1 Vimyene 17 - Livulu lya Shukulu Kalunga

Elinja ambulula vuka-kwimanena a lilanga

¹ Muka-kwimanena umo lizina lyendi Elinja, wa ku Tisheve mu Ngilyande, wendekele kuli Mwene Ahave ngwendi, “Mu lizina lya Shukulu Kalunga, Njambi wakuyoya wa Isalele, ou injipangela, njikuleka ngwange kukukakala lime nambe nyonzi mu myaka ivali nambe itatu kuvanga noo yange njinendekamo.”

² Asinoni Shukulu Kalunga wendekele kuli Elinja ngwendi,

³ “Tunda ku mwela uno ya ku mutambela wa mu ngangela ukavande kuyehi na muna ndonga Kelite mu ngangela ya Yondau.

⁴ Ukanwa mema mu muna ndonga uje, co njinashiki makololo kukunenela vyakulya kuje.”

⁵ Co Elinja wononokele kushika kwa Shukulu Kalunga, co waile wakatumbamene ku muna ndonga Kelite.

⁶ Wanwile mema mu muna ndonga uje, co makololo vamunenelele makende na situ a mutondo a mutondo, na cingwezi ku cingwezi.

⁷ Co mu kasimbu kakandondo, muna ndonga uje womine cau, omwo kujeneka nyonzi.

Elinja na fwile wa munakazi wa mu Zalefate

⁸ Asinoni Shukulu Kalunga wendekele kuli Elinja ngwendi,

⁹ “Ololo ya ku limbo lya Zalefate, kuyehi na Sindone, ukakaleko. Omwo njinashiki fwile wa munakazi uje wakala kuje kukulisa.”

¹⁰ Ngecivene, Elinja waile ku Zalefate, omo wetele ku cikolo ca limbo, wamwene fwile wa munakazi alinakucava vitale. Co wendekele kuli uje fwile ngwendi, “Mwane, njaneniko mema njinwe.”

¹¹ Omo acili nakuya nakukashaka mema, co wamutambekelele lalo ngwendi, “Njineneleniko na makende lalo.”

¹² Co uje fwile wamukumbulwile ngwendi, “Njilisinga mu lizina lya Shukulu Kalunga Njambi yove wakuyoya kunjesi na likende lyai, njili lika na kavunga ka tiliku kakandondo kali mu lilonga, na tumazi twatundondo twa olive tuli mu njava. Njinaija kuno mukucava vitale ngeci njiye navyo ku njuvo tukateleke tuje twatundondo njilinatwo nange na munange. Vikevyo vyakulya vyetu vya mamaneselelo, asinoni tukakala na njala, co tukalanduke.”

¹³ Co Elinja wendekele kuli ikeye ngwendi, “Kesi ulishoshomwene embwe. Ya lika ukavwaese vyakulya vyove. Oloni akulivanga njilingileko mukasha wa likende waundondo ku evi ulinavyo, co nena kuli yange, asinoni vwaesa vyove na munove,

¹⁴ omwo eci cikeco canendeka Shukulu Kalunga, Njambi ya Isalele ngwendi, ‘Vunga vwa tiliku kuvukahu mu lilonga nambe mazi kuwakahu mu njava omo kanda litangwa lije yange, Kalunga, njitume nyonzi.’ ”

¹⁵ Co uje fwile waile nakulinga ngwe muje Elinja wamulekele, Elinja, na fwile, na naanga yendi vakele na vyakulya vyakupwamo a matangwa oshe.

¹⁶ Ngwe muje Shukulu Kalunga mwakulaesele Elinja, muje mu lilonga kumwahwile vunga vwa tiliku nambe mazi kuwomine muje mu njava.

¹⁷ Co omo kwetile simbu, uje muna fwile wavinjile, wavinjile manene, ngeci akumanesa watsile.

¹⁸ Uje fwile wendekele kuli Elinja ngwendi, “Yove munu wa Njambi, omwo vikajo unalingila eci kuli yange? Kuma yove unaija kuno mukwanukisa Njambi a vuvi vwange ngeci munange atse?”

¹⁹ Co Elinja wendekele ngwendi, “Njane mwanike.” Co watundisile mwanike mu mavoko a vaina, wamutwalele ku mulili wa akamwa kuje kwakele nakulala, co wamulangekele a vulili vwendi.

²⁰ Asinoni walombelele na lijwi lyakama ngwendi, “Yove Shukulu Kalunga Njambi yange, omwo vikajo unalingila cuma cakukomokesa ngacije kuli ou fwile? Ikeye nakala na ngozi yakunjinyunga, co ololo unatsii munendi!”

²¹ Asinoni Elinja walyololwele ali mwanike visimbu vitatu, co walombelele ngwendi, “Yove Shukulu Kalunga Njambi yange, indula mwanike ou ayoye!”

²² Shukulu Kalunga wakumbulwile lilombelo lya Elinja, mwanike washangumukile kuhwima lalo, co wendukile.

²³ Elinja washelumwisile mwanike kuli vaina, wendekele ngwendi, “Kenga, munove alinakuyoya!”

²⁴ Co uje fwile wamukumbulwile ngwendi, “Njizivuka ngeci yove unapu u munu wa Njambi, mwa vushunga vene Shukulu Kalunga alinakwendeka muli yove!”