1 Vimyene 6 - Livulu lya Shukulu Kalunga

Solomoni atunga Njuvo ya Shukulu Kalunga

¹ Omo kuneti laja myaka 480 kutunda aje vanu va Isalele vatundile ku Ingito, a mwaka wamuciwana wakushwana kwa Solomoni mu Isalele, mu ngonde yamucivali, ngonde ya Zive, Solomoni washangumukile kutunga Njuvo ya Shukulu Kalunga.

² Mukati ka njuvo, mu vulaja yapwile mamita 27, mu vwihi yapwile mamita 9, co mu vulaja vwa akamwa yapwile mamita 13.5.

³ Co cimbimbi ca ku cikolo ca Njuvo ya Shukulu Kalunga capwile mamita 4.5 mu kulova, co mu vulaja capwile mamita 9, mu vwihi lalo capwile cakama ngwe Njuvo ya Shukulu Kalunga vene.

⁴ Co vivumbe vya Njuvo ya Shukulu Kalunga vyakele na vinjanena vya malama akupameya, apwile akulishwata manene anja kutuvakana mukati.

⁵ Co ku vivumbe vya anja, ku mitambela yoshe ivali, na kunima ya Njuvo ya Shukulu Kalunga, vatungilileko vinjuvo vitatu vyakutulikila vyakutungila imo akamwa ya ikwavo, imo na imo mu vulaja vwa akamwa vwayo yapwile mamita 2.2.

⁶ Co mulili umo na umo wa njuvo ya kwisi wakele na mamita 2.2 mu vwihi, co mulili wa mukati wapwile mamita 2.7 mu vwihi, mulili wa akamwa wapwile mamita 3.1 mu vwihi. Omwo anja akele viyakelo ku civumbe ca Njuvo ya Shukulu Kalunga mukuyizengeleka, ngeci mikambo kesi ikwate ku civumbe.

⁷ Mamanya aje vatungisile Njuvo ya Shukulu Kalunga vawashongelele kuje ku citapu, ngeci kesi kukale muyoyo wa tuvulo, na vinjaviti, nambe vikuvo vimo omo vanu vakele nakutunga Njuvo ya Shukulu Kalunga.

⁸ Cikolo ca ku njuvo yakutulikila ya kwisi cakele ku mutambela wa mu mbwela ya Njuvo ya Shukulu Kalunga, kwakele lalo vindendelo vyakulondela kutunda ku njuvo yamucivali nakuya ku njuvo yamucitatu.

⁹ Ngecivene, Mwene Solomoni wamanesele kutunga Njuvo ya Shukulu Kalunga. Co civumbe ca mukati ca akamwa cije vakwatesele na mikambo wacifwikile na mavaya a kendale.

¹⁰ Vije vinjuvo vitatu vyakulilundakana, imo na imo yakele na mamita 2.2 mu vulaja vwa a akamwa, vavitungilile ku civumbe ca anja ya Njuvo ya Shukulu Kalunga na visini vya viti vya kendale.

¹¹ Shukulu Kalunga wendekele kuli Solomoni ngwendi,

¹² “Nga wenda mu vizilika vyange, nakwononoka vilongesa vyange, nakunyunga mashiko ange, co njikakulingila vije njakulaesele isho Ndaviti.

¹³ Njikayoya akati ka vanu vange va Isalele mu Njuvo yange eyi vene iwulinakutunga, co kunjikavaseze embwe.”

¹⁴ Ngecivene, Solomoni wamanesele kutunga Njuvo ya Shukulu Kalunga.

Mwakuvwaesela Njuvo ya Shukulu Kalunga mukati

¹⁵ Vivumbe vya mukati ka Njuvo ya Shukulu Kalunga vavifwikile na mavaya akushela a kendale kutunda asi nakweta kwilu, asi vajaleleo mavaya a tulipi.

¹⁶ Mulili wa mukati uvatumbwile Mwela Wakujela Manene, vautungilile kunima ya Njuvo ya Shukulu Kalunga. Vulaja vwawo vwapwile mamita 9, co vautepesele na mavaya a kendale kutunda asi nakweta kwilu.

