1 Vimyene 7 - Livulu lya Shukulu Kalunga

Lipela lya Solomoni

¹ Solomoni watungile lalo lipela lyendi vavenya, walitungile myaka likumi na itatu.

² Watungile Njuvo ya ku Shwata ya Lembanone yakupwa mamita 44 mu vulaja, na mamita 22 mu vwihi, na mamita 13.5 mu vulaja vwa akamwa. Co yakele na mikana itatu ya vimanda vya kendale, mukana na mukana wakele na vimanda likumi na itanu, na mikambo ya kendale akuyikambeka.

³ Civumbe ca mukati ca akamwa capwile ca viti vya kendale, cakele akamwa ya milili yakutulikila, co cije civumbe cakolelele a vimanda.

⁴ A civumbe cimo na cimo ca ku mitambela ivali kwakele mikana itatu ya vinjanena.

⁵ Vikolo na vinjanena vyakele na vivuliko vyakulishungama vyakupwa mumo mu vulaja na mu vwihi, co na mikana ije itatu ya vinjanena ku mulili na mulili yalishungamene mu mikana.

⁶ Co watungile Njuvo ya Vimanda yakupwa mamita 22 mu vulaja na mamita 13.5 mu vwihi. Yakele na cimbimbi cakufwika cije cakolelele a vimanda.

⁷ Co Mulili wa Litanda, uvatumbwile lalo Njuvo Yakusompela, muje mwasompelele milonga Solomoni, yakele na vikwateso vya kendale vyakushelasana kutunda asi kweta kwilu ku ciluli.

⁸ Njuvo yakulala vavenya Solomoni, ije yakele kunima ya cipango cikwavo ca ku Njuvo Yakusompela, vaitungile ngwe vinjuvo vikwavo. Co lalo watungilile munakazi wendi njuvo, uje muna mwene wa ku Ingito ya cifwa cimo vene.

⁹ Vinjuvo vyoshe evi, amo na cipango cakama, vavitungisile na mamanya a ndando yakama kutunda ku luvula nakweta kwilu ku ciluli. Mamanya awa vawatavwile na shinjo vawavwaeselele cimweja kuje ku citapu, vawasaele mwamuvwa.

¹⁰ Co luvula lwapwile lwa mamanya a ndando yakama aje vavwaeselele cimweja kuje ku citapu vulaja vwa amo apwile mamita atatu na litambelo, co akwavo apwile mamita awana mu vulaja.

¹¹ Akamwa yawo akele mamanya akwavo a ndando yakama, aje avasaele nakuwakeesa, na mikambo ya kendale.

¹² Cipango ca ku lipela, na cipango ca mukati ka Njuvo ya Shukulu Kalunga, vavishokele na vivumbe vya mamanya akushonga vije vyakele na mukana wa mikambo ya kendale ku mukana umo na umo waije mikana itatu.

Vipangi vya Hulame

¹³ Mwene Solomoni wasanene Hulame, munalume muka-vutongwe uje wakele mu nganda ya Tile. Hulame wapwile mutongwe mu vipangi vya vunengu.

¹⁴ Co ishe, a simbu ije te natsi laja, watundile ku Tile, wapwile mutongwe mu vipangi vya vunengu, vaina vapwile fwile wa ku muyati wa Nafetali. Hulame wapwile munu wakunyanyama na muka-vutongwe nakuzivuka vyavingi. Co watavele mwamusanene Mwene Solomoni mukwendesa vipangi vyoshe vya vunengu.

Vimanda vivali vya vunengu

¹⁵ Hulame wamungile vimanda vivali vya vunengu, imo na imo yapwile mamita 8 mu vulaja vwa akamwa na mamita 5.3 mu vulaja vwakuyizengeleka, co vavyakele ku cikolo ca Njuvo ya Shukulu Kalunga.

