1 Vimyene 8 - Livulu lya Shukulu Kalunga

Cikasa ca Cikumiiyo vacitwala mu Njuvo ya Shukulu Kalunga

¹ Asinoni Mwene Solomoni wasanene vantwama voshe va miyati na vikota vya Isalele kwija kuli ikeye ku Yelusalema ngeci vakashake Cikasa ca Cikumiiyo ca Shukulu Kalunga ku Siyone, nganda ya Ndaviti, ngeci vacinene ku Njuvo ya Shukulu Kalunga.

² Co voshe vezile ku Ciwano ca Mapapela mu ngonde yamucitanu na vivali ngonde ya Etanime.

³ Omo vantwama voshe vanakunguluka, co vaka-kukombelela vakakwile Cikasa ca Cikumiiyo,

⁴ vacitwalele ku Njuvo ya Shukulu Kalunga. Co vaLevi na vaka-kukombelela lalo vatwalele Mbalaka Mwakuliwanena na vivala vyayo vyoshe ku Njuvo ya Shukulu Kalunga.

⁵ Mwene Solomoni na vanu va Isalele voshe vakungulukilile kulutwe lwa Cikasa ca Cikumiiyo nakukombelela vimanga na vingombe, vaje vapwile vavangi manene kuvasele kuvalava.

⁶ Asinoni vaka-kukombelela vambatele Cikasa ca Cikumiiyo nakucaka mu Njuvo ya Shukulu Kalunga, co vacitumbikile mu Mwela Wakujela Manene, mwisi ya vakelumbi va mambava.

⁷ Co mambava avo akujanjavala afwikile kumo Cikasa na mikambo ije ivacambatelele.

⁸ Co mikambo yapwile yailaja manene ngeci vishongo vya mikambo vasele kuvimona akwimana kulutwe lwa Mwela Wakujela Manene, oloni mikambo kuvasele kuyimona vaka-anja. (Co ije mikambo na lelo lino kuyicili.)

⁹ Kumwakele cuma ceka lalo muje mukati ka Cikasa ca Cikumiiyo kuvanga vije vitale vya mamanya vivali vyaakelemo Mosesa ku Munkinda wa Sinai, omo Shukulu Kalunga walikumiiye na vanu va Isalele omo vatundile ku Ingito.

¹⁰ Omo vaka-kukombelela vatundile mu Njuvo ya Shukulu Kalunga, co lishelwa lyakuvyakuma lyashulisile mu Njuvo ya Shukulu Kalunga,

¹¹ ngeci vaka-kukombelela kuvasele kwilukilamo nakupanga vipangi vyavo, omwo vumpau vwa Shukulu Kalunga vwashulisile mu Njuvo ya Shukulu Kalunga.

¹² Asinoni Solomoni walombelele ngwendi, “Yove, Shukulu Kalunga, yove wakele litangwa mwilu, oloni unalyangwila kukala mu mashelwa akuzivala.

¹³ Ololo Shukulu njinakutungila Njuvo, mu mwela uje wasa kukala myaka yoshe.”

Solomoni endeka kuli vanu va Isalele

¹⁴ Omo vanu vemanene kuje, Mwene Solomoni watengulukile, co wavavezikisile na vivezikiso vya Njambi.

¹⁵ Co wendekele ngwendi, “Shangazaleni Shukulu Kalunga Njambi ya Isalele! Ikeye nanyungu cikulaeso cije calingile kuli tate Ndaviti, omo wendekele ngwendi,

¹⁶ ‘Tunde a litangwa lije njatundisile vanu vange mu Ingito, njangwile nganda naimo yai mu lifuti lyoshe lya Isalele ngeci vase kutungilamo Njuvo mwakunjilemesela. Oloni njaangwile yove Ndaviti kushwana vanu vange.’ ”

¹⁷ Co Solomoni wendekele ngwendi, “Tate Ndaviti wakele na vutumbe vwakutunga Njuvo mwakulemesela Shukulu Kalunga Njambi ya Isalele,

¹⁸ oloni Shukulu Kalunga wendekele kuli tate Ndaviti ngwendi, ‘Wayongwele mwamuvwa akushaka kunjitungila Njuvo,

¹⁹ oloni yove kuukasa kunjitungila Njuvo. Kuvanga munove, ikeye akanjitungila Njuvo.’

