1 Vimyene 16 - Livulu lya Shukulu Kalunga

¹ Shukulu Kalunga watumine Yehu muka-kwimanena muna Hanani, kuleka Mbasha ngwendi,

² “Naumo wai wakuzivukile kuvanga yange njakwangwile kupwa ntwama ya vanu vange va Isalele. Ololo unalingi vuvi ngwe Yelovowame, unatwamenena vanu vange mu vuvi. Co vuvi vwavo vunashangumuna vukalu vwange,

³ ololo njikaminyongesa, yove na naanga yove, ngwe munjalingile na naanga ya Yelovowame.

⁴ Munu woshe wa ku naanga yove uje atsila mu nganda vakamulya ku tutali, co woshe uje akatsila mushandangala yangoco vakamulya ku makuvi.”

⁵ Vyuma vyeka vije vyalingile Mbasha, na vilinga vyendi vyoshe vyakunyanyama vavisoneka mu Livulu lya Mizimbu ya Vimyene va mu Isalele.

⁶ Mbasha watsile, vamutsindile mu Tileza, co munendi Elahe wamushwanene kupwa mwene.

⁷ Lijwi lya Shukulu Kalunga ali Mbasha na naanga yendi lyezile ali Yehu muka-kwimanena omwo a vuvi vwalingile ku mesho a Shukulu Kalunga. Mbasha washangumwine vukalu vwa Shukulu Kalunga kesi lika omwo a vuvi vuje vwalingile, ngwe vwalingile Mwene Yelovowame akulivanga embwe, oloni omwo watsiile lalo naanga ya Yelovowame yoshe.

Mwene Elahe wa mu Isalele

⁸ Mu mwaka wamumakumi avali na itanu na umo wakushwana kwa Mwene Asa wa mu Yunda, Elahe muna Mbasha wapwile mwene wa mu Isalele, washwanene mu Tileza myaka ivali.

⁹ Co Zimeli, umo wa ali vamyata vendi uje wapwile mukulunu wa matemba amo a mwene, wamwendele vungungu. Litangwa limo mu Tileza, Mwene Elahe wapendele mu njuvo ya Aleza, uje wapwile mukulunu wa lipela.

¹⁰ Co Zimeli wakovelele mu njuvo, watsiile Elahe, co wamushwanene kupwa mwene. Eci calingiwile mu mwaka wamumakumi avali na itanu na ivali wakushwana kwa Mwene Asa wa mu Yunda.

¹¹ Omo Zimeli washwanene kupwa mwene, co watsiile vanu voshe va naanga ya Mbasha. Munalume woshe uje wapwile kavushoko nambe musamba wa Mbasha vamutsiile.

¹² Ngeci cipwe ngwe ku vije vyendekele Shukulu Kalunga ali Mbasha muli Yehu muka-kwimanena, Zimeli watsiile naanga yoshe ya Mbasha.

¹³ Omwo a tumponya twavo na omwo vakevo vatwamenenene Isalele nakuvakovelesa mu vuvi, Mbasha na munendi Elahe vashangumwine vukalu vwa Shukulu Kalunga, Njambi ya Isalele.

¹⁴ Vyuma vyoshe vije vyalingile Elahe vavisoneka mu Livulu lya Mizimbu ya Vimyene va mu Isalele.

Mwene Zimeli wa mu Isalele

¹⁵ Mu mwaka wamumakumi avali na myaka itanu na ivali wakushwana kwa Mwene Asa wa mu Yunda, Zimeli washwanene mu Tileza mu Isalele matangwa atanu na avali. Co mashwalale va Isalele vazengelekele nganda ya Ngimbetone mu Filisitiya,

¹⁶ co omo vazivile ngeci Zimeli nalwisa mwene nakumutsiya, co a litangwa lije vene voshe vapwisile Omeli mwene wa mu Isalele.

¹⁷ Co Omeli na mashwalale vendi vatundile mu Ngimbetone vaile nakulwisa Tileza.

¹⁸ Omo Zimeli wamwene ngeci nganda vanaifungulula, wakovelele mukati ka cimpaka cakukola ca njuvo ya mu lipela, wenyekele lipela lyendi walyenyekelelemo, watsile.

¹⁹ Zimeli kononokele Shukulu Kalunga akukava vingila vya Yelovowame. Wakovelesele vaIsalele mu vuvi.

²⁰ Vyuma vyeka vije vyalingile Zimeli, vipangi vyendi, na matumbe endi, vavisoneka mu Livulu lya Mizimbu ya Vimyene va mu Isalele.

Mwene Omeli wa mu Isalele

²¹ Co vanu va Isalele valipangele, vamo vashakele Timbeni muna Nginate apwe mwene, oloni vakwavo vashakele Omeli.

²² Akumanesa, vaje vashakele Omeli vahyanene, co Timbeni vamutsiile, co Omeli wapwile mwene.

²³ Ngecivene, mu mwaka wamumakumi atatu na umo wakushwana kwa Mwene Asa wa mu Yunda, Omeli wapwile mwene wa Isalele, washwanene myaka likumi na ivali. A myaka yakulivanga itanu na umo washwanene mu Tileza,

²⁴ co walandele lilundu lya Samaliya na mavundungulu a siliva akupwa 6,000 ku munalume umo lizina lyendi Shemele. Co kuje ku lilundu Omeli wazengelekeleko cimpaka, co watungilileko nganda, wailukile Samaliya, mu lizina lya Shemele, vavenya lije lilundu.

²⁵ Omeli walingile vuvi ku mesho a Shukulu Kalunga kutuvakana vimyene voshe vaje vaashwanene.

²⁶ Ngwe lalo Yelovowame, na ikeye lalo washangumwine vukalu vwa Shukulu Kalunga, Njambi ya Isalele, a vuvi vwendi vwakutwamenena vanu va Isalele nakuvakovelesa mu vuvi namukulemesa tumponya.

²⁷ Vyuma vyeka vije vyalingile Omeli, na vilinga vyendi vya nzili vavisoneka mu Livulu lya Mizimbu ya Vimyene va mu Isalele.

²⁸ Omeli watsile, vamutsindile mu Samaliya, co munendi Ahave wamushwanene kupwa mwene.

Mwene Ahave wa mu Isalele

²⁹ Mu mwaka wamumakumi atatu na itanu na itatu wakushwana kwa Mwene Asa wa mu Yunda, Ahave muna Omeli wapwile mwene wa mu Isalele, co washwanene mu Samaliya myaka makumi avali na myaka ivali.

³⁰ Co ikeye walingile vuvi ku mesho a Shukulu Kalunga kutuvakana vimyene voshe vaje vaashwanene.

³¹ Kucapwile cuma cacindondo kuli ikeye kwenda mu vuvi ngwe Yelovowame, co wambatele lalo Njezevele, muna Mwene Etembale wa ku Sindone, co walemesele Mbale.

³² Watungilile Mbale njuvo yakumulemesela mu Samaliya, co wamutungilile mutula, wawakele mu njuvo ya Mbale.

³³ Co lalo wapangele cifwa ca Ashela njambi wa munakazi. Co watwaleleo kulinga vyuma vyavivi nakushangumuna vukalu vwa Shukulu Kalunga, Njambi ya Isalele, kutuvakana vimyene voshe vakulivanga mu Isalele.

³⁴ Omo Ahave washwanene, Hiyele wa ku Mbetele watungulwile Yeliko. Ngwe mwendekele Shukulu Kalunga ali Yoshwa muna Nune, omo Hiyele wendile luvula lwa Yeliko, co munendi wa ntwatwa Avilame watsile, co omo watungile vikolo, munendi Senguve wa mutinikila watsile.