1 Vimyene 14 - Livulu lya Shukulu Kalunga

Kutsa kwa muna Yelovowame wa munalume

¹ A simbu ije Aviya muna Mwene Yelovowame wavinjile.

² Co Yelovowame wendekele kuli munakazi wendi ngwendi, “Limuke ngeci kesi kukale munu umo akuzivuke, co ya ku Shilo, kuje kwakala Ahiya muka-kwimanena, uje wendekele ngeci njikapwa nji mwene mu Isalele.

³ Mwambatele mikasha ya makende likumi, na mashama-shama a kuhima, na njava ya vuki. Co ukamwihule cuma mukajo cikalingiwa ali munetu, co akakuleka.”

⁴ Ngecivene, waile kwimbo lya Ahiya ku Shilo. Ahiya kasele kumona omwo ya vukulukazi.

⁵ Shukulu Kalunga wamulekele ngeci munakazi wa Yelovowame alinakwija nakwihula ali munendi, uje wakele nakuvinja. Co Shukulu Kalunga walekele Ahiya mwakwendeka. Omo munakazi wa Yelovowame wetele, co ikeye walikwisile kupwa munu weka.

⁶ Oloni omo Ahiya wamuzivile alinakwija ku cikolo, wendekele ngwendi, “Kovela, njakuzivuka yove munakazi wa Yelovowame. Omwo vikajo ulinakulikwisa kupwa munu weka? Njili na muzimbu wauvi ali yove.

⁷ Ya ukaleke Yelovowame ngwove evi vikevyo vyanendeka Shukulu Kalunga, Njambi ya Isalele, ngwendi, ‘Njakwangwile akati ka vanu nakukupwisa muka-kushwana vanu vange va Isalele.

⁸ Njatundisile vumwene kuli vatekulwila va Ndaviti nakuvwana kuli yove. Oloni kuwapwile ngwe ngamba yange Ndaviti, uje wapwile wa kulongwa manene kuli yange, uje wononokele kushika kwange, nakulinga lika vije vinjamulekele.

⁹ Unalingi vuvi vwakama manene kutuvakana vaje valivangele kushwana. Yove unanjivyana, co unashangumuna vukalu vwange akulinga tumponya na vifwa vya vutale nakuvilemesa.

¹⁰ Omwo a eci njikanena tuyando a vumwene vwove nakutsiya vatekulwila vove voshe va vanalume, mu cifwa cimo ku vanike na vakulunu. Yange njikatundisa naanga yove, co vakavakomba ngwe munu akomba tuzi.

¹¹ Munu woshe wa ku naanga yove uje atsila mu nganda vakamulya ku tutali, co woshe uje akatsila mushandangala yangoco vakamulya ku makuvi. Yange Kalunga, njinendekamo. ’ ”

¹² Ahiya wendekele kuli munakazi wa Yelovowame ngwendi, “Iluka kwimbo. Omo ucikovela lika mu nganda, co munove akatsa.

¹³ Vanu voshe va Isalele vakamulila nakumutsinda. Ikeye lika mwana wa ku naanga ya Yelovowame ivakatsinda mwamuvwa, omwo ikeye lika uje Shukulu Kalunga, Njambi ya Isalele, yanavwaelela nendi.

¹⁴ Shukulu Kalunga akaka mwene weka mu Isalele uje akamanesa vumwene vwa Yelovowame.

¹⁵ Shukulu Kalunga akahisa Isalele, co Isalele ikajaja ngwe mulikajaja lihongo mu muna ndonga. Ikeye akatundisa vanu va Isalele mu lifuti eli lyalivwa lije walyanene kuli vakukulwila vavo, co akavashandwela musambwa ya Ndonga ya Yufuleti, omwo vashangumuna vukalu vwendi akushonga tumponya twa Ashela njambi wa munakazi.

¹⁶ Shukulu Kalunga akaseza Isalele omwo Yelovowame nalingi vuvi nakutwamenena vanu va Isalele mu vuvi.”

¹⁷ Co munakazi wa Yelovowame welukile ku Tileza. Acikovela lika mwimbo lyendi, co mwana watsile.

¹⁸ Vanu va Isalele vamulilile nakumutsinda, ngwe mwendekele Shukulu Kalunga ali ngamba yendi, Ahiya muka-kwimanena.

Kutsa kwa Yelovowame

¹⁹ Vyuma vyeka vije vyalingile Mwene Yelovowame, vinzita vyalwile na muje mwashwanene, vyoshe vavisoneka mu Livulu lya Mizimbu ya Vimyene va mu Isalele.

²⁰ Yelovowame washwanene kupwa mwene myaka makumi avali na myaka ivali. Co watsile nakumutsinda, co munendi Nandave wamushwanene kupwa mwene.

Mwene Lehovowame wa mu Yunda

²¹ Lehovowame muna Solomoni wakele na myaka makumi awana na mwaka umo omo wapwile mwene mu Yunda, co washwanene myaka likumi na itanu na ivali mu Yelusalema, nganda ije yaangwile Shukulu Kalunga mu mitambela yoshe ya Isalele kupwa mwela uje wakumulemesela. Vaina ya Lehovowame vapwile Nama wa ku Amoni.

²² Vanu va Yunda valingile vuvi ku mesho a Shukulu Kalunga, co vashangumwine vukalu vwendi kutuvakana muvalingile vakukulwila vavo voshe.

²³ Co vatungile myela yakulemesela vinjambi vangoco, vemikile vimanda vya mamanya na vimweso vya Ashela mukuvilemesa akamwa ya malundu, na mwisi ya minzinze ya miti.

²⁴ Vuvi vwakama manene vuvalingile ovu, kwakele vanalume na vanakazi vaje valingile vukwizi ku mitambela yakulemesela ya vaka-kujeneka kukulaela. Co vanu va Yunda valingile vyuma vya vunyengwe manene vije vivalingile vanu vaje vashekele Shukulu Kalunga mu lifuti muje muvaile vaIsalele.

²⁵ Mu mwaka wamucitanu wakushwana kwa Lehovowame, Mwene Shishake wa ku Ingito walwisile Yelusalema.

²⁶ Wambatele vufuko vwoshe vwa mu Njuvo ya Shukulu Kalunga novu vwa mu lipela, amo na vintelo vya ngolinde vije vyafulile Solomoni.

²⁷ Co akwingisamo vyeka, Mwene Lehovowame wafulile vintelo vya vunengu, co wavyanene kuli vamyata vaka-kunyunga ku vikolo vya lipela.

²⁸ Simbu yoshe mwene wakele nakuya ku Njuvo ya Shukulu Kalunga, vaka-kunyunga vambatele vintelo, co vaviilwisile lalo mu mulili wakuvitulikila.

²⁹ Vyuma vyeka vije vyalingile Mwene Lehovowame vavisoneka mu Livulu lya Mizimbu ya Vimyene va mu Yunda.

³⁰ A simbu yoshe eyi Lehovowame na Yelovowame vakele nakulilwisa umo na mukwavo.

³¹ Lehovowame watsile, co vamutsindile mu mbumbo ya vumwene mu Nganda ya Ndaviti. Vaina vapwile Nama wa ku Amoni, co munendi Aviya wamushwanene kupwa mwene.