²⁰ “Co ololo Shukulu Kalunga nanyungu cikulaeso cendi. Njashwana tate Ndaviti kupwa mwene wa mu Isalele, co njinatungu Njuvo ya Shukulu Kalunga mwakumulemesela Shukulu Kalunga Njambi ya Isalele.

²¹ Co lalo njinavwaesa mwela mu Njuvo ya Shukulu Kalunga wa Cikasa ca Cikumiiyo muje muli vitale vya mamanya vya cikumiiyo cije walikumiiye Shukulu Kalunga na vakukulwila vetu omo wavatundisile ku Ingito. ”

Lilombelo lya Solomoni

²² Asinoni Solomoni wemanene kulutwe lwa mutula ku mesho a vanu voshe, co wolwele mavoko endi mwilu,

²³ walombelele ngwendi, “Shukulu Kalunga Njambi ya Isalele, kukwesi njambi wakulifwa nove mwilu nambe asi wai! Yove wanyunga cikumiiyo cove ku vanu vove nakumwesa cizemo cove cije kucesi kutenguluka kuli vangamba vove omo vononoka kuli yove na vimbunge vyavo vyoshe.

²⁴ Unanyungu cikulaeso cove cije wakulaesele tate Ndaviti, co ku litangwa lya lelo majwi oshe anapumo.

²⁵ Ngeci ololo, Shukulu Kalunga Njambi ya Isalele, njilinakukulomba ngeci unyunge cikulaeso cije wakulaesele tate omo wamulekele ngeci simbu yoshe ukaka mutekulwila wendi umo kupwa mwene wakushwana Isalele, nga vononoka mwamuvwa majwi ove ngwe mwalingile ikeye.

²⁶ Ngecivene, ololo, yove Njambi ya Isalele, tava vyuma vyoshe vipwe vyakushungama ngwe muwakulaesele ngamba yove, tate Ndaviti.

²⁷ “Oloni yove Njambi kumani wasa kukala asi ndi? Inonwa mwilu mwoshe kuwasa kufwamo, co vatijo Njuvo eyi njinakutungila ufwamo ndi?

²⁸ Ngecivene, Shukulu Kalunga Njambi yange, yange nji ngamba yove tolilila lilombelo lyange, co tava evi vinjilomba kuli yove ku litangwa lya lelo.

²⁹ Nyunga eyi Njuvo mutanya na vutsiki, mwela ou uunaangula wakukulemesela. Njizive omo njikenga ku Njuvo eyi nakulombela.

³⁰ Tolilila kulomba kwange ngamba yove na ku malombelo a vanu vove va Isalele omo vakenga ku mwela ou nakulombela. Omo mwilu muwakala tuzive nakutusambesa.

³¹ “Nga munu avulumuna mukwavo, co vamunene ku mutula wove mu Njuvo ino vene mukulisinga ngeci ikeye kesi na mulonga,

³² Shukulu Kalunga, tolilila omo mwilu ngeci usompe vangamba vove. Hisa uje ali na mulonga ngwe mucinamupande, co ecela uje kesi na mulonga ngwe lalo mucinamupande.

³³ “Omo vanu vove va Isalele vavafungulula kuli vitozi vavo omwo vanavulumuna kuli yove, co omo vatenguluka vaija kuli yove ku Njuvo eyi, nakulombela nakulitavela nakulilumbilisa kuli yove,

³⁴ co vatolilile omo mwilu muuli. Sambesa vivi vya vanu vove nakuvelwisila lalo ku lifuti lije liwaanene kuli vakukulwila vavo.

