1 Yowano 1 - Livulu lya Shukulu Kalunga

Lijwi lya mwonyo

¹ Tulinakusoneka kuli yeni a Lijwi lya mwonyo, lije lyakeleko tunde kukushangumuka. Tunalizivi, co tunalimono na mesho etu, eyo, tunalimono, co tunalikwata na mavoko etu.

² Omo mwonyo ou washolokele, twaumwene, ngecivene, tulinakuwendeka nakumileka vya mwonyo wa myaka yoshe uje wakele amo na Tate, co vatushololwelewo.

³ Vije tunamono nakuziva tulinakumilekavyo lalo, ngeci mulipandakane amo netu mu kulitombola kuje tulinakwo na Tate na Munendi Yesu Kilistu.

⁴ Tulinakusoneka evi ngeci kujolela kwetu kukapwe kwamutunu.

Njambi ikeye ceke

⁵ Ololo lijwi lije twazivile lyakutunda kuli Munendi nakulyambulula kuli yeni linapu eli, Njambi ikeye ceke, co muli ikeye kumwesi lisusulungu nalimo lyai.

⁶ Ngecivene, nga twendeka ngwetu tuli na kulitombola muli ikeye, oloni a simbu imolika tulinakuyoya mu lisusulungu, tulinakwendeka makuli mu majwi etu na mu vilinga vyetu.

⁷ Oloni nga tuyoya mu ceke, ngwe ikeye ali mu ceke, asinoni tulitombola umo na mukwavo, co maninga a Yesu, munendi, atujelesa ku vuvi vwoshe.

⁸ Nga twendeka ngwetu kutwesi na vuvi, tulinakulikwisa yetu vavenya, co muli yetu kumwesi vushunga vwai.

⁹ Oloni nga tulitavela vivi vyetu kuli Njambi, co Ikeye anyunga cikulaeso cendi nakulinga vije vya vushunga, ikeye akatusambesa ku vivi vyetu nakutujelesa ku vilinga vyetu vyoshe vyavivi.

¹⁰ Nga twendeka ngwetu kutwalingile vuvi, co tunapwisa Njambi muka-makuli, co lijwi lyendi kulyesi muli yetu.