1 Yowano 4 - Livulu lya Shukulu Kalunga

Munzinzime wa vushunga na munzinzime wa makuli

¹ Vasamba vange vanjazema, kesi mukulaele kuli voshe vaje vendeka ngwavo vali na Munzinzime, oloni veluleni muwane ngeci nga munzinzime uje uvalinawo unatundu kuli Njambi. Omwo vaka-kwimanena vavangi va makuli vanashandokela kwoshe-ikwoshe.

² Omu mukemwo mukazivuka ngweni kuma Munzinzime wa Njambi unafu vati, woshe uje atava ngwendi Yesu Kilistu wezile mu cisemwa ca vunu ikeye ali na Munzinzime wakutunda kuli Njambi.

³ Oloni woshe uje avyana eci ali Yesu kesi na Munzinzime wakutunda kuli Njambi embwe. Oloni munzinzime uje ali nawo unatundu kuli Citozi ca Kilistu, mwazivile ngwavo akaija, co ololo unaija laja ano a kaye.

⁴ Oloni yeni vana vange vavandondo, munakundama kuli Njambi, co munahyana vaka-kwimanena va makuli, omwo Munzinzime uje ali muli yeni ali manene na nzili kutuvakana munzinzime uje uli muli vaje vanakundama ku kaye.

⁵ Vaka-kwimanena vaje va makuli vendeka a vin̄anda vya a kaye, co vaka-kaye valinakuvatolilila omwo vakevo vakundama ku kaye.

⁶ Oloni yetu tunakundama kuli Njambi. Woshe uje azivuka Njambi atolilila kuli yetu, woshe uje kakundamene kuli Njambi kasa kutolilila kuli yetu. Ngecivene, omu mukemwo twasa kwangula akati ka Munzinzime wa vushunga na munzinzime wa makuli.

Njambi ikeye cizemo

⁷ Vasamba vange vanjazema, tulizemeni umo na mukwavo, omwo cizemo catunda kuli Njambi. Woshe uje wakala na cizemo wapwa muna Njambi, co azivuka Njambi.

⁸ Woshe uje kesi na cizemo kazivuka Njambi, omwo Njambi wapwa cizemo.

⁹ Co Njambi nasholola cizemo cendi kuli yetu omwo watumine Munendi umolika mu kaye ngeci tukale na mwonyo muli ikeye.

¹⁰ Omu mukemwo mucafwa cizemo, kesi yetu twazema Njambi, oloni ikeye watuzemene nakutuma Munendi kupwa n̄ombelo ngeci vivi vwetu vanavisambesa.

¹¹ Vasamba vange vanjazema, nga eci cikeco cizemo ca Njambi catuzemene naco, ngecivene, tunapande kulizema umo na mukwavo.

¹² Naumo wai wamona Njambi; oloni nga tulizema umo na mukwavo, co Njambi akayoya muli yetu, na cizemo cendi cinapu ca vushunga muli yetu.

¹³ Twazivuka mwamuvwa ngwetu tuli muli Njambi, co na ikeye alinakuyoya muli yetu, omwo natwana Munzinzime wendi.

¹⁴ Co tunamono nakuleka veka ngwetu Tate natumu Munendi kupwa Muyoyesi wa vaka-kaye.

¹⁵ Nga tutava ngwetu Yesu wapwa Muna Njambi, tuyoya muli Njambi na Njambi ayoya muli yetu.

¹⁶ Co yetu vavenya tunazivuka nakukulaela cizemo cije Njambi alinaco ali yetu. Njambi wapwa cizemo, co voshe vaje vayoya mu cizemo vayoya muli Njambi na Njambi ayoya muli vakevo.

¹⁷ Cizemo cinatungukwa muli yetu ngeci tusimpe a Litangwa Lyakusompa, co tukakala naco omwo kuyoya kwetu kwa muno mu kaye kwapwa cifwa cimo ngwe Kilistu.

¹⁸ Kukwesi lyova mu cizemo, oloni cizemo ca vushunga cisheka lyova lyoshe. Ngecivene, cizemo kucapwile ca vushunga muli umo uje ali na lyova, omwo lyova lyakundama kukunyanyamesa.

¹⁹ Tuzema omwo Njambi watuzemene akulivanga.

²⁰ Nga twendeka ngwetu twazema Njambi, oloni tuzinda vakwetu, tunapu vaka-makuli. Omwo kutwasa kuzema Njambi, uje kanda tumone, nga kutuzeme vakwetu vaje tunamono.

²¹ Co eli likelyo lishiko lyanatwana Kilistu, woshe uje azema Njambi napande kuzema vakwavo lalo.