¹⁶ Co wamungile lalo mitwe ivali ya vunengu, umo na umo wapwile mamita 2.2 mu vulaja vwa akamwa, co vavyakele muje mu vimanda.

¹⁷ Co manda imo na imo vaishoveyeye na malyenge akuvinda,

¹⁸ na mikana ivali ya mapomingilanete a vunengu.

¹⁹ Co vyakushongomoka vyakele akamwa ya vimanda vyafwile ngwe man̄anda vyapwile mamita 1.8 mu vulaja vwa akamwa,

²⁰ co vavyakele mu vimanda akamwa ya malyenge akuvinda. Co kwakele mapomingilanete 200 mu mikana ivali kuzengeleka manda na manda.

²¹ Co Hulame washimbikile vije vimanda vivali vya vunengu kulutwe lwa cikolo ca Njuvo ya Shukulu Kalunga, imo ya ku mbwela vaitumbwile Njakine, co ikwavo lalo ya ku kunto vaitumbwile Mbowasi.

²² Co ije mitwe ya vimanda ya vunengu ya cifwa ca man̄anda yakele akamwa ya vimanda. Co vipangi vyoshe vya vimanda vyahwile.

Lizau lya mema lya vunengu

²³ Hulame walingile lizau lya mema lya vunengu lyamuzinguluke lyakupwa mamita 2.2 mu kulova, na mamita 4.4 kutunda kumukulo umo kweta kumukulo ukwavo, lyoshe lyapwile lyamuvundungulu, vukama vwalyo vwapwile mamita 13.2.

²⁴ Co ku shongo yoshe ya kanwa ka lizau kwakele mikana ivali ya vishuwa vya vunengu, ije vakumbasanene amolika na lizau.

²⁵ Lije lizau lyemanene a myongo ya vingombe likumi na vavali va vunengu vaje valikengesele vinima, co ku mutambela umo na umo kwakengele vingombe vatatu.

²⁶ Co mitambela ya lizau yapwile mamilimita 75 a kuhima ngwe mbanda ya livoko. Co kanwa kalyo kafwile ngwe ku kanwa ka nganja, yakutaleka akamwa ngwe vishani vya man̄anda. Co lije lizau lyakele nakushula na mema akupwa malita 40,000.

Matemba a vunengu

²⁷ Hulame walingile lalo matemba a vunengu likumi, limo na limo lyapwile na mamita 1.8 mu vulaja, na mamita 1.8 mu vwihi, na mamita 1.3 mu vulaja vwa akamwa.

²⁸ Vawalingile na vikwateso vyakupwa mumo aje vaakele a vivuliko,

²⁹ co aje a vikwateso vaakeleo vifwa vya vindumba, na vingombe, na vakelumbi va mambava, co a vipamba, akamwa na kwisi ya vindumba na vingombe, vaakeleo mukole wauvwa wakwosha.

³⁰ Litemba na litemba lyakele na mavalo awana a vunengu na mikambo yawo ya vunengu. Co mu vimbango viwana mwakele vyakwimanena vya mbashiya vya vunengu, vyakwimanena vije vavicakeyeye na mukole wauvwa wakwosha.

³¹ Co akamwa ya mbashiya akele cipamba cakulizenga cije catapasanene mbashiya. Cashongomokele kupwa masentimita 45 kutunda akamwa ya litemba, na masentimita 18 mwisi ya litemba. Vacitalekele kucizengeleka.

³² Co mavalo apwile masentimita 66 mu vulaja, co akele mwisi ya vikwateso, na ije mikambo ya mavalo yakele mu citumbikilo, yapwile cuma cimolika na matemba.

³³ Co mavalo afwile ngwe mavalo a likalu, na mikambo yawo, na mavalo awo, na masipoko awo, na vikota vyawo, vyoshe vyapwile vya vunengu.

³⁴ Kwakele vyakwimanena viwana kwisi ya vimbango vya litemba limo na limo, vwimaneno vwayo vwapwile cuma cimolika na litemba.

