendi.

² Omu mukemwo tuzivuka ngwetu tuzema vana va Njambi, cinapu kuzema Njambi nakwononoka mashiko endi.

³ Omwo cizemo cetu kuli Njambi cilumbunuka ngeci twononoke mashiko endi. Co mashiko endi kesi amakalu kuli yetu embwe,

⁴ omwo muna Njambi woshe asa kuhyana vya a kaye. Co ngila ituhyana nayo nakutuvakana vya a kaye ikeyo kukulaela kwetu.

⁵ Iyajo asa kuhyana vya a kaye? Kuvanga uje lika nakulaela ngwendi Yesu ikeye Muna Njambi.

Vukaleo ali Yesu Kilistu

⁶ Yesu Kilistu ikeye wezile na mema akumbwitika kwendi na maninga a kutsa kwendi. Kezile lika na mema, oloni wezile na vyoshe vivali mema na maninga.

⁷ Co Munzinzime nasholola vukaleo ngwendi eci cinapu vushunga, omwo Munzinzime wapwa vushunga.

⁸ Kuli vakaleo vatatu, Munzinzime na mema na maninga, co vyoshe evi vitatu vyalitombola mu vukaleo vwavyo.

⁹ Tukulaela vukaleo vwa vanu, oloni vukaleo vwa Njambi vuli na nzili manene, co natwana vukaleo ovu ali Munendi.

¹⁰ Ngecivene, voshe vaje vanakulaela ali Muna Njambi vali na vukaleo ovu mu vimbunge vyavo, oloni voshe vaje kuvakulaelele Njambi, vanamupwisa ikeye muka-makuli, omwo vakevo kuvakulaelele vukaleo vuje vwendekele Njambi ali Munendi.

¹¹ Ngecivene, ovu vukevwo vukaleo, Njambi natwana mwonyo wa myaka yoshe, co mwonyo ou uli muli Munendi.

¹² Woshe uje ali na Mwana ali na mwonyo ou, woshe uje kesi na Muna Njambi kesi na mwonyo ou.

Mwonyo wa myaka yoshe

¹³ Njinamisonekela evi ngeci muzivuke ngweni muli na mwonyo wa myaka yoshe, yeni vene munakulaela muli Muna Njambi.

¹⁴ Tunasimpi ku mesho a Njambi, omwo tunazivuka ngwetu ikeye atuziva nga tumulomba cuma cimo ngwe ku cizango cendi.

¹⁵ Ikeye atuziva simbu yoshe tulombela, co omwo twazivuka ngwetu eci cinapu ca vushunga, twazivuka lalo ngwetu ikeye atwana vyoshe vitumulomba.

¹⁶ Nga umona muka-kukulaela alinga vuvi vuje kuvwasa kumutwala ku kutsa, unapande kulombela kuli Njambi, uje akamwana mwonyo. Eci cinakundama kuli vaje vivi vyavo kuvivatwala ku kutsa. Oloni kuli vuvi vuje vutwala ku kutsa, co kunjasa kwendeka ngwange munapande kulombela kuli Njambi a vuvi vwangacije.

¹⁷ Vilinga vyoshe vyavivi vyapwa vuvi, oloni kuli vuvi vuje kuvwasa kutwala ku kutsa.

¹⁸ Twazivuka ngwetu kukwesi vana va Njambi eshwala kulinga vuvi, omwo Muna Njambi alinakuvanyunga mwamuvwa, co Uje Liyavola kasa kuvavulumuna.

¹⁹ Twazivuka ngwetu tunakundama kuli Njambi nambe kaye koshe kali mu nzili ya Uje Liyavola.

²⁰ Twazivuka ngwetu Muna Njambi naija, co natwana kuzivisisa ngeci tuzivuke Njambi wa vushunga. Tulinakuyoyela muli Njambi wa vushunga, muli Munendi Yesu Kilistu. Ou ikeye Njambi wa vushunga, co ou ukewo mwonyo wa myaka yoshe.

²¹ Vana vange, linyungeni yeni vavenya nakutunda ku vinjambi va makuli!