1 Vimyene 13 - Livulu lya Shukulu Kalunga

¹ Akushika kwa Shukulu Kalunga, muka-kwimanena wa ku Yunda waile ku Mbetele, omo wetele kuje wawanene Yelovowame nemana ku mutula mukukombelela n̄ombelo.

² Co uje muka-kwimanena watambekele ngwendi Shukulu Kalunga nanjitumu kwendeka ku mutula ou ngwendi, “Ove mutula, Shukulu Kalunga nendeka ngwendi, ‘Kenga, mwana akasemuka ku naanga ya Ndaviti lizina lyendi Yosiya. Ikeye akatsiilao vaka-kukombelela vaje vakapanga ku mitula ya vaka-kujeneka kukulaela vaje vakakombelela vin̄ombelo a mutula ou, co akenyekelao vitsiya vya vanu.’ ”

³ Co uje muka-kwimanena watwaleleo nakwendeka ngwendi, “Mutula ou ukavujuka, co lito lyao likashandoka. Asinoni ukazivuka ngeci Shukulu Kalunga ikeye nendeka muli yange.”

⁴ Omo Mwene Yelovowame wazivile ngeci, co wenikile uje muka-kwimanena, washikile ngwendi, “Kwateni ou munalume!” Co aje vene livoko lya mwene lyomine cau ngeci kasele kulyeteka lalo.

⁵ Co aje vene mutula wavujukile, lito lyatotomokelele asi, ngwe mwendekele muka-kwimanena mu lizina lya Shukulu Kalunga.

⁶ Mwene Yelovowame wendekele kuli muka-kwimanena ngwendi, “Mwane njilombeleleko kuli Shukulu Kalunga Njambi yove, ngeci akangwise livoko lyange!” Co muka-kwimanena walombelele kuli Shukulu Kalunga, co livoko lya mwene lyakangukile.

⁷ Asinoni mwene wendekele kuli muka-kwimanena ngwendi, “Tuye mumo kwimbo ngeci ukalye vyakulya. Njikakwana cikandelela a evi unalingi.”

⁸ Co muka-kwimanena wamukumbulwile ngwendi, “Nameme nga ukanjana litambelo lya vufuko vwove, kunjii amo nove nambe kulya nambe kunwa cuma cimo amo nove embwe.

⁹ Omwo Shukulu Kalunga nanjishikile ngeci kesi njilye nambe kunwa cuma cimo, nambe kwiluka kwimbo mu ngila muje munjinezile embwe.”

¹⁰ Ngecivene, kelukile lalo mu ngila ije yezile, oloni waile na ngila yeka.

Muka-kwimanena wa kakulukazi wa mu Mbetele

¹¹ A simbu ije kwakele muka-kwimanena wa kakulukazi mu Mbetele. Vana vendi vezile nakumuleka vije vyalingile muka-kwimanena wa ku Yunda mu Mbetele a litangwa lije, na vije vyendekele kuli Mwene Yelovowame.

¹² Co uje muka-kwimanena wa kakulukazi wehwile ngwendi, “Ngila mukajo yanaile omo namisezele?” Vana vendi vamulekele ngila,

¹³ co wavalekele ngeci vamuvwaesele cimulu cendi, co vamuvwaeseleleye, walondeleo,

¹⁴ wakavele muka-kwimanena wa ku Yunda, co wamuwanene natumbama mwisi ya muti wa oke. Wamwihwile ngwendi, “Yove muka-kwimanena uje natundu ku Yunda ndi?” Co uje munalume wamukumbulwile ngwendi, “Yange vene.”

¹⁵ Uje muka-kwimanena wa kakulukazi wendekele ngwendi, “Twiluke kwimbo ukalye vyakulya.”

¹⁶ Oloni uje muka-kwimanena wa ku Yunda wamukumbulwile ngwendi, “Kunjasa kwiluka nove kwimbo kutambula lijumbu lyove embwe. Co kunjishaka lalo kulya nambe kunwa cuma cimo amo nove kuno,

¹⁷ omwo Shukulu Kalunga nanjishiki ngeci kesi njilye nambe kunwa cuma cimo, nambe kwiluka kwimbo mu ngila muje munjinezile embwe.”

