1 Vimyene 18 - Livulu lya Shukulu Kalunga

Elinja na vaka-kwimanena va Mbale

¹ Munima ya simbu imo, mu mwaka wamucitatu wa lilanga, Shukulu Kalunga wendekele kuli Elinja ngwendi, “Ya ukalisholole kuli Mwene Ahave, co yange njikatuma nyonzi.”

² Co Elinja waile. Njala ya lyangengela yaamene manene mu Samaliya,

³ ngecivene, Ahave wasanene Ovandiya uje wapwile mukulunu wa ku lipela. (Ovandiya wapwile muka-kulemesa manene Shukulu Kalunga na mbunge yendi yoshe,

⁴ omo Njezevele wakele nakutsiya vaka-kwimanena va Shukulu Kalunga, Ovandiya wambateleo vaka-kwimanena 100, co wavashwekele mu manzenzengoma mu vimbunga vivali mumo makumi atanu mukwavo makumi atanu, co wavanene vyakulya na mema.)

⁵ Ahave wendekele kuli Ovandiya ngwendi, “Tuye nakushakezeka masima oshe a tuvwelu-vwelu na mu vyana vyoshe vya muno mu lifuti nga twasa kuwanamo mwila wakuyoyesa tuvalu na vimulu. Ngeci vimuna vetu kesi vatse.”

⁶ Valitavasanene ngeci ku mutambela uka wa lifuti kuje munu na munu napande kuya nakuwilula, co vakatukile vaile mu mitambela yakuliseza-seza.

⁷ Omo Ovandiya wakele nakuya mu ngila, sisumuku naliwana na Elinja. Wamuzivukile, watsikamene asi nakumulemesa, co wamwihwile ngwendi, “Mwa vushunga yove Elinja?”

⁸ Elinja wamukumbulwile ngwendi, “Eyo, yange vene Elinja. Ya ukaleke shukulu mwene yove yange uno kuno.”

⁹ Co Ovandiya wakumbulwile ngwendi, “Vikajo njinalingi ngeci yove ushake kunjaka mu vushonde vwakunjitsiya kuli Mwene Ahave?

¹⁰ Njilisinga mu lizina lya Shukulu Kalunga, Njambi yove wakuyoya ngwange mwene nalanya cilanyo caali yove mu lifuti lyoshe lya mu kaye. Oshe aje muka-kushwana wa lifuti lika nambe lika alinga vukaleo ngeci kuwesimo mu lifuti lyendi, co Ahave ehula uje muka-kushwana alisinge ngeci kuvasa kukuwana.

¹¹ Ololo ushaka njiyeko nakumuleka ngwange uli kuno ndi?

¹² Cikapwa vati nga Munzinzime wa Shukulu Kalunga akutwala ku mutambela weka uje kuuzivuka omo njikuseza ano vene? Co omo njikaleka Ahave ngwange uli kuno, co nga kakuwanako, co akanjitsiya. Anuka ngeci yange njinapu muka-kulemesa Shukulu Kalunga na mbunge yange yoshe tunde ku vwanike vwange.

¹³ Kuma yove kuwazivile ngeci Njezevele nakele nakutsiya vaka-kwimanena va Shukulu Kalunga, yange njashwekao 100 mu manzenzengoma, mu vimbunga vivali mumo makumi atanu mukwavo makumi atanu, co njavanene vyakulya na mema?

¹⁴ Yove mwa vushunga ushaka njileke Ahave ngwange yove uli kuno? Co akanjitsiya!”

¹⁵ Elinja wamukumbulwile ngwendi, “Ali Shukulu Kalunga Muka-nzili yoshe, ou injapangela, njikuleka ngwange njikalisholola yange vavenya kuli mwene ku litangwa lya lelo.”

¹⁶ Ngecivene, Ovandiya waile kuli Mwene Ahave nakumuleka, Ahave wakatukile nakukaliwana na Elinja.

