1 Vimyene 4 - Livulu lya Shukulu Kalunga

Vamyata va Solomoni

¹ Solomoni wapwile mwene wa mu Isalele yoshe,

² co ava vakevo vapwile vantwama vendi va vakulunu, Azaliya muna Zandoke wapwile muka-kukombelela.

³ Co Eliholefe na Ahiya, vana va Shisha vapwile vaka-kusoneka va mu mbanja, co Njosefati muna Ahilunde wapwile mukulunu wakutulika mikanda,

⁴ Mbenaya muna Yehoyanda wapwile muka-kushika wa nzita, Zandoke na Aviyatale vapwile vaka-kukombelela,

⁵ Azaliya muna Natane wapwile mukulunu wa vanguvulu va mu lifuti, Zavunde muka-kukombelela muna Natane wapwile muka-kunangula vimyene,

⁶ Ahishale wapwile mukulunu wa vangamba va ku lipela, Andonilame muna Avenda wapwile mukulunu wakwendesa vipangi vya mu lifuti.

⁷ Solomoni waangwile lalo vanalume likumi na vavali kupwa vanguvulu va mu Isalele. Vakevo vakele nakunena-nena vyakulya kuli mwene na vaka-njuvo yendi kutunda ku mitambela yavo, co munu na munu wakele nakunena vyakulya vya ngonde imolika a mwaka.

⁸ Awa akewo mazina a vamyata likumi na vavali na mitambela ije vakele nakwendesa. Mbenehule, ku lifuti lya malundu lya Efalime.

⁹ Mbenendekele, ku vinganda vya Makaze, na Shalambime, na Mbete Shemeshe, na Elone, na Mbete Hanane,

¹⁰ Mbenehesende, ku vinganda vya Alumbote, na Soko, na mitambela yoshe ya Hefele.

¹¹ Mbeneavinandave, uje wambatele Tafate muna Solomoni, ku lifuti lyoshe lya Ndole.

¹² Mbana muna Ahilunde, ku vinganda vya Taanake, na Mengindo, na lifuti lyoshe lya kuyehi na Mbete Sheane, kuyehi na limbo lya Zaletane, mu mbwela ya limbo lya Njezelele, noo kweta ku nganda ya Avele Mehola na nganda ya Njokemeame.

¹³ Mbenengemba, ku nganda ya Lamote mu Ngilyande, na membo a mu Ngilyande aje apwile a ku cikota ca Njaile, mutekulu wa Manase, na lifuti lya Alengove mu Mbashane, membo oshe apwile makumi atanu na limo, akele na cimpaka cakukola na mikambo ya vunengu a vikolo.

¹⁴ Ahinandave muna Indo, ku lifuti lya Mahanaime.

¹⁵ Ahimaza uje wambatele Mbasemate, muna Solomoni mukwavo, ku lifuti lya Nafetali.

¹⁶ Mbana muna Hushai, ku lifuti lya Ashele na limbo lya Mbelote.

¹⁷ Njosefati muna Palua, ku lifuti lya Isakale.

¹⁸ Shimei muna Ela, ku lifuti lya Mbenjemani.

¹⁹ Ngembele muna Uli, ku lifuti lya Ngilyande, lije lyashwanene Mwene Sihone wa vaAmoli, na Mwene Onge wa ku Mbashane. Ku ava likumi na vavali, kwakele nguvulu umolika mu lifuti lyoshe lya Yunda.

Kushwana kwakuvwa kwa Solomoni

²⁰ Vanu va Yunda na Isalele vapwile vavangi manene ngwe lishen̄avu lya ku cikuma ca mema a kalunga, valile na kunwa, co vavwaelelele.

²¹ Vushwana vwa Solomoni vwawezeleleko na mafuti oshe kutunda ku Ndonga ya Yufuleti kutwala ku Filisitiya na nginga ya Ingito. Vakele nakufweta lisimu kuli ikeye, co vakele mwisi yendi simbu yoshe yakuyoya kwendi.

²² Co vyakulya vya Solomoni vya a litangwa na litangwa vyapwile mitonga 5,000 ya vunga vwavuvwa vwakuseneta, na mitonga 10,000 ya vunga vwa mundele,

²³ na vingombe likumi vakulelela mu litanga, na vingombe makumi avali vakulela mwamuvwa, na vimanga 100, kuwezelelako vinava, na vimbambi, na mavonge, na tusumbi.

²⁴ Solomoni washwanene lifuti lyoshe lya mu kangombe ka yambi ku Yufuleti, kutunda ku Tifesa kutwala ku Yufuleti na kweta ku nganda ya Ngaza mu kangombe ka yambi. Co vimyene voshe va mu kangombe ka yambi ka ku Yufuleti vakele mwisi yendi, co ikeye wakele mu kwoloka na mafuti oshe aje amuzengelekele.

²⁵ Co simbu yoshe yakuyoya kwa Solomoni, mu Yunda na mu Isalele mwoshe vanu vayoyele mwamuvwa, co naanga na naanga yakele mwisi ya miti yavo ya vinyu na mwisi ya miti yavo ya mikuyu.

²⁶ Solomoni wakele na tuvalu vakupwa 40,000 va matemba a visileyi, na vaka-kulonda a tuvalu vakupwa 12,000.

²⁷ Co vanguvulu vendi likumi na vavali, umo na umo a ngonde wakele nakunenela Mwene Solomoni vyakulya vije vivashakele voshe vaje vakele nakulila mu lipela, co simbu yoshe vakele nakwana vyuma vyoshe vije vyashakiwile.

²⁸ Nguvulu na nguvulu lalo wakele nakwana litambelo lyendi lya mbale ya maumwa na mwila ku tuvalu va matemba na tuvalu vakwavo kuje vyashakiwile.

²⁹ Njambi waanene Solomoni mana nakuzivisisa nakuzivuka, mana aje apwile akama manene aje naumo wai wasele kuwesekesa.

³⁰ Solomoni wakele na mana manene kutuvakana mana a vaje vanu vakele mu ngangela, nambe kutuvakana vanu vaka-mana va mu Ingito.

³¹ Solomoni wapwile muka-mana manene kutuvakana vanalume voshe, wakele na mana manene kutuvakana Etane kaEzela, na Hemane, na Kalokole, na Ndalenda, vana va Mahole, co lutsimo lwendi lwetele mu mafuti oshe aje amuzengelekele.

³² Co wasonekele visimo vyakupwa 3,000, na myaso yakutuvakana 1,000.

³³ Wendekele a miti na vyakumena, kushangumukila ku miti ya kendale ya Lembanone, nakweta ku hisope, miti ije yamena a vivumbe, co Solomoni wendekele lalo a tusitu, na a tuzila, na a vyakulikoka asi, na a visi.

³⁴ Co vimyene voshe va mu kaye vazivile a mana a Solomoni, co vatumineko vanu kuya nakumutolilila.