1 Vimyene 20 - Livulu lya Shukulu Kalunga

Nzita ya Silya

¹ Mwene Mbenehandande wa ku Silya wakungulwile mashwalale vendi voshe, amo na vimyene vakumukwasa vakupwa makumi atatu na vavali na tuvalu na matemba avo, voshe vaile vakazengelekele Samaliya nakuyilwisa.

² Mbenehandande watumine miluwa kuli Mwene Ahave wa mu Isalele vakendeke ngwavo, “Mwene Mbenehandande ashaka

³ umwane siliva yove na ngolinde, na vanakazi vove, na vana vove vaje vali na nzili.”

⁴ Co Mwene Ahave wavakumbulwile ngwendi, “Lekeni shukulu, Mwene Mbenehandande, ngweni yange njatava, asa kunjambata na vyuma vyoshe njilinavyo.”

⁵ Mbenehandande watumine lalo miluwa kuli Ahave ngwendi, “Njakutuminine lijwi ngeci unjane siliva yove na ngolinde, na vanakazi vove, na vana vove.

⁶ Oloni imene a simbu ino vene, njikatuma vamyata vange mu nganda yove vakushakezeka mu lipela lyove na mu vinjuvo vya vamyata vove, nakwambata vyuma vyoshe vije ulinavyo. Vakweta oko imene a simbu ino vene.”

⁷ Mwene Ahave wasanene vantwama voshe va mu lifuti, co wendekele ngwendi, “Mwamono ou munu ashaka kutukovelesa mu vukalu. Natumine miluwa kuli yange ngeci njimwane vanakazi vange, na vana vange, na siliva yange, na ngolinde, co yange njatavele.”

⁸ Co vantwama na vanu vakumbulwile ngwavo, “Kesi umutolilile, kesi utave ovyo vyanendeka.”

⁹ Ngecivene, Ahave walekele vanu va Mbenehandande ngwendi, “Lekeni shukulu yange mwene ngweni, njikamwana siliva yange, na ngolinde, na vanakazi vange, na vana vange, oloni kunjikamwana vyuma vyeka lalo.”

¹⁰ Vaje miluwa vaile, co velukile lalo na muzimbu wakutunda kuli Mbenehandande ngwendi, “Njikanena vanu vakupwamo ngeci vakanyongese nganda eyi nakwambata vije vivanaviisa mu mavoko avo. Nga kunjikalingimo, co vinjambi vange vanjitsiye!”

¹¹ Mwene Ahave wakumbulwile ngwendi, “Lekeni Mwene Mbenehandande ngweni lishwalale wamuvwa akalishasha omo nzita inahu, kesi omo kanda ihwe embwe.”

¹² Mbenehandande amo na vasamba vendi vakele nakunwa mu vimbalaka vyavo, omo vamulekele mwakumbulwile Ahave. Washikile mashwalale vendi ngeci valivwaese kukalwisa nganda, co vaile vakalwisile nganda ya Samaliya.

¹³ A simbu ije, muka-kwimanena waile kuli Mwene Ahave nakwendeka ngwendi, “Shukulu Kalunga nendeka ngwendi, ‘Kesi uzive lyova a nzita ije yakama! Ku litangwa lya lelo njikakuhyanesa, co yove ukazivuka ngeci kuma yange njapwa Kalunga.’ ”

¹⁴ Ahave wehwile ngwendi, “Veya vakatwamenenako mukulwa nzita?” Co muka-kwimanena wakumbulwile ngwendi, “Shukulu Kalunga nendeka ngwendi mashwalale va vakwenje ava vali mwisi ya vanguvulu vaka-kushika mu lifuti vakevo vakalwa nzita.” Co mwene wehwile ngwendi, “Iyajo akashika nzita?” Co muka-kwimanena wamukumbulwile ngwendi, “Yove vene.”