¹⁸ Asinoni uje muka-kwimanena wa kakulukazi wa ku Mbetele wendekele kuli ikeye ngwendi, “Nange lalo nji muka-kwimanena ngwe yove, co akushika kwa Shukulu Kalunga ali kangelo nanjileka kuya amo nove kwimbo ngeci njikakujumbule.” Oloni uje muka-kwimanena wa kakulukazi wendekele makuli.

¹⁹ Ngecivene, uje muka-kwimanena wa ku Yunda welukile kwimbo amo na uje muka-kwimanena wa kakulukazi, co wakalile amo nendi vyakulya.

²⁰ Omo vene vacili ku mesa, lijwi lya Shukulu Kalunga lyezile kuli muka-kwimanena wa kakulukazi,

²¹ co uje muka-kwimanena wa kakulukazi watambekele kuli uje muka-kwimanena wa ku Yunda ngwendi, “Shukulu Kalunga nendeka kuli yove ngwendi kuwononokele nakulinga vije vyanakushikile.

²² Oloni, uneluka nakulya vyakulya mu mwela uje wakushikile ngwendi kesi ukalilemo vyakulya. Omwo a eci vakakutsiya, co muvila wove kuvakautsindi mu mbumbo ya naanga yove.”

²³ Omo vamanesele kulya, co uje muka-kwimanena wa kakulukazi wavwaesele cimulu ca uje muka-kwimanena wa ku Yunda,

²⁴ co walondeleo nakuya. Co a ngila, waliwanene na ndumba uje wamukwatele nakumutsiya. Muvila wendi walalele mu ngila, cimulu na ndumba vemanene kumukulo wawo.

²⁵ Co vanalume vamo vetile kuje vamwene muvila uli mu ngila, na ndumba nemana kuyehi nawo. Co vaile ku Mbetele nakwambulula vije vamwene.

²⁶ Omo uje muka-kwimanena wa kakulukazi wazivile a eci, co wendekele ngwendi, “Owo ikeye uje muka-kwimanena kononokele kushika kwa Shukulu Kalunga! Ngecivene, Shukulu Kalunga natumine ndumba kumulwisa nakumutsiya, ngwe muje mwendekele Shukulu Kalunga.”

²⁷ Co wendekele kuli vana vendi ngwendi, “Njilemekeleni cimulu cange.” Co vamulemekeleleye,

²⁸ walondeleo, waile, wawanene muvila wa uje muka-kwimanena unalala mu ngila, cimulu na ndumba anga vanemanena kumukulo wawo. Co ndumba kalile uje muvila nambe kulwisa uje cimulu.

²⁹ Uje muka-kwimanena wa kakulukazi wakakwile muvila, nakuwaka a cimulu, co wawilwisile ku Mbetele walilile, co wautsindile.

³⁰ Wautsindile mu mbumbo ya naanga yendi, ikeye na vana vendi valilile, nakwendeka ngwavo, “Kekange ndolome yange, tawe ndolome yange!”

³¹ Omo vanatsindi laja, co uje muka-kwimanena wendekele kuli vana vendi ngwendi, “Omo njikatsa, mukanjitsinde mu mbumbo ino vene, mukaka muvila wange kuyehi nou wendi.

³² Majwi aje endekele akushika kwa Shukulu Kalunga a mutula wa mu Mbetele na a mitambela yoshe yakulemesela mu membo a mu Samaliya akapwa a vushunga.”

Vuvi vwakama vwa Yelovowame

³³ Mwene Yelovowame wa mu Isalele katengulukile ku vingila vyendi vyavivi, oloni watwaleleo kwangula vaka-kukombelela va ku miyati yeka mukupanga ku mitula ije yatungile. Co wemikile munu woshe uje washakele kupwa muka-kukombelela.

³⁴ Co vuvi ovu vwanenele luvinda lwakama ali Yelovowame nakunyongesa muyati wendi.