1 Vimyene 5 - Livulu lya Shukulu Kalunga

Solomoni alivwaesela kutunga Njuvo ya Shukulu Kalunga

¹ Mwene Hilame wa ku Tile simbu yoshe wapwile musamba wa Ndaviti, co omo wazivile ngeci Solomoni nashwana a litanda lya ishe Ndaviti kupwa mwene, Hilame watumineko vaka-kwimanena lifuti lyendi.

² Co Solomoni welwisile lijwi kuli Hilame ngwendi,

³ “Wazivuka ngeci omwo ya vinzita vije tate Ndaviti wakele nakulwa na mafuti oshe aje amuzengelekele, co kasele kutunga Njuvo ya Shukulu Kalunga mwakumulemesela Shukulu Kalunga Njambi yendi, noo Shukulu Kalunga wamwasesele kufungulula vitozi vendi voshe.

⁴ Oloni ololo Shukulu Kalunga Njambi yange nanjana kwoloka ku vinginga vyange vyoshe. Kunjesi na vitozi, co lalo kukwesi vushonde vwakulwa.

⁵ Shukulu Kalunga wakulaesele tate Ndaviti ngwendi, ‘Munove uje injikashwanesa kupwa mwene munima yove, ikeye akanjitungila Njuvo.’ Co ololo njinayongola kutunga Njuvo ya Shukulu Kalunga mwakumulemesela Shukulu Kalunga Njambi yange.

⁶ Ngecivene, tuma vanu vove ku Lembanone mukunjitetela viti vya kendale. Co vanu vange vakapanga amo navo, co njikafweta vanu vove vyoshe vije ukatumbula. Ngwe muuzivukila, vanu vange kuvazivuka kuteta miti ngwe muvakalingi vanu vove vaSindone.”

⁷ Hilame mwazivile lijwi lya Solomoni wavwaelelele manene, co wendekele ngwendi, “Vashangazale Shukulu Kalunga ku litangwa lya lelo, akwana Ndaviti mwana wa mana kupwa mwene wa muyati wakama ngacije!”

⁸ Asinoni Hilame watumine lijwi kuli Solomoni wendekele ngwendi, “Njinatambula lijwi lyove, njalivwaesela laja kulinga vyoshe walombo. Njikuvwaesela miti ya kendale na miti ya tulipi.

⁹ Vanu vange vakevo vakashaka viti ku Lembanone nakuvitwala ku mema a kalunga, co vakavikutila amo mikuta ngeci vikongumuka na mema noo vinete ku mutambela wa ku cikuma uje unaangula. Vanu vange vakavizitwile kuje vene, co vikakala oni mu mavoko a vanu vove, oloni njikulomba lika ngwange utondele vanu vange vyakulya.”

¹⁰ Ngecivene, Hilame watumine Solomoni viti vyoshe vya kendale, na viti vya tulipi vije vyashakele,

¹¹ co a mwaka na mwaka Solomoni waanene Hilame vinjeke vya tiliku vya vulemu vwakupwa 2,000, na malita 400,000 a mazi a olive amavwa ngeci alise vanu vendi.

¹² Shukulu Kalunga wakolesele cikulaeso cendi nakwana Solomoni mana. Co kwakele kwoloka akati ka Hilame na Solomoni, valingile lizivasano umo na mukwavo.

¹³ Co Mwene Solomoni waangwile vanalume vakupwa 30,000 mu Isalele mwoshe mukupanga vipangi,

¹⁴ co wemikile Andonilame kupwa mukulunu wavo. Andonilame wavaangunwine mu vimunga vitatu, co mu munga na munga mwakele vanalume vakupwa 10,000, co munga imo na imo vakele ngonde imo ku Lembanone, co velukile kwimbo nakuhwima vingonde vivali lalo.

¹⁵ Solomoni lalo wakele na vanalume vakupwa 80,000 mu lifuti lya malundu mukushonga mamanya, co vanalume vaka-kuwambata vapwile 70,000,

¹⁶ waangwile vanalume vakupwa 3,300 vaka-kunyunga nakwendesa vaje vaka-vipangi.

¹⁷ Mwene Solomoni washikile vaje vaka-kupanga vashongele mamanya akama amavwa manene a luvula lwa Njuvo ya Shukulu Kalunga.

¹⁸ Vanu va Solomoni, na vanu va Hilame, na vanalume vaje vatundile mu nganda ya Ngembale vavwaesele mamanya na viti vyakutungisa Njuvo ya Shukulu Kalunga.