¹⁷ Co mulili wa kulutwe lwa Mwela Wakujela Manene wapwile mamita 18 mu vulaja.

¹⁸ Mavaya a kendale akushela vaacakeyeye na vyakutaleka vya vishuwa na vishani, co vivumbe vyoshe vya mukati vavifwikile na kendale, ngeci mamanya a vivumbe kesi asholoke.

¹⁹ Co mukati ka Njuvo ya Shukulu Kalunga vatungililemo mulili wakwaka Cikasa ca Cikumiiyo ca Shukulu Kalunga.

²⁰ Ou mulili wa mukati wapwile mamita 9 mu vulaja, na mamita 9 mu vwihi, na mamita 9 lalo mu vulaja vwa akamwa. Vyoshe vavifwikile na ngolinde yakujela. Co mutula vaufwikile na mavaya akushelasana a kendale.

²¹ Co vivumbe vya Njuvo ya Shukulu Kalunga mukati vavifwikile na ngolinde, na malyenge a ngolinde vawashelasanene ku cikolo ca mu Mwela Wakujela Manene, co vacifwikile lalo na ngolinde.

²² Mukati ka Njuvo ya Shukulu Kalunga mwoshe vafwikilemo na ngolinde, amolika na mutula wa mu Mwela Wakujela Manene.

²³ Mu Mwela Wakujela Manene, vashongelelemo vakelumbi vavali va mambava, va viti vya olive, umo na umo wapwile mamita 4.4 mu vulaja.

²⁴ Limbava lya kelumbi umo lyapwile mamita 2.2 mu vulaja,

²⁵ co limbava lya kelumbi mukwavo lyapwile mamita 2.2 mu vulaja,

²⁶ co vulaja vwa limbava lya kelumbi umo kutunda ku shongo imo kweta ku shongo ikwavo lyapwile mamita 4.4.

²⁷ Vavaakele mu Mwela Wakujela Manene, ngeci aje mambava avo akujanjavala aliwanene, limbava limo lya Kelumbi umo lyakwatele a limbava limo lya kelumbi mukwavo mukati ka mulili, co mambava akwavo avali akwatele ku vivumbe.

²⁸ Vaje vakelumbi vavali va mambava vavafwikile na ngolinde.

²⁹ Watalekele a vivumbe vyoshe vya ku mulili wakama na mulili wa mukati na vakelumbi vakucakeya na miti ya mashakavale na vishani.

³⁰ Nameme asi vafwikileo na ngolinde.

³¹ Vashongele mapito avali a mavaya a miti ya olive vaakele ku cikolo ca ku Mwela Wakujela Manene, co civumbe ca akamwa ya cikolo cafwile ngwe vuta vwa lusipa vwakulema.

³² Washongele mapito avali a muti wa olive watalekeleo vakelumbi na miti ya mashakavale na vishani. Mapito, na vakelumbi va mambava, na miti ya mashakavale vavifwikile na ngolinde.

³³ Ku cikolo ca ku mulili wakama vaakeleko cipamba cakufwa mumolika mu vulaja na mu vwihi, vashongele mapito a muti wa olive.

³⁴ Kwakele mapito avali akweteka a mavaya a tulipi,

³⁵ co vawatalekele nakuwacakeya na vakelumbi va mambava, na miti ya mashakavale, na vishani, vije vivafwikile na ngolinde.

³⁶ Cipango ca mukati vacitungilile kulutwe lwa Njuvo ya Shukulu Kalunga, vacishokele na vivumbe vya mamanya akushonga vije vyakele na mukana umo wa mikambo ya kendale ku mukana umo na umo waije mikana itatu.

³⁷ Co luvula lwa Njuvo ya Shukulu Kalunga valwindile mu ngonde yamucivali, mu ngonde ya Zive, mu mwaka wamuciwana wakushwana kwa Solomoni.

³⁸ Ku ngonde yamucitanu na vitatu, mu ngonde ya Mbule, mu mwaka wamulikumi na umo wakushwana kwa Solomoni, Njuvo ya Shukulu Kalunga yoshe yahwile ngwe ku vutumbe vuvaitumbilile. Co Solomoni waitungile myaka itanu na ivali.