1 Yowano 3 - Livulu lya Shukulu Kalunga

Vana va Njambi

¹ Kengeni cizemo cakuhyana eci Tate alinaco kuli yetu! Cizemo cendi cakama manene ngeci valinakututumbula vana va Njambi, ngecivene, mu cifwa eci, mukemwo mutwafwa. Omu mukemwo vene vaka-kaye kuvatuzivuka, omwo vakevo kuvamuzivuka Njambi.

² Vasamba vange vanjazema, yetu ololo tunapu vana va Njambi, oloni kucasholokele mwamuvwa ngeci yetu tukemuka vati. Oloni tunazivuka ngwetu omo Kilistu akasholoka, tukalifwa nendi, omwo tukamumona ngwe muje vene mwaafwa.

³ Co woshe uje ali na cinyangavili eci muli Kilistu alijelese, ngwe Kilistu wapwa wakujela.

⁴ Woshe uje alinga vuvi ali na mulonga wakupokola lishiko lya Njambi, omwo vuvi vukevwo kupokola lishiko.

⁵ Mwazivuka ngweni Kilistu washolokele ngeci atundise vivi, co muli ikeye kumwesi vuvi navumo vwai.

⁶ Ngecivene, munu woshe uje alinakuyoya muli Kilistu kasa kutwalelelao kulinga vuvi, oloni woshe uje atwalelelao kulinga vuvi, ikeye kamumwene nalumo lwai nambe kumuzivuka.

⁷ Vana vange vavandondo, kesi mutave umo amikwise! Woshe uje alinga vya vushunga napu muka-vushunga, ngwe Kilistu wapwa muka-vushunga.

⁸ Woshe uje atwalelelao kulinga vuvi nakundama kuli Liyavola, omwo Liyavola nalingi vuvi tunde ku san̄ulu. Eci cikeco cuma cakatukilile Muna Njambi, kunyongesa vije vyalingile Liyavola.

⁹ Naumo wai wa vana va Njambi vavandondo atwalelelao kulinga vuvi, omwo cisemwa ca Njambi cili muli vakevo, co omwo Njambi napu Ishavo, kuvasa kutwalelelao kulinga vuvi.

¹⁰ Aka kakeko kaangu kakutungukwa akati ka vana va Njambi na vana va Liyavola, vaje kuvesi kulinga vyavivwa nambe kuvesi kuzema vakwavo, kuvapwile vana va Njambi embwe.

Lizemeni umo na mukwavo

¹¹ Omwo lijwi lije mwazivile akulivanga likelyo eli, tunapande kulizema umo na mukwavo.

¹² Kutwapandele kupwa ngwe Kaini, ikeye wakundamene kuli Uje Liyavola, co watsiile shongo yendi Avele. Omwo vikajo Kaini wamutsiile? Omwo Kaini walingile vyuma vyavivi, oloni vyuma vije vyalingile ndolome yendi Avele vyapwile vyavivwa.

¹³ Ngecivene, vasamba vange, kesi mukomoke nga vanu vaka-kaye vamizinda.

¹⁴ Tunazivuka ngwetu tunatundu mu kutsa tunakovela mu mwonyo, tunazivuka cuma eci omwo tulinakuzema vakwetu. Vaje kuvesi kuzema anga vacili mwisi ya nzili ya kutsa.

¹⁵ Vaje vazinda vakwavo vanapu vaka-kutsiya, co yeni munazivuka ngweni vaka-kutsiya kuvesi na mwonyo wa myaka yoshe.

¹⁶ Omu mukemwo twazivuka vati cizemo mucafwa, Kilistu wecelele mwonyo wendi ali yetu. Ngecivene, netu lalo tunapande kwecelela myonyo yetu ali vakwetu!

¹⁷ Nga yetu tunafuku, co tumona vakwetu vanajeneka, co tukala na vukundwisi mu vimbunge vyetu kujeneka kuvakwasa, vatijo twendeka ngwetu tulinakuzema Njambi?

¹⁸ Vana vange vavandondo, cizemo cetu kucapandele kupwa ca majwi nakwendeka lika embwe, oloni cinapande kupwa ca vushunga, cije cilisholola cikeco vavenya mu vilinga.

Kulitakamesa ku mesho a Njambi

¹⁹ Ngecivene, a cuma eci cikeco cituzivukisa ngeci ngwetu kuma tunakundama ku vushunga, eci cikeco cinatutakamesa mu vimbunge vyetu ku mesho a Njambi.

²⁰ Nga citaku-taku cetu cituvayesa, co tunazivuka ngwetu Njambi ikeye wakama manene kutuvakana citaku-taku cetu, co azivuka vyuma vyoshe.

²¹ Ngecivene, vasamba vange vanjazema, nga citaku-taku cetu kucituvayesa, co tulikolesa ku mesho a Njambi.

²² Tukatambula kuli ikeye cuma coshe tumulomba, omwo tukononoka mashiko endi nakulinga vije vimuvwaelelesa.

²³ Eci cikeco canashiki ngeci tukulaele mu lizina lya Munendi Yesu Kilistu, co tulinakulizema umo na mukwavo, ngwe Kilistu watushikile.

²⁴ Voshe vaje vononoka mashiko a Njambi vayoya muli Njambi na Njambi ayoya muli vakevo. Co omwo ali Munzinzime uje natwana, co tunazivuka ngwetu Njambi ali nakuyoya muli yetu.