¹⁵ Ngecivene, mwene wasanene mashwalale va vakwenje vaje vakele mwisi ya vanguvulu vaka-kushika lifuti, co voshe vapwile 232. Asinoni wasanene mashwalale va Isalele, co voshe vapwile vanalume 7,000.

¹⁶ Nzita yashangumukile akati ka mutwe ka litangwa, omo Mbenehandande na vasamba vendi vaka-kumukwasa makumi atatu na vavali vakele nakunwa vwala mu vimbalaka vyavo.

¹⁷ Akulivanga mashwalale va vakwenje vaile kulutwe. Co vaje vaka-kunenga vaatumine Mbenehandande vanenele muzimbu ngwavo, “Mbunga ya mashwalale ilinakwija kutunda ku Samaliya.”

¹⁸ Mbenehandande washikile ngwendi, “Vakwateni na myonyo yavo kukwesi mulonga nambe vanaija mukulinga nzita nambe mu kwoloka.”

¹⁹ Co vaje mashwalale va vakwenje vashangumukile kulwa, co mashwalale va Isalele vakavele munima,

²⁰ umo na umo watsiile munu uje yalwile nendi. Co vaka-Silya vatewele, vavashekele manene kuli va Isalele, oloni Mbenehandande na vakwavo valondele a tuvalu, co vatewele.

²¹ Mwene Ahave na ikeye wakovelele mu nzita, co watsiile vaka-kulonda a tuvalu na matemba, co wahyanene manene kutsiya vaSilya.

²² Asinoni muka-kwimanena welukile lalo nakunangula Mwene Ahave wendekele ngwendi, “Iluka ukakolese mashwalale vove, mukayongole matumbe amavwa, omwo mwene wa Silya akeluka lalo mungolosika nakumilwisa.”

Nzita yamucivali ya vaSilya

²³ Vamyata va Mwene Mbenehandande vendekele kuli ikeye ngwavo, “Omo vinjambi va Isalele vapwa vinjambi va minkinda, mukemwo vaIsalele vanatufungulwile. Oloni mwa vushunga tukavafungulula nga tukalwa navo mu cana.

²⁴ Ngecivene, tundisa vaje vimyene makumi atatu na vavali mu myela yavo ingisamo vaka-kushika mashwalale.

²⁵ Asinoni sana mashwalale vavangi ngwe vaje vatewele kuli yove, vungi vwavo vanapande kupwa mumo na tuvalu na matemba. Co tukavalwisa vaIsalele mu cana, mwa vushunga tukavafungulula.” Mwene Mbenehandande watavele, co wakavangeyeye kunangula kwavo.

²⁶ Co a mwaka ukwavo wasanene vanu vendi nakuya navo ku nganda ya Afeke nakulwisa vaIsalele.

²⁷ VaIsalele vavasanene nakuvana vitwa, co vaile nakutunga cilombo cavo mu vimbunga vivali nakulikenga na vaSilya. VaIsalele vapwile ngwe tu vimbunga tuvali twa vimembe akuvesekesa na vaSilya, vaje valishandokelele mu lifuti mwoshe.

²⁸ Muka-kwimanena waile kuli Mwene Ahave wamulekele ngwendi, “Eci cikeco canendeka Shukulu Kalunga ngwendi, ‘Omwo vaSilya vanendeka ngwavo yange nji njambi wa malundu kesi wa mu vyana, co yange njikakuhyanesa a vungi vwa mashwalale vavo, co yove na vanu vove mukazivuka ngeci yange njapwa Kalunga.’ ”

²⁹ VaSilya na vaIsalele vakele matangwa atanu na avali mu vilombo vyavo, nakulikenga umo na mukwavo. A litangwa lyamucitanu na avali vashangumukile kulwa, co vaIsalele vatsiile vaSilya vakupwa 100,000.

³⁰ Co vaje vayoyeleo vatewelele ku nganda ya Afeke, kuje vivumbe vya nganda vyawililile vanu vakupwa 27,000. Co Mbenehandande lalo watewelele mu nganda, wakavandele mu mulili wa kunima ya njuvo.

