1 Timateo 6 - Livulu lya Shukulu Kalunga

¹ Kuli voshe vaje vanapu vindungo vanapande kuyongola vashukulu yavo na kasingimiko koshe, ngeci naumo wai akendeka mwamuvi a lizina lya Njambi na a vilongesa vyetu.

² Vindungo vaje vanakundama kuli vashukulu yavo vaje vanapu vaka-Yesu kesi vavayeluwise omwo vakevo vanapu vakwavo. Mu ngila eyi vene, vanapande kuvapangela mwamuvwa, omwo vaje vavezika ku vipangi vyavo vanapu vaka-kukulaela vaje vavazema. Unapande kulongesa nakwambulula vyuma evi.

Vilongesa vya makuli na vufuko vwa vushunga

³ Nga woshe alongesa vilongesa vyeka, co kalitombola na vushunga vwa lijwi lya Mwene yetu Yesu Kilistu na vilongesa vya vu Njambi vwetu

⁴ co munu wa ngacije napu muka-kulyalesa, co kazivuka cuma nacimo cai. Napu muka-kuvinja mu mashungu na vimata vyakulikanangana a majwi, co evi vilinakunena mafuwa na vimata na kushaula na viyongola vyavivi

⁵ na vimata simbu yoshe kuli vanu vaje mana avo kuwesi kupanga, co kuvesi na vushunga. Vayongola ngwavo ngila ya vu Njambi ikeyo yapwa yakufukisa.

⁶ Eyo, vu Njambi vwasa kutufukisa, nga yetu tupwisamo na vyuma vije tulinavyo.

⁷ Vikajo twezile navyo muno mu kaye? Nacimo cai! Cuma mukajo tukambata ano a kaye? Nacimo cai!

⁸ Ngecivene, nga tuli na vyakulya na vuzalo, evi vinapumo kuli yetu.

⁹ Oloni vaje vashaka kufuka vawila mu ceseko, co vanakwatiwa mu mweto wa mashungu amangi a vulema akuvulumuna, aje alinakuvakokela kukunyonga nakukuziluka.

¹⁰ Omwo cizemo ca vimbongo cinapu nsina ya miyati yoshe ya vuvi. Vamo vanakele na mashungu a nzili ngeci vakele navyo, mukulinga ngacije vanatundu kukukulaela kwavo, co vanapokola vimbunge vyavo na vusiwa vwavungi.

Vilongesa vya Paulu

¹¹ Oloni ali yove munu wa Njambi, tewa vyuma vyoshe vije. Kavangeya vushunga na vu Njambi nakukulaela na cizemo na lukakateya na kwoloka.

¹² Lwa nzita yaivwa yakukulaela, nganyala mwonyo wa myaka yoshe, uje wakusanenene Njambi omo walitavelele ku mesho a vakaleo vavangi.

¹³ Ku mesho a Njambi, uje muka-kwana mwonyo ku vyuma vyoshe na ku mesho a Kilistu Yesu, uje waanene vukaleo vwendi ku mesho Pontiyu Pilato, njikushika ngwange,

¹⁴ ononoka ku mashiko nakuwanyunga na kulongwa noo a Litangwa lije omo Mwene yetu Yesu Kilistu akasholoka.

¹⁵ Njambi akamusholola a simbu ije ikapwa yaivwa, Ikeye Muka-kushika umolika, Mwene ya vimyene na Shukulu ya vashukulu.

¹⁶ Ikeye lika kesi kutsa, wayoya mu ceke cije naumo wai asa kushwenyako. Naumo wai wamumona naumo wai asa kumumona. Kuli ikeye kukale kasingimiko na nzili ya myaka yoshe! Ewa.

¹⁷ Shika vaje vanafuku mu vyuma vya mwonyo ou ngeci kesi valyalese, oloni vaake cinyangavili cavo, kesi mu vyuma vya cifwa ca vufuko, oloni muli Njambi, uje muka-kushemutwisa vyuma vyoshe kuli yetu ngeci tuvivwaelele.

¹⁸ Vashike kulinga mwamuvwa, kupwa vaka-kufuka mu vipangi vyavivwa, vapwe vaka-kushemutuka nakulivwaesela kwanako vakwavo veka lalo.

¹⁹ Mu ngila eyi vene vakalitulikila vakevo vavenya vufuko vuje vukapwa luvula lwakukola lwa kulutwe. Co asinoni vakasa kuwana mwonyo, mwonyo uje unapu wa vushunga.

²⁰ Ove Timateo, nyunga mwamuvwa vije vanakundika ku vunyungi vwove. Ongoloka visimutwiya vyangoco vya vu Njambi na vimata vya vulema vije vamo vanu vavitumbula mu ngila kesi ikeyo ngwavo “Mana.”

²¹ Omwo vamo ngwavo valinawo, co omwