1 Vimyene 1 - Livulu lya Shukulu Kalunga

Mwene Ndaviti a simbu ya vukulukazi vwendi

¹ Ololo Mwene Ndaviti nakuluvala laja, co nameme vangamba vendi vakele nakumufwika kambilititi, oloni kasele kuziva ntwima.

² Ngecivene, vamyata vendi vendekele kuli ikeye ngwavo, “Shukulu, tutave tukutondele mumbanda wakukala amo nove nakukunyunga. Ikeye akalala kuyehi nove nakukutwiminina.”

³ Vashakezekele mumbanda wamuvwa mu Isalele mwoshe, co vawanene mumbanda wa cifwa cangacije mu Shuneme lizina lyendi Avishange, co vamunenele kuli mwene.

⁴ Wapwile mumbanda wamuvwa manene, co wanyungile mwene nakumupangela, oloni mwene kalimwene nendi embwe.

Andoniya ashaka kushwana litanda

⁵ Co Andoniya muna Hangite walyakele ikeye vavenya ku vukama wendekele ngwendi, “Yange njikapwa mwene.” Co walivwaeselele matemba na vanu vaka-kulonda a tuvalu, na vanu makumi atanu vaka-kwenda kulutwe lwendi.

⁶ Ishe na simbu imo yai yamuluvalesele nakumwihula ngwendi, “Omwo vikajo unalingi ngacije?” Na ikeye lalo wapwile mukwenje wamuvwa manene, ikeye wakavele mu likosi lya Avisalome.

⁷ Wendekele na Yowave muna Zeluya na Aviyatale muka-kukombelela, co vakevo valizivasanene kumukwasa mu vutumbe vwendi.

⁸ Oloni Zandoke muka-kukombelela, na Mbenaya muna Yehoyanda, na Natane muka-kwimanena, na Shimei, na Lei, na vaka-kunyunga vakama va Ndaviti kuvalizivasanene kukwasa Andoniya.

⁹ Litangwa limo Andoniya wakombelele n̄ombelo ya vimanga, na vingombe, na vana va vingombe vakununa a Limanya lya Linyoka, kuyehi na Enelongele. Walanyele vakwavo vana va Mwene Ndaviti, na vamyata va mwene vaje vatundile ku muyati wa Yunda kwija ku ciwano cakukombelela,

¹⁰ oloni kalanyeleko ndolome yendi Solomoni wa ku lwale, nambe Natane muka-kwimanena, nambe Mbenaya, nambe vaka-kunyunga vakama va mwene.

Solomoni vamupwisa mwene

¹¹ Asinoni Natane waile kuli Mbateshemba, vaina ya Solomoni, co wamwihwile ngwendi, “Kuma kuwazivile ngeci Andoniya muna Hangite nalipwisa mwene, oloni Mwene Ndaviti kazivuka cuma eci ndi?

¹² Nga ushaka kwamena mwonyo wove na mwonyo wa munove Solomoni, co njikunangula muunapande kulinga.

¹³ Zambula uye kuli Mwene Ndaviti nakumwihula ngwove, ‘Shukulu, kuma kuwalisingile nange ngeci munange Solomoni ikeye akakushwana kupwa mwene ndi? Co cinaija vatijo ngeci Andoniya apwe mwene?’ ”

¹⁴ Co Natane wendekele lalo ngwendi, “Simbu ucili nakwendeka na Mwene Ndaviti, yange njikakovela nakukolesa n̄anda yove.”

¹⁵ Ngecivene, Mbateshemba waile nakumona mwene mu mulili wendi. Mwene wakuluvalele manene, co Avishange, mumbanda uje wa ku Shuneme, wakele nakumunyunga.

¹⁶ Mbateshemba wakulamesele mutwe wendi nakukandelela kulutwe lwa mwene, co mwene wamwihwile ngwendi, “Vikajo ushaka?”

