1 Vimyene 19 - Livulu lya Shukulu Kalunga

Elinja a Munkinda wa Sinai

¹ Mwene Ahave walekele munakazi wendi Njezevele vyuma vyoshe vije vyalingile Elinja na muje mwatsiile vaka-kwimanena voshe va Mbale.

² Co Njezevele watumine lijwi kuli Elinja ngwendi, “Mwa vushunga vinjambi vanjitsiye nga imene a simbu ino vene kunjalingile cuma cimo kuli yove cije walingile kuli vaka-kwimanena.”

³ Elinja wazivile lyova, omwo watambwile majwi a Njezevele, co watewesele mwonyo wendi, waile amo na ngamba yendi watewelele ku Mbele Shemba mu Yunda. Co Elinja wasezele ngamba yendi kuje,

⁴ wendele litangwa lyoshe lyamutunu mu mambo. Co watumbamene asi mu munzinze wa muti, ikeye washakele ngeci atse. Co walombelele ngwendi, “Njayanda manene Shukulu Kalunga, tundisa mwonyo wange, ngeci njitse!”

⁵ Washuluvalele mwisi ya muti, wawililile mu tulo. Co vwasi-vwasi kangelo wamukwatele wendekele ngwendi, “Induka ulye.”

⁶ Co Elinja wakengezekele, wamwene mukasha wa likende na njava ya mema kuyehi na mutwe wendi. Walile nakunwa, co washuluvalele lalo.

⁷ Kangelo ka Shukulu Kalunga welukile lalo nakumwindula simbu yamucivali, wendekele ngwendi, “Induka ulye, kutewa uzeya omwo vungenzi vwakama manene.”

⁸ Elinja wendukile, walile nakunwa, co vyakulya vyamwanene nzili yakwenda matangwa makumi awana nakweta ku Sinai, Munkinda Wakujela.

⁹ Wetele kuje ku linzenzengoma, co walalele muje. Vwasi-vwasi Shukulu Kalunga wendekele kuli ikeye ngwendi, “Elinja, vikajo ulinga kuno?”

¹⁰ Elinja wakumbulwile ngwendi, “Shukulu Kalunga Njambi Muka-nzili yoshe, yange simbu yoshe njakupangela, yove lika. Oloni vanu va Isalele vanapokola cikumiiyo cavo nove, vanasiwula mitula yove, co vanatsii vaka-kwimanena vove voshe. Ange lika njasalako, co lalo vashaka kunjitsiya!”

¹¹ Shukulu Kalunga wendekele kuli ikeye ngwendi, “Ya ukemane akamwa ya munkinda.” Co wahuwisile lihunzi lyakama manene lije lyatavozwele malundu na mamanya, oloni Shukulu Kalunga kakelemo mu lihunzi embwe. Co lihunzi lyalikelele kuhuwa, asi ajajele, oloni Shukulu Kalunga kakelemo mukujaja kwa asi.

¹² Co munima yakujaja kwa asi kwakele tuhya, oloni Shukulu Kalunga kakelemo mu tuhya tuje embwe. Co munima ya tuhya kwezile lijwi lyakuyeveta kamandondo.

¹³ Omo Elinja walizivile, walifwikile cikoveyo cendi ku mesho watuukile anja, co wemanene ku cikolo ca linzenzengoma. Lijwi ngwalyo, “Elinja, vikajo ulinga kuno?”

¹⁴ Elinja wakumbulwile ngwendi, “Shukulu Kalunga Njambi Muka-nzili yoshe, yange simbu yoshe njakupangela, yove lika. Oloni vanu va Isalele vanapokola cikumiiyo cavo nove, vanasiwula mitula yove, co vanatsii vaka-kwimanena vove voshe. Ange lika njinasalao, co lalo vashakezeka kunjitsiya.”

¹⁵ Shukulu Kalunga wendekele ngwendi, “Iluka lalo mu mambo kuyehi na Ndamasiku, co kovela mu nganda ukavwavese mazi Hazayele apwe mwene wa Silya,

¹⁶ vwavesa mazi Yehu muna Nimeshi apwe mwene wa Isalele, co vwavesa mazi Elisha muna Shafete wa ku Avele Mehola akwinge apwe muka-kwimanena.

¹⁷ Woshe munu akaputumuka kuli Hazayele kumutsiya, co vakamutsiya kuli Yehu, munu woshe akaputumuka kumutsiya kuli Yehu, vakamutsiya kuli Elisha.

¹⁸ Oloni njikasezao vanu va mwonyo vakupwa 7,000 mu Isalele, voshe vaje vanapu vaka-kulongwa kuli yange, co kanda vacitsikamene Mbale nambe kutsemba kamponya kendi.”

Shukulu Kalunga asana Elisha

¹⁹ Elinja waile wawanene Elisha alinakulima na mukana wa vingombe, kulutwe lwendi kwakele vanu vakele nakulimisa vingombe mikana likumi na umo. Co Elinja washulwile cikoveyo cendi, co wacifwikile Elisha.

²⁰ Asinoni Elisha wasezele vingombe vendi, wakavele Elinja, co wendekele ngwendi, “Imana tai njicikasaleseo tate na vanana, ngeci njakuye amo nove.” Co Elinja wamukumbulwile ngwendi, “Mwamuvwa, iluka. Kunjasa kukuvindika embwe!”

²¹ Asinoni Elisha waile ku vingombe vendi, wavatsiile, co watelekele situ, co vimandauluwa vikevyo vyapwisile vitale. Waanene situ kuli vanu, co valile. Asinoni wakavele Elinja kupwa muka-kumukwasa.