1 Vimyene 21 - Livulu lya Shukulu Kalunga

Citungu ca Navote ca mikolovozi ya vushuka vwa vinyu

¹ Kuyehi na lipela lya Mwene Ahave mu Njezelele, kwakele citungu ca mikolovozi ya vushuka vwa vinyu cije capwile ca munu umo lizina lyendi Navote.

² Litangwa limo Ahave wendekele kuli Navote ngwendi, “Njane citungu cove ca mikolovozi ya vushuka vwa vinyu, omwo cili kuyehi na lipela lyange, njishaka kucipwisa citungu ca visapa-sapa. Co njikakwana citungu cacivwa kutuvakana eci, nambe njicilande.”

³ Navote wamukumbulwile ngwendi, “Eci citungu capwile cakushwana kuli vakukulwila vange. Shukulu Kalunga anjivindike kukulandesaco.”

⁴ Ahave welukile kwimbo, walinyengele nakuviilila manene a vije vyendekele Navote kuli ikeye. Washuluvalele a vulili vwendi, wakengele a civumbe, co wavyanene kulya.

⁵ Munakazi wendi Njezevele waile kuli ikeye wamwihwile ngwendi, “Omwo vikajo unaluvalela? Omwo vikajo uvyana kulya?”

⁶ Ahave wamukumbulwile ngwendi, “Omwo a evi nendeka Navote kuli yange. Njamulombele ngwange njilande citungu cendi ca mikolovozi ya vushuka vwa vinyu, nambe kumwana ceka nga ikeye ashaka ngacije, oloni navyana!”

⁷ Co Njezevele wamukumbulwile ngwendi, “Kuma yove kesi u mwene wa mu Isalele ndi? Induka ulye, kesi ulinyenge njikakutambwila citungu ca Navote!”

⁸ Co wasonekele mikanda ya cimweso ca lizina lya Ahave, waisatele na cisateso cendi, co waitumine kuli vamyata na vaka-kutwamenena mu Njezelele.

⁹ Mu mikanda muje vasonekelemo ngwavo, “Anguleni litangwa lyakulikela kulya, kungulwileni vanu voshe amolika, singimikeni Navote.

¹⁰ Anguleni vanalume vavali vaje vipapoki vakumukutiiye n̄anda ngwavo natuku Njambi na mwene. Co mutwaleni anja ya nganda mukamutsiye na mamanya.”

¹¹ Co vamyata na vaka-kwimanena membo mu Njezelele valingile vije Njezevele wavashikile.

¹² Co vakevo vaangwile litangwa lyakulikela kulya, co vakungulwile vanu voshe amolika, co vaanene Navote mwela wa kasingimiko.

¹³ Co vaje vipapoki vavali vamukutiiye ku mesho a vanu ngwavo natuku Njambi na mwene, ngecivene, vamutwalele anja ya nganda vamwashele mamanya nakumutsiya.

¹⁴ Co vatumine lijwi kuli Njezevele ngwavo, “Navote vanamutsii.”

¹⁵ Vwasi-vwasi omo Njezevele watambwile lijwi, wendekele kuli Ahave ngwendi, “Navote natsi. Ololo ya ukatambule citungu cendi ca mikolovozi ya vushuka vwa vinyu cije cakuvindikile kukulandesa.”

¹⁶ Co aje vene Ahave waile ku citungu ca mikolovozi ya vushuka vwa vinyu nakucambata kupwa cendi.

¹⁷ Shukulu Kalunga wendekele kuli Elinja, muka-kwimanena wa Njambi watundile ku Tisheve ngwendi,

¹⁸ “Ya kuli Mwene Ahave wa ku Samaliya. Ukamuwana mu citungu ca Navote, ca mikolovozi ya vushuka vwa vinyu cije ashaka kwambata.

¹⁹ Muleke ngwove yange, Kalunga, njendeka kuli ikeye ngwange, ‘Kuma omo unatsii munu, co ulyambatela na vufuko vwendi lalo ndi?’ Muleke ngwove evi vikevyo njinendeka yange ngwange, ‘Mu mwela umolika vene uvanakacwila tutali maninga a Navote mukemwo lalo vakakacwila maninga ove!’ ”

²⁰ Omo Ahave wamwene Elinja, wendekele ngwendi, “Wanjiwana oni citozi cange?” Elinja wakumbulwile ngwendi, “Eyo, njakuwana. Yove wakakateya kulinga vije vya vunyengwe ku mesho a Shukulu Kalunga.

²¹ Ngecivene, Shukulu Kalunga nendeka kuli yove ngwendi, ‘Njikakuhisa yove na vanalume, na vakwenje voshe va mu naanga yove vakatsa.

²² Naanga yove ikapwa ngwe naanga ya Mwene Yelovowame muna Nembate na naanga ya Mwene Mbasha muna Ahiya, omwo unashangumuna vukalu vwange akutwamenena Isalele mu vuvi.’

²³ Shukulu Kalunga nendeka ngwendi, tutali vakalya muvila wa Njezevele mu nganda ya Njezelele.

²⁴ Kavushoko kove woshe akatsila mu nganda vakamulya ku tutali, co kavushoko kove woshe akatsila mu shwata vakamulya ku makuvi.”

²⁵ (Kukwakele umo walingile manene vuvi ku mesho a Shukulu Kalunga ngwe Ahave, akumusindiya kuli munakazi wendi Njezevele.

²⁶ Ikeye walingile vuvi vwa shwamwa yakama manene akulemesa tumponya, ngwe muvalingile vaAmoli, vaje vashekele Shukulu Kalunga mu lifuti nakulyana kuli vaIsalele.)

²⁷ Omo Elinja wamanesele kwendeka, co Ahave wazalele cikeleya mutanya na vutsiki. Walinyengele, co wavyanene kulya.

²⁸ Shukulu Kalunga wendekele kuli Elinja muka-kwimanena ngwendi,

²⁹ “Wamono Ahave mwanalikeesa ku mesho ange ndi? Omwo nalingi ngacije, kunjikamuhisa mu simbu yakuyoya kwendi, oloni njikanena vukalu a naanga ya Ahave a simbu yakuyoya kwa munendi.”