¹⁷ Mbateshemba wakumbulwile ngwendi, “Shukulu, walikumiiye nakunjikulaesa mu lizina lya Shukulu Kalunga Njambi yove ngwove munange Solomoni ikeye akakushwana.

¹⁸ Kenga, Andoniya lajoko napu mwene, co yove nacimo uzivuka cai.

¹⁹ Nakombelela laja n̄ombelo ya vingombe vavangi, na vimanga, na vana va vingombe vakununa. Nalanyele ku ciwano vana vove va vanalume, na Aviyatale muka-kukombelela, na Yowave muka-kushika nzita yove, oloni kalanyeleko ngamba yove Solomoni.

²⁰ Shukulu, vanu va Isalele voshe valinakukenga kuli yove ngeci uvaleke iyajo akakushwana.

²¹ Nga kuulingimo, co omo yove utsa yange na munange Solomoni vakatuyandesa ngwe tu vitozi.”

²² Omo acili nakwendeka na mwene, co Natane wakovelele mu lipela.

²³ Valekele mwene ngwavo Natane muka-kwimanena wa Njambi naija, co Natane watsikamene a mavuli ku mesho a mwene.

²⁴ Asinoni Natane wehwile ngwendi, “Shukulu, kuma yove unendeka ngwove Andoniya ikeye akapwa mwene akatumbama a litanda lyove ndi?

²⁵ Lelo vene nai nakukombelela n̄ombelo ya vingombe vavangi, na vimanga, na vana va vingombe vakununa. Co nalanyele vana vove va vanalume voshe, na Yowave muka-kushika nzita yove, na Aviyatale muka-kukombelela. A simbu ino vene vali ku ciwano amo nendi nakutambeka ngwavo, ‘Mwene Andoniya ayoye!’

²⁶ Oloni yange ngamba yove, na Zandoke muka-kukombelela, na Mbenaya, na ngamba yove Solomoni, katulanyeleko.

²⁷ Kuma yove shukulu wavwaesa vyoshe evi kulekako yetu vamyata vove iyajo akakushwana?”

²⁸ Mwene Ndaviti wendekele ngwendi, “Lekeni Mbateshemba aije.” Co Mbateshemba wezile kuli mwene.

²⁹ Asinoni mwene wendekele kuli ikeye ngwendi, “Njilisinga mu lizina lya Shukulu Kalunga wakuyoya, uje wanjovwele ku tuyando twange twoshe,

³⁰ ngeci lelo njikanyunga cisingo cije njalisingile mu lizina lya Shukulu Kalunga, Njambi ya Isalele, ngeci munove Solomoni ikeye akanjishwana.”

³¹ Mbateshemba watsikamene nakukandelela, co wendekele ngwendi, “Shukulu yange Mwene Ndaviti ayoye ku myaka yoshe!”

³² Asinoni Mwene Ndaviti wasanene Zandoke, na Natane, na Mbenaya. Omo vezile kuli mwene,

³³ co wendekele kuli vakevo ngwendi, “Yeni na vamyata vange va mu mbanja, co endeseni munange Solomoni a cimulu cange, mushelumwiseni ku lisima lya kavwelu-vwelu ku Ngihone,

³⁴ co kuje vene Zandoke muka-kukombelela, na Natane muka-kwimanena, vakamuvwavese mazi kupwa mwene wa mu Isalele. Co imbeni lupembo nakutambeka ngweni, ‘Mwene Solomoni ayoye!’

³⁵ Co mukaveni omo akeluka kuno mukutumbama a litanda lyange. Ikeye akanjishwana kupwa mwene, omwo njinamwangula kupwa muka-kushwana Isalele na Yunda.”

³⁶ Co Mbenaya wakumbulwile mwene ngwendi, “Mukemwo cikalingiwa, Shukulu Kalunga Njambi yove akakolese cuma eci!