¹⁷ Omo Ahave wamwene Elinja, co wendekele kuli ikeye ngwendi, “Kuma yove ou, muka-kuyandesa manene mu Isalele!”

¹⁸ Elinja wamukumbulwile ngwendi, “Kesi yange muka-kuyandesa. Muka-kuyandesa napu yove na isho. Kuwesi kwononoka mashiko a Shukulu Kalunga, co ukalemesa tumponya va Mbale.

¹⁹ Ololo shika vanu va Isalele voshe ngeci njikaliwane navo ku Munkinda wa Kalemele. Co ija na vaka-kwimanena va Mbale 450, na vaka-kwimanena va vinjambi va Ashele 400 vaje vakali ku mesa na Vamwene Njezevele.”

²⁰ Ngecivene, Ahave wasanene vaIsalele voshe na vaka-kwimanena va Mbale kukaliwana ku Munkinda wa Kalemele.

²¹ Elinja wemanene kulutwe lwavo wendekele ngwendi, “Simbu ikajo mukalyangwila ou imunapande kupangela? Nga Shukulu Kalunga ikeye Njambi, co mulemeseni, oloni nga Mbale ikeye Njambi, co mulemeseni.” Oloni vanu kuvendekele lijwi nalimo lyai.

²² Asinoni Elinja wendekele ngwendi, “Ange lika muka-kwimanena wa Shukulu Kalunga njinasalao, oloni kuno kuli vaka-kwimanena va Mbale 450.

²³ Tuneneleni vingombe vavali va nkomba, umo apwe wa vaka-kwimanena va Mbale, mutsiyeni, muvatozoleni vipuka-vipuka, vamwake a vitale, oloni kesi vashwamekeo tuhya embwe. Co nange njikalinga ngacije lalo na ngombe mukwavo.

²⁴ Cooni vaka-kwimanena va Mbale valombe kuli njambi yavo, co nange lalo njikalomba kuli Shukulu Kalunga, co uje njambi akakumbulula nakutuma tuhya, ikeye Njambi.” Co vanu vamutavele.

²⁵ Asinoni Elinja wendekele kuli vaka-kwimanena va Mbale ngwendi, “Omwo yeni munapu muvavangi manene, co vwaeseni ngombe yeni akulivanga, lombeleni kuli njambi yeni, oloni kesi mushwameke tuhya.”

²⁶ Vanonele uje ngombe vavanenele, vamutsiile vamwakele a mutula, valombelele kuli Mbale ngeci ashwameke tuhya kushangumuka mutondo noo mukati ka mutwe. Vakinine kuzengeleka mutula, co vatambekele ngwavo, “Tukumbulule, Mbale!” Oloni Mbale kavakumbulwile.

²⁷ Akati ka mutwe, Elinja washangumukile kuvashendumuna ngwendi, “Lombeleni nakutambeka! Ikeye napu njambi! Mpano alinakulota mutanya-mwelu nambe naungama, nambe amo ikeye nayi mu vungenzi! Nambe amo ikeye nalala, co yeni munapande kumwindula!”

²⁸ Ngecivene, vaka-kwimanena valombelele nakutambeka manene, nakulitavozola na vimoko vakevo vavenya, kupwisa ngwe ku futisi yavo, noo maninga atuukile.

²⁹ Co vatwaleleo nakulitavozola nakuyambangela noo kuteuka kwa litangwa, oloni Mbale kavakumbulwile, nambe lijwi lyai vazivile.

³⁰ Asinoni Elinja wendekele kuli vanu ngwendi, “Shwenyeni kuyehi nange.” Co voshe valikungulwile kuli ikeye. Ikeye wakele nakuvwaesa mutula wa Shukulu Kalunga uje wasiwukilile asi.

³¹ Ikeye wanonele mamanya likumi na avali, limo na limo kwimanena miyati ije likumi na ivali ije ivalukile mazina a vana va Yakomba, uje Shukulu Kalunga yalukile lizina lya Isalele.