³¹ Vamyata vendi vaile kuli ikeye nakumuleka ngwavo, “Twazivi ngeci vimyene va Isalele vaka-ngozi. Twane lisesa tuye kuli mwene wa vaIsalele nakuzala vikeleya vyakuzengeleka mu vimbunda vyetu na mikole yakuzengeleka mikoshi yetu, amo akamena mwonyo wove.”

³² Ngecivene, vakevo vazalele vikeleya vyakuzengeleka mu vimbunda vyavo, na mikole yakuzengeleka mikoshi yavo, co vaile kuli Ahave nakwendeka ngwavo, “Ngamba yove Mbenehandande naliiti kuli yove umuyoyese.” Ahave wakumbulwile ngwendi, “Kuma naololo acili nakuyoya ndi? Mwamuvwa! Ikeye napu ngwe ndolome yange!”

³³ Vamyata va Mbenehandande vakengelele cimweso cacivwa, omo Ahave wendekele ngwendi, “Ndolome,” co aje vene, vendekele ngwavo, “Yove unendeka, Mbenehandande napu ndolome yove!” Ahave washikile ngwendi, “Muneneni kuno kuli yange.” Omo Mbenehandande wetele, co Ahave wamulanyele kukovela mu litemba amo nendi.

³⁴ Mbenehandande wendekele kuli ikeye ngwendi, “Njikakwilwisila vinganda vije tate wavitambwile kuli isho, co lalo ukalishevela vitapalo yove vavenya mu Ndamasiku, ngwe mwalingile tate mu Samaliya.” Ahave wakumbulwile ngwendi, “Ngecivene, a vyuma evi, njikakushuula ngoco.” Co walingile cikumiiyo nendi, co wamushuwile waile.

Muka-kwimanena ahisa Ahave

³⁵ A lishiko lya Shukulu Kalunga, munu umo wa ku munga ya vaka-kwimanena va Njambi washikile mukwavo muka-kwimanena ngeci ngwendi amupupe. Oloni ikeye wavyanene,

³⁶ Ngecivene, wendekele kuli ikeye ngwendi, “Omwo unavyana kwononoka lishiko lya Shukulu Kalunga, co kenga, omo ukaya ndumba akakukwata.” Co omo waile ndumba wamukwatele.

³⁷ Uje muka-kwimanena waile kuli weka lalo wendekele ngwendi, “Njipupe!” Co uje munu wamupupile manene n̄ome, wamuvulumwine.

³⁸ Co uje muka-kwimanena walifwikile nanga ku mesho endi, ngeci kesi vamuzivuke, waile wakemanene kumukulo wa ngila, mukuvandamena mwene wa mu Isalele.

³⁹ Omo mwene wetile, co uje muka-kwimanena wamutambekelele ngwendi, “Shukulu, njinakala nakulwa mu nzita, co lishwalale wanjinenelele citozi wakufungulula, co wendekele ngwendi, ‘Nyunga ou munu, nga apituka, co njikakutsiya nambe ukafweta vyuma vyakupwisa mu mavundungulu a siliva 3,000.’

⁴⁰ Oloni yange njaungamene na vyuma vikwavo, co uje munu waputumukile.” Co mwene wakumbulwile ngwendi, “Walisompela mulonga wove vavenya, unapande kufweta ou mulonga.”

⁴¹ Uje muka-kwimanena watundisile ije nanga ku mesho endi, co aje vene mwene wamuzivukile ngwendi kuma wapwile umo wa vaka-kwimanena.

⁴² Co uje muka-kwimanena wendekele kuli mwene ngwendi, “Shukulu Kalunga wakulekele ngeci utsiye Mbenehandande, oloni yove wamuputumwisile. Ngecivene, vakakutsiya kwinga mu mwela wendi na mashwalale vove vakavanyongesa omwo unatava mashwalale vendi vaputumuke.”

⁴³ Co mwene welukile ku Samaliya, walinyengele nakuviilila manene.