1 Vimyene 12 - Livulu lya Shukulu Kalunga

Miyati ya ku kunto valyangunuka

¹ Lehovowame waile ku Shekeme, kuje vanu voshe va ku kunto ya Isalele valikungulwile nakumupwisa mwene.

² Omo Yelovowame muna Nembate, uje waile ku Ingito kutewa Mwene Solomoni, omo wazivile muzimbu ou, co welukile kwimbo kutunda ku Ingito.

³ Vanu va ku kunto vamusanene, co voshe vaile amo kuli Lehovowame vendekele kuli ikeye ngwavo,

⁴ “Isho Solomoni watuyandesele manene nakutulemuwisa na vitele vyavikalu. Nga ututepulula ku vulemu ovu nakutuyoyesa mwamuvwa, co tukapwa vanu vove va kulongwa.”

⁵ Ngeci wavakumbulwile ngwendi, “Yeni mukakale matangwa atatu, co mukaija asina njakumikumbulula.” Ngecivene, vanu vaile.

⁶ Mwene Lehovowame wehwile vanalume va vakulunu vaje vapangele vipangi vyakunangula ishe Solomoni. Co wavehwile ngwendi, “Kukumbulula mukajo munjinangula ngeci njakukumbulule ava vanu?”

⁷ Vamukumbulwile ngwavo, “Nga ushaka kupangela vanu ava mwamuvwa, kumbulula mwamuvwa cihula cavo, co simbu yoshe vakakupangela na kulongwa.”

⁸ Oloni Lehovowame walimbulwile kunangula kwa vakulunu va vanalume, waile kuli vakwenje vaje vakolele amo nendi, co vapwile oni vaka-kumunangula.

⁹ Wavehwile ngwendi, “Mu ngila muka mumunjinangwila? Njikendeka vatijo kuli ava vanu valinakunjilomba ngeci njehwise ku vitele vyavo?”

¹⁰ Co vaje vakwenje vamukumbulwile ngwavo, “Valeke ngwove, ‘Mulavo wakushongo ya livoko lyange unahimi manene kutuvakana nyonga ya tate!’

¹¹ Valeke lalo ngwove, ‘Tate wamitwikile vitele vyakulema, yange njikamilemuwisa manene. Tate wamipupisile civanzi, oloni yange njikamipupisa civanzi ca mambimbo!’ ”

¹² Co omo kwetile matangwa atatu, Yelovowame na vanu voshe velukile kuli Mwene Lehovowame ngwe muje mwavashikile.

¹³ Mwene Lehovowame walimbulwile kunangula kwa vaje vakulunu va vanalume, co wendekele na vukalu manene kuli vaje vanu,

¹⁴ ngwe muje muvamunangwile vaje vakwenje. Wendekele ngwendi, “Tate wamitwikile vitele vyakulema, yange njikamilemuwisa manene. Tate wamipupisile civanzi, oloni yange njikamipupisa civanzi ca mambimbo!”

¹⁵ Eci capwile cizango ca Shukulu Kalunga ngeci ashulise vije wendekele kuli Yelovowame muna Nembate muli Ahiya muka-kwimanena wa ku Shilo. Eci cikeco calingisile mwene ngeci kesi atolilile kuli vanu.

¹⁶ Omo vanu vamwene ngeci mwene kavatolilila, vatambekele ngwavo, “Ndaviti na naanga yendi vatunde! Vikajo vanatulingila? Eni vanalume va Isalele, tuyeni ku membo etu! Mweceleni Lehovowame alimwene!” Ngecivene, vanu va Isalele vamutengulukilile,

¹⁷ co vasezele Lehovowame kupwa lika mwene wa vanu vaje vakele mu mutambela wa Yunda.

¹⁸ Asinoni Mwene Lehovowame watumine Andonilame, uje wapwile muka-kwendesa vipangi, kuya kuli vaIsalele, oloni vakamwashele mamanya nakumutsiya. A cuma eci, Lehovowame wazambwile vwasi kulonda mu litemba lyendi, co watewelele ku Yelusalema.