³² Watungulwile mutula wakulemesela Shukulu Kalunga na mamanya likumi na avali. Co ikeye wazengelekeleko mbulu. Elinja wacokwele ngunja ya kuzengeleka mutula ije yashulile na malita a mema likumi na awana.

³³ Asinoni waakele vitale a mutula, wavatozwele ngombe vipuka-vipuka, wavyakele a vitale. Walekele vanu ngwendi, “Shuliseni vinjava viwana vya mema, etileni a n̄ombelo na a vitale.” Co valingile ngacije,

³⁴ co wavalekele ngwendi, “Lingenimo lalo visimbu vivali.” Co valingilemo. Wendekele lalo ngwendi, “Lingenimo lalo visimbu vitatu.” Co valingilemo lalo.

³⁵ Co mema azengelekele mutula nakushulisa ije mbulu.

³⁶ A simbu yakukombelela kwa cingwezi Elinja muka-kwimanena washwenyele ku mutula nakulombela ngwendi, “Shukulu Kalunga, Njambi ya Avilahama, ya Isake, ya Yakomba, ololo mwesa ngeci kuma yove unapu u Njambi ya Isalele, co nange njinapu nji ngamba yove, njalingi vyoshe evi akushika kwove.

³⁷ Njikumbulule, Shukulu Kalunga, ngeci vanu ava vakuzivuke ngeci yove Shukulu Kalunga, unapu u Njambi, ngeci vimbunge vyavo vitengulukile kuli yove.”

³⁸ Vwasi-vwasi Shukulu Kalunga watumine tuhya, co twenyekele n̄ombelo, na vitale, na mamanya, co twenyekele livu nakumisa cau mema a muje mu ngunja.

³⁹ Omo vanu vamwene vije vyalingiwile, co voshe vatsikamene asi vatambekele ngwavo, “Shukulu Kalunga ikeye Njambi, Shukulu Kalunga lika ikeye Njambi!”

⁴⁰ Elinja washikile ngwendi, “Kwateni vaka-kwimanena va Mbale, kesi mutave nambe umo wavo atewe!” Co vanu vavakwatele voshe, Elinja wavashelumwisile ku Ndonga ya Kishone, co wavatsiile.

Elinja alomba nyonzi

⁴¹ Asinoni Elinja wendekele kuli Mwene Ahave ngwendi, “Ya ukalye nakunwa. Njazivi cilumo ca nyonzi yakama ilinakwija.”

⁴² Omo Ahave waile nakulya, co Elinja walondele akamwa ya Munkinda wa Kalemele, wakakulamene asi, nakwaka mutwe wendi mukati ka mavuli.

⁴³ Co wendekele kuli ngamba yendi ngwendi, “Kenga ku mema a kalunga.” Ngamba yendi waile, co welukile, wendekele ngwendi, “Njinakengeko, oloni kunjamwene cuma nacimo cai.” Elinja wamulekele kwilukilako visimbu vitanu na vivali.

⁴⁴ Co a simbu yamucitanu na vivali welukile, co wendekele ngwendi, “Njamono kalishelwa kakandondo kukasa kuhyana mu mbanda ya livoko lya munalume, kalinakutunda mu mema a kalunga.” Co Elinja washikile ngamba yendi ngwendi, “Ya ukaleke Mwene Ahave avwaese litemba lyendi eluke kwimbo omo kanda nyonzi imuzikiiye.”

⁴⁵ Mu kasimbu lika lilu lyafwikile na mashelwa akuzivala, lihunzi lyashangumukile kuhuwa, nyonzi yakama yashangumukile kunyoka. Co Ahave wakovelele mu litemba lyendi, washangumukile kwiluka ku Njezelele.

⁴⁶ Co nzili ya Shukulu Kalunga yezile ali Elinja, co walizitikile vuzalo vwendi mu mbunda, co washatukile kulutwe lwa Ahave ngila yoshe na ku Njezelele.