³⁵ Akamwa ya vwimaneno akele citumbikilo ca masentimita 22 mu vulaja a litemba limo na limo, co vyakwimanena vwaco na vikwateso vyapwile cuma cimolika na litemba.

³⁶ Co vyakwimanena na vikwateso vavicakeyeye na vifwa vya vakelumbi va mambava, na vindumba, na miti ya mashakavale, oshe aje akele mwela wavyo, kwoshe vazengelekeleko mukole wauvwa wakwosha.

³⁷ Omu mukemwo muvalingile aje matemba, oshe afwile mumo, nakupwa lalo mumo mu vulaja na mu vwihi.

³⁸ Co Hulame lalo walingile vimbashiya likumi, imo na imo ku litemba. Mbashiya imo na imo yapwile mamita 1.8, co yakele nakushula na mema a kupwa malita 800.

³⁹ Waakele matemba atanu ku mbwela ya Njuvo ya Shukulu Kalunga, co akwavo atanu lalo ku kunto, lizau lya mema walyakele mu mbango ya mu mbwela ya ngangela.

Mazina a vivala vya mu Njuvo ya Shukulu Kalunga

⁴⁰ Hulame lalo washongele vindeo, na vifwosholo, na malonga. Co wamanesele vipangi vyendi vyoshe vya Mwene Solomoni vya mu Njuvo ya Shukulu Kalunga.

⁴¹ Evi vikevyo vyalingile, vimanda vivali vya kulutwe lwa Njuvo ya Shukulu Kalunga, mitwe ivali ya vimanda yafwile ngwe malonga a akamwa ya vimanda, na vimweso vya malyenge akuvinda a mutwe wa manda imo na imo,

⁴² na mapomingilanete a vunengu 400 mu mikana ivali umo na umo 100 kuzengeleka vyakucakeya ku mutwe umo na umo wa manda.

⁴³ Matemba likumi, vimbashiya likumi,

⁴⁴ na lizau, na vingombe likumi na vavali akwimanena lizau,

⁴⁵ vindeo, na vifwosholo, na malonga. Co vyoshe vije vyapwile vivala vya mu Njuvo ya Shukulu Kalunga, vije Hulame walingilile Mwene Solomoni, vyoshe vyapwile vyakukwita mufwitilo wa vunengu.

⁴⁶ Vyoshe vije Mwene Solomoni wavifulilile mu cana ca Yondau mukemwo mwaviyengunwine mu livu lya vuma mukati ka Sukote na Zaletane.

⁴⁷ Solomoni kasele kupeselesa vivala vyoshe vije vya vunengu a cipeseleso, omwo vyapwile vyavingi manene, co vulemu vwavyo kuvavuzivukile.

⁴⁸ Solomoni lalo walingile vivala vya ngolinde vya mu Njuvo ya Shukulu Kalunga, mutula, na mesa ya makende akukombelela kuli Njambi,

⁴⁹ na citumbikilo ca vindeya likumi vije vyemanene kulutwe lwa Mwela Wakujela Manene, vitanu ku mbwela, na vitanu lalo ku kunto, na vishani, na vindeya, na vimana,

⁵⁰ na vinganja, na vyakuzimisa vindeya, na malonga, na vimbashiya vya insense, na vikango vyakwambatela manungu a tuhya, na vikwateso vya mapito a ku Mwela Wakujela Manene, na vikolo vya anja ya Njuvo ya Shukulu Kalunga. Vivala vyoshe evi vavilingisile ngolinde.

⁵¹ Omo Mwene Solomoni wamanesele vipangi vyoshe vya Njuvo ya Shukulu Kalunga, co mu Njuvo ya Shukulu Kalunga waakelemo milili yakutulikila vyuma vyoshe vije ishe Ndaviti wakundikile kuli Shukulu Kalunga, siliva, na ngolinde, na vyuma vyeka.