¹⁹ Kutunda a simbu ije vene vanu va ku vumwene vwa ku kunto ya Isalele vatengulukilile vumwene vwa Ndaviti.

²⁰ Omo vanu va Isalele voshe vazivile ngeci Yelovowame neluka kutunda ku Ingito, vamulanyele ku cikungulukilo ca vanu voshe, co vamupwisile mwene wa mu Isalele. Kuvanga muyati wa Yunda lika vakevo vononokele ku vatekulwila va Ndaviti.

Vuka-kwimanena vwa Shemaya

²¹ Omo Lehovowame wetele mu Yelusalema, wakungulwile vamo mashwalale vakupwa 180,000 vakulwa mwamuvwa va ku miyati ya Yunda na Mbenjemani. Washakele kukalwa nzita ngeci elwise nzili yendi yakushwana miyati ya Isalele ya ku kunto.

²² Oloni Njambi walekele Shemaya muka-kwimanena

²³ kwambulula lijwi eli kuli Lehovowame na kuli vanu voshe va ku miyati ya Yunda na Mbenjemani ngwendi,

²⁴ “Kesi mulwise vandolome veni, vanu va Isalele, ilukeni kwimbo yeni voshe. Eci cinalingiwa cinapu cizango cange.” Voshe vononokele kushika kwa Shukulu Kalunga, co velukile ku membo avo.

Yelovowame akengesa nima kuli Shukulu Kalunga

²⁵ Mwene Yelovowame wa mu Isalele wasitile cimpaka ca limbo lya Shekeme mu lifuti lya malundu lya Efalime, co wakele kuje kasimbu lika. Asinoni watundileko, co wakasitile cimpaka ca limbo lya Penwele.

²⁶ Yelovowame wayongwele mu mbunge yendi ngwendi, “Ololo vumwene vukeluka lalo ku njuvo ya Ndaviti,

²⁷ nga vanu ava vaya ku Yelusalema nakukombelela vin̄ombelo kuli Shukulu Kalunga mu Njuvo ya Shukulu Kalunga, co vimbunge vya ava vanu vikatengulukila lalo kuli Mwene Lehovowame wa mu Yunda, co vakanjitsiya.”

²⁸ Omo Yelovowame wamanesele kuyongola evi, co wafulile vingombe vavali va ngolinde, co wendekele kuli vanu vendi ngwendi, “Simbu yoshe munakala nakuya ku Yelusalema mukulemesa. Eni vanu va Isalele, ava vakevo vinjambi veni vaje vamitundisile ku Ingito!”

²⁹ Yelovowame waakele ngombe umo wa ngolinde mu Mbetele, co mukwavo wamwakele mu Ndani.

³⁰ Ngecivene, vanu valingile vuvi, vaile mukulemesa ku Mbetele na ku Ndani.

³¹ Co Yelovowame lalo watungile myela yakulemesela akamwa ya malundu, waangwile vaka-kukombelela va ku vanu veka kesi va ku muyati wa vaLevi.

Kulemesa kwa mu Mbetele vacihisa

³² Co lalo Yelovowame wemikile litangwa lya ciwano ca vunjambi a litangwa lyamulikumi na atanu ku ngonde yamucitanu na vitatu, cakufwa ngwe ciwano cije cakele nakulingiwa mu Yunda. Co a mutula wa ku Mbetele Yelovowame wakombeleleleo vin̄ombelo ku vingombe va ngolinde vaje wafulile, co waakele vaka-kukombelela ku Mbetele mukupanga ku myela ije yakulemesela yatungile.

³³ Co a litangwa lyamulikumi na atanu ku ngonde yamucitanu na vitatu, a litangwa lije lyemikile, Yelovowame waile ku Mbetele nakukombelela n̄ombelo a mutula mukulisamba a ciwano cije cemikilile vanu va Isalele.