1 Yowano 2 - Livulu lya Shukulu Kalunga

Kilistu wapwa mukwasi wetu

¹ Vana vange vavandondo, njilinakumisonekela evi, ngeci kesi mulinge vuvi, oloni nga umo alinga vuvi, tuli naumo muka-kutwimanena kuli Tate, ikeye Yesu Kilistu, muka vushunga.

² Co Kilistu ikeye vavenya napu n̄ombelo ya vivi vyetu ngeci vavisambese, co kesi vivi vyetu lika embwe, oloni na vivi vya vanu voshe lalo.

³ Nga twononoka mashiko a Njambi, co mwa vushunga vene tunamuzivuka.

⁴ Nga twendeka ngwetu tumuzivuka oloni kutwononoka mashiko endi, tunapu tu vaka-makuli, co kumwesi vushunga muli yetu.

⁵ Oloni nga twononoka lijwi lyendi, tunapu vaje vazema omwo Njambi vanamupwisa muka-vushunga. Omu mukemwo twasa kuzivuka ngwetu tuli muli Njambi,

⁶ nga twendeka ngwetu simbu yoshe tulinakuyoya muli ikeye, tunapande kuyoya ngwe mwalingile Yesu Kilistu.

Lishiko lyaliha

⁷ Vasamba vange vanjazema, lishiko eli njilinakusoneka kuli yeni kesi lyaliha embwe, linapu lishiko lyalaja, likelyo vene mwakele nalyo tunde akulivanga. Lishiko lyalaja lyapwa lijwi lije mwalizivile laja.

⁸ Nameme ngoco, lishiko linjilinakumisonekela linapu lyaliha, omwo vushunga vwalyo vanavumono muli Kilistu na muli yeni lalo. Omwo lisusulungu lilinakwita, co ceke ca vushunga cinashangumuka laja kutwa.

⁹ Nga twendeka ngwetu tuli mu ceke, oloni tuzinda vakwetu, anga tucili mu lisusulungu na ku simbu ino vene.

¹⁰ Nga tuzema vakwetu, tulinakuyoya mu ceke, ngecivene, muli yetu kumwesi cuma nacimo cai cakutanukisa munu weka ngeci alinge vuvi.

¹¹ Oloni nga tuzinda vakwetu, tuli mu lisusulungu, tucili nakwendamo, co kutuzivuka oku tulinakuya, omwo lisusulungu linatupwisa tupuputwa.

¹² Njilinakumisonekela yeni vana vange vavandondo, omwo vivi vyeni vanavisambesa a lizina lya Kilistu.

¹³ Njilinakumisonekela yeni vatate, omwo munamuzivuka uje wakeleko tunde ku san̄ulu. Njilinakumisonekela yeni vakwenje, omwo munamuhyana Uje Liyavola.

¹⁴ Njilinakumisonekela yeni vana vange vavandondo, omwo munazivuka Tate. Njilinakumisonekela yeni vatate, omwo munamuzivuka uje wakeleko tunde ku san̄ulu. Njilinakumisonekela yeni vakwenje, omwo muli na nzili, lijwi lya Njambi lili muli yeni, co munamuhyana Uje Liyavola.

¹⁵ Kesi muzeme kaye nambe cuma cije cinakundama ku kaye. Nga muzema kaye, co kumwesi nakuzema Tate.

¹⁶ Omwo vyuma vyoshe vije vyakundama ku kaye, vije vishungwiya mashungu amavi a vunu, vije vanu vamona nakuvishungwiya na vyuma vyoshe vya muno mu kaye vije vanu vali na kulyalesa navyo, nacimo cai ali evi catunda kuli Tate, vyoshe evi vyatunda mu kaye.

¹⁷ Kaye na vyuma vyoshe vilimo vije vanu vashungwiya lilinakwita, oloni vaje valinga cizango ca Njambi vakayoya myaka yoshe.

Citozi ca Kilistu

¹⁸ Vana vange vavandondo, eyi ikeyo simbu yakukotoka! Ngwe muvamilekele ngwavo Citozi ca Kilistu alinakwija, co ololo vitozi vavangi va Kilistu vanasholoka laja, co twazivuka ngwetu simbu yakukotoka ilimuyehi.

¹⁹ Mwa vushunga vene, vanu ava kuvakundamene ku mbunga yetu, omu mukemwo muvatundilile kuli yetu, nga vakevo vakundamene ku mbunga yetu, nga vali netu amo. Oloni vatusezele ngeci cipwe cakutungukwa ngeci naumo wai wavo wakundamene ku mbunga yetu.

²⁰ Oloni Kilistu netila laja Munzinzime Wakujela ali yeni, ngecivene, yeni voshe munazivuka vushunga.

²¹ Ngecivene, Njilinakumisonekela, kesi ngwe omwo kumuzivuka vushunga embwe, oloni omwo munavuzivuka, co lalo mwazivuka ngweni makuli naamo ai atunda ku vushunga.

²² Ngecivene, iyajo muka-makuli? Vaje vendeka ngwavo Yesu kesi ikeye Wakuvwavesa. Vanu ava vakevo vanapu Vitozi va Kilistu, valinakuvyana voshe vavali Ishe na Mwana.

²³ Omwo voshe vaje vavyana Mwana vavyana lalo Ishe, vaje vatambula Mwana vali na Ishe lalo.

²⁴ Ngecivene, nyanyameni, nyungeni mu vimbunge vyeni lijwi lije mwazivile tunde ku san̄ulu. Nga munyunga lijwi lije, asinoni simbu yoshe mukayoya amo na Mwana na Ishe.

²⁵ Co eci cikeco watukulaesele Kilistu vavenya kutwanaco, cikeco mwonyo wa myaka yoshe.

²⁶ Njilinakumisonekela eci omwo ali vaje valinakweseka kumikwisa.

²⁷ Oloni ngeci mweni, Kilistu netila Munzinzime wendi ali yeni. Ngwe omo Munzinzime wendi ali muli yeni, kumushaka munu kumilongesa. Omwo Munzinzime wendi alinakumilongesa vyuma vyoshe, co vije alinakulongesa vinapu vya vushunga, kesi vya makuli embwe. Ngecivene, ononokeni vilongesa vya Munzinzime, co kaleni muli Kilistu.

²⁸ Eyo, vana vange, kaleni muli ikeye, ngeci tukashule nakusimpa akajomboloka, kesi tukazive shwamwa ku mesho endi a Litangwa lije omo akaija.

²⁹ Mwazivuka ngweni Kilistu wapwa wa vushunga, ngecivene, munapande kuzivuka ngweni woshe alinga vyavivwa napu muna Njambi.