³⁵ “Omo ushoka lilu, co nyonzi kunyoka kwai, omwo vanu vanavulumuna kuli yove, oloni omo vatenguluka nakukenga ku Njuvo eyi, nakulombela nakulilumbilisa kuli yove,

³⁶ co vatolilile omo mwilu muwakala. Sambesa vuvi vwa mwene na vwa vanu vendi va Isalele. Valongese kulinga vije vyavivwa. Cooni, Shukulu Kalunga, nyokesa nyonzi mu lifuti lyove, eli waanene kuli vanu vove kupwa vufuko vwa myaka yoshe.

³⁷ “Omo mu lifuti muli njala ya lyangengela nambe mushongo wakulitambwisa, vimbuto viziluka omo lilanga nambe vinjame vya vimbimba, nambe omo vanu vove vavalwisa ku vitozi vavo, nambe mushongo nambe kuvinja akati kavo,

³⁸ tolilila ku malombelo avo. Nga vanu vove va Isalele vaziva vusiwa ku mbunge, co nga volwela mavoko avo ku Njuvo ino mukulombela kulutwe lwa ino Njuvo ya Shukulu Kalunga,

³⁹ ziva malombelo avo. Vatolilile omo mwilu muwakala, co vasambese, nakuvakwasa. Yove lika wazivuka viyongola vya vimbunge vya vanu. Linga ku munu na munu ngwe mucinamupande.

⁴⁰ Ngecivene, vanu vove vakwononoke simbu yoshe ivakakala mu lifuti lije liwaanene kuli vakukulwila vetu.

⁴¹ “Omo muka-kwija, atunda ku lifuti lya kulyala aziva lutsimo lwove, na vyuma vyakama vije viwunalingila vanu vove,

⁴² co aija ku Njuvo eyi nakulemesa nakulombela,

⁴³ tolilila lilombelo lyendi. Mwilu, omo wakala, muzive, co mulingile vije vyakulomba, ngeci miyati yoshe ya muno mu kaye vakuzivuke nakukwononoka, ngwe muvakalingi vanu vove va Isalele. Ngeci vakazivuke ngwavo kuma eyi Njuvo injinatungu inapu mwela wakukulemesela.

⁴⁴ “Omo ushika vanu vove kuya ku nzita nakulwisa vitozi vavo, co valombela kuli yove, kwoshe kuje kuvali, nakukenga ku nganda ino unaangula na Njuvo eyi njinakutungila,

⁴⁵ tolilila malombelo avo. Vazive omo mwilu muwakala, co vahyanese.

⁴⁶ “Omo vanu vove valinga vuvi ku mesho ove, omwo kukwesi munu wa kulinga vuvi, cooni mu vukalu vwove wecelela vitozi vavo vavafungulule nakuvatwala ku lifuti lyeka ngwe vinzinda, nameme nga lifuti lije lili kulyala,

⁴⁷ tolilila ku malombelo a vanu vove. Nga mu lifuti lije vatenguluka nakulombela kuli yove, co valitavela ku vuvi vwavo na ku kupenga-penga kwavo kuvanalingi, co ziva malombelo avo, yove Shukulu Kalunga.

⁴⁸ Nga mu lifuti muje vatenguluka mwa vushunga na kulongwa, co valombela kuli yove oku vanakenge ku lifuti lino waanene kuli vakukulwila vetu, na nganda ino unaangula, na Njuvo eyi njakutungila,

⁴⁹ co tolilila malombelo avo. Omo mwilu muwakala vatolilile, co vazivileko mema ku mbunge.

⁵⁰ Vasambese ku vivi vyavo vyoshe nakutengulukila kwavo kuje vakutengulukilile, co lingisa vitozi vavo ngeci vavazivile ngozi.