³⁷ Ngwe omo Shukulu Kalunga nakala amo nove shukulu, mukemwo akale amo na Solomoni nakwamesa vumwene vwendi kutuvakana vumwene vwove.”

³⁸ Ngecivene, Zandoke, na Natane, na Mbenaya, na vaka-kunyunga mwene valondesele Solomoni a cimulu ca Mwene Ndaviti, co vamushelumwisile ku lisima lya kavwelu-vwelu ku Ngihone.

³⁹ Zandoke wambatele lilulu lya mazi a olive lije lyanonele mu Mbalaka Mwakuliwanena, co wavwavesele Solomoni. Vembile lupembo, co vanu voshe vatambekele ngwavo, “Mwene Solomoni ayoye!”

⁴⁰ Asinoni vanu voshe vamukavele munima, vatambekele nakujolela nakwimba vimbendo, valingile muyoyo wakama, co livu lyajajele.

⁴¹ Omo Andoniya na voshe vaje walanyele vamanesele ciwano, vazivile muyoyo. Omo Yowave wazivile lupembo, co wehwile ngwendi, “Muyoyo wavikajo owo uli mu nganda?”

⁴² Omo kanda acimanese kwendeka, Yonatana, muna Aviyatale muka-kukombelela, wetele. Co Andoniya wamusanene ngwendi, “Ija kuno, u munalume wamuvwa, unapande kunena muzimbu wauvwa.”

⁴³ Yonatana wamukumbulwile ngwendi, “Kunjanenele muzimbu wauvwa embwe. Shukulu Mwene Ndaviti nashwanesa Solomoni kupwa mwene.

⁴⁴ Watumine Zandoke, na Natane, na Mbenaya, na vaka-kunyunga mwene kwendesa Solomoni. Co vakevo vamulondesele a cimulu ca mwene,

⁴⁵ Zandoke, na Natane vamuvwavesele mazi kupwa mwene kuje ku lisima lya kavwelu-vwelu ku Ngihone. Asinoni vakovelele mu nganda, co vatambekele nakujolela, co vanu oni valinakuliwuya. Owo ukewo muyoyo mwazivi.

⁴⁶ Solomoni ololo ikeye napu mwene.

⁴⁷ Co lalo vamyata va mu mbanja vanaile mukushangazala shukulu Mwene Ndaviti nakwendeka ngwavo, ‘Njambi yove atsimanese manene Solomoni kutuvakana yove, co aamese vumwene vwendi kutuvakana vwove.’ Co Mwene Ndaviti wakulamene a vulili vwendi nakulemesa,

⁴⁸ co walombelele ngwendi, ‘Tushangazaleni Shukulu Kalunga, Njambi ya Isalele, ou ku litangwa lya lelo nalingisa umo wa vatekulwila vange kunjishwana kupwa mwene, co nanjitavesa kuyoya ngeci njicimone!’ ”

⁴⁹ Asinoni vaje vanu vaalanyele Andoniya vazivile lyova, co voshe vakatukile nakuya, munu na munu waile ngila yendi.

⁵⁰ Andoniya, akuzivila lyova lya Solomoni, waile ku Mbalaka Mwakuliwanena, wakakwatele ku vimbinga vya mutula.

⁵¹ Co valekele Mwene Solomoni ngwavo, “Andoniya ali na lyova ali yove ngeci nakakwatele ku vimbinga vya mutula nendeka ngwendi, ‘Njishaka Mwene Solomoni alisinge kuli yange ngeci kakanjitsii.’ ”

⁵² Solomoni wakumbulwile ngwendi, “Nga ikeye napu wa kulongwa, kunjikamutsii, oloni nga kapwile wa kulongwa, co njikamutsiya.”

⁵³ Mwene Solomoni watumine munu ku mutula akashake Andoniya. Co Andoniya waile kuli mwene watsikamene nakukandelela ku mesho a mwene, co mwene wendekele kuli ikeye ngwendi, “Wasa kuya kwimbo lyove.”