1 Vimyene 10 - Livulu lya Shukulu Kalunga

Vungenzi vwa vamwene wa ku Shemba

¹ Omo vamwene wa ku Shemba wazivile lutsimo lwa Solomoni, co waile ku Yelusalema mukumweseka na vihula vyakukaluwa.

² Waile na vanu vavangi manene, na tumelo vambatele n̄undu, na mamanya a seo yakama, na ngolinde yaingi manene. Omo waliwanene na Solomoni, wamwihwile vihula vyoshe vije vyakele mu mbunge yendi.

³ Co Solomoni wavikumbulwile vyoshe, kukwakele cuma cacikalu conwene kulumbununa.

⁴ Co vamwene wa ku Shemba wazivile mana a Solomoni, co wamwene lipela lije lyatungile.

⁵ Co wamwene vyakulya vije vivamunenelele ku mesa yendi, na vinjuvo vya vamyata vendi, nakulivwaesa kwa vanu va mu lipela lyendi, na vuzalo vwakulifwa vuje vazalele vangamba vaje vamuvandamenene ku viwano, na vin̄ombelo vyakombelelele mu Njuvo ya Shukulu Kalunga. Co vyoshe evi vyamukomokesele manene.

⁶ Co wendekele kuli Mwene Solomoni ngwendi, “Evi vinjazivile mu lifuti lyange ali yove na a mana ove vinapu vya vushunga!

⁷ Oloni kunjakulaelele vivanjilekele vanu kuvanga omo njinaija mukulimwena yange vavenya. Kunjazivisisile nambe cimo, mana ove na vufuko vinapu vyakama manene kutuvakana muje vanjilekele.

⁸ Kuvezika kwa vanakazi vove kunapu kwakama manene! Co lalo na vangamba vove vakuvezika, ava simbu yoshe vali ku mesho ove nakuziva vyendeka vyove vyakunyanyama!

⁹ Vashangazale Shukulu Kalunga Njambi yove! Nakumwesa kuvwaelela kwendi akukupwisa mwene wa mu Isalele. Omwo cizemo cendi a Isalele cije kucesi kutenguluka, ikeye nakupwisa mwene yavo ngeci unyunge mashiko na vushunga.”

¹⁰ Co vamwene wa ku Shemba waanene vwana vwezile navwo kuli Solomoni. Makilo akutuvakana 4,000 a ngolinde, na n̄undu yaingi manene, na mamanya a seo yakama. Co n̄undu yamwanene vamwene wa ku Shemba yatumine manene ije kanda ayitambule nambe simbu ya kunima.

¹¹ (Co mato akama a Hilame anenele ngolinde yakutunda ku Ofila, anenele lalo na viti vyavingi vya njunipa na mamanya a seo yakama.

¹² Solomoni wapangesele viti vije vindendelo vyakulondela mu Njuvo ya Shukulu Kalunga na mu lipela lyendi, co lalo washongele tulyalya na visanzi vya vaka-kwimba. Vyapwile viti vyavivwa manene vya njunipa vije kanda vacivinene lalo mu Isalele.)

¹³ Mwene Solomoni waanene vamwene wa ku Shemba vyuma vyoshe vije vyalombele, nkala cuma calombele, kukumbasanako vwana vuje vwamwanene Solomoni vwa kulomba. Ngecivene, ikeye na vangamba vendi velukile ku lifuti lya Shemba.

Vufuko vwa Mwene Solomoni

¹⁴ A mwaka na mwaka Mwene Solomoni wakele nakutambula ngolinde yakweta ku makilo 23,000,

¹⁵ kuwezelelako ku lisimu vakele nakufweta vaka-kulandulula, na kakondweso kakutunda ku vaka-mavenda, na mulambu vakele nakunena vimyene va Alambiya na vanguvulu va mu mitambela ya Isalele.

¹⁶ Solomoni wafulile vintelo vyakama vyakupwa 200, co ntelo imo na imo vaifwikile na ngolinde ya makilo atanu na avali.

¹⁷ Co lalo wafulile vintelo vyavindondo vyakupwa 300, na vikevyo lalo vavifwikile na ngolinde ya makilo avali. Co vintelo vyoshe vije wavitulikilile mu Njuvo ya ku Shwata ya Lembanone.

¹⁸ Mwene Solomoni washongele lalo litanda lyakama. Mutambela walyo wapwile wakufwika na mayo a vinjamba, co mitambela ikwavo vaifwikile na ngolinde yaivwa.

¹⁹ Lije litanda lyakele na vindendelo vitanu na imo, kunima ya litanda kwakele cifwa ca mutwe wa muna ngombe, ku mutambela umo na umo akutumbama akele viyakelo, co vimweso vya vindumba vavali vyemanene kumukulo wa viyakelo,

²⁰ co vimweso vya vindumba likumi na vavali vyemanene kumukulo umo na umo ku vindendelo vije vitanu na imo, co kukwakele litanda lyakulifwa na lije mu vumwene vweka lalo.

²¹ Vinganja vyoshe vyanwililile Mwene Solomoni vyapwile vya ngolinde, na vivala vyoshe vya mu Njuvo ya ku Shwata ya Lembanone na vikevyo lalo vyapwile vya ngolinde yaivwa manene. Kuvapangesele lalo siliva, omwo kuyakele na seo a matangwa a Mwene Solomoni.

²² Mwene Solomoni wakele na mato amangi manene aje akele nakuya amo na mato a Hilame. Omo kuneti myaka itatu, mato endi akele nakunena ngolinde, na siliva, na mayo a vinjamba, na vanamaundu, na vin̄ima.

²³ Mwene Solomoni watuvakanene vimyene voshe ku vufuko na mana.

²⁴ Co vanu voshe va mu kaye vezile kuli ikeye nakutolilila ku mana endi aje amwanene Njambi.

²⁵ Munu na munu wakele nakwija kuli ikeye wanenele vwana. Vivala vya siliva na ngolinde, vuzalo vwa vulaja, na vitwa, na n̄undu, na tuvalu, na vimulu. Eci calingiwile a mwaka na mwaka.

²⁶ Co Mwene Solomoni wakungulwile matemba akupwa 1,400 na tuvalu vakupwa 12,000. Co vamo wavaakele mu Yelusalema, co vaje vasaleleo wavaakele mu vinganda vyakuliseza-seza.

²⁷ A simbu yakushwana kwendi, siliva yapwile yaingi mu Yelusalema ngwe mamanya angoco, na viti vya kendale vyatumine manene ngwe viti vya malumbeni mu lifuti lya ku vushelumukilo vwa malundu lya Yunda.

²⁸ Co vaka-kulandulwila mwene vakele na nzili yakulanda tuvalu va ku Museli na ku Silisha,

²⁹ nakulanda matemba akutunda ku Ingito. Valandesele tuvalu na matemba kuli vimyene va vaHiti, na vimyene vaSilya, co valandesele matemba na mavundungulu a siliva akupwa 600 a litemba limo na limo, co na mavundungulu a siliva 150 a kavalu umo na umo.