⁵¹ Vakevo vapwa vanu vove, vaje vawatundisile mu Ingito, muje mu lutengo lwa tuhya twakwezoka.

⁵² “Shukulu Kalunga wa Akamwa ya Vyoshe, simbu yoshe kala na mema ku mbunge ali vanu vove va Isalele na mwene yavo, ziva kulomba kwavo simbu yoshe vakusana ngeci uvakwase.

⁵³ Wavaangwile ku miyati yoshe ngeci vapwe vanu vove, ngwe muje wavalekele ali ngamba yove Mosesa omo watundisile vakukulwila vetu ku Ingito.”

Lilombelo lyakumanesela

⁵⁴ Omo Solomoni wamanesele kulombela kuli Shukulu Kalunga, wemanene kulutwe lwa mutula, watsikamene a mavuli oku najundwila mavoko endi mwilu.

⁵⁵ Co wemanene nakuvezikisa mbunga ya vanu va Isalele na vivezikiso vya Njambi na lijwi lyakama ngwendi,

⁵⁶ “Shangazaleni Shukulu Kalunga uje naana kwoloka ku vanu vendi, ngwe muje mwakulaesele. Ikeye nanyungu vikulaeso vyoshe vije vyakulaesele muli ngamba yendi Mosesa.

⁵⁷ Shukulu Kalunga Njambi yetu akale amo netu ngwe mwakele amo na vakukulwila vetu, kesi atuseze nambe kutwivala,

⁵⁸ atupwise vaka-kumwononoka, ngecivene, simbu yoshe tukayoye ngwe mwashaka yetu kuyoyamo, nakunyunga mashiko endi oshe nakushika kwoshe kwaanene kuli vakukulwila vetu.

⁵⁹ Shukulu Kalunga Njambi yetu anuke lilombelo eli simbu yoshe nakulomba oku njinalombo kuli ikeye. Akale na mema ku mbunge kuli vanu vendi va Isalele na kuli mwene yavo lalo, ngwe ku vizango vyavo vya litangwa na litangwa.

⁶⁰ Ngecivene, miyati yoshe ya mu kaye vakazivuke ngeci Shukulu Kalunga ikeye lika wapwa Njambi, kukwesi weka lalo embwe.

⁶¹ Yeni vanu vendi, simbu yoshe pweni vaka-kulongwa kuli Shukulu Kalunga Njambi yetu, ononokeni mashiko endi oshe nakushika kwendi, ngwe mumuli nakulinga ku litangwa lya lelo.”

Kukundika Njuvo ya Shukulu Kalunga

⁶² Asinoni Mwene Solomoni na vanu vendi voshe vakombelelele vin̄ombelo kuli Shukulu Kalunga.

⁶³ Wakombelelele vingombe vakupwa 22,000, na vimanga vakupwa 120,000 kupwa milambu ya kulitombola. Ngecivene, mwene na vanu voshe vakundikile Njuvo ya Shukulu Kalunga.

⁶⁴ Co ku litangwa lije lalo wajelesele mutambela wa akati ka cipango, mwela wa kulutwe lwa Njuvo ya Shukulu Kalunga, co wakombelelele kuje vin̄ombelo vya kwenyeka vyamutunu, na milambu ya vimbuto vya vinona, na mazi a vimuna kupwa milambu ya kulitombola. Walingile vije omwo mutula wa vunengu wapwile waundondo manene ku vin̄ombelo vyoshe vije.

⁶⁵ Co Solomoni na vanu voshe va Isalele valingile Ciwano ca Mapapela a matangwa atanu na avali

⁶⁶ A litangwa lyamucitanu na atatu, Solomoni washikile vanu kuya ku membo avo. Co voshe vamushangazalele, co velukile ku membo avo nakujolela omwo vivezikiso vyoshe vije vyaanene Shukulu Kalunga kuli ngamba yendi Ndaviti na kuli vanu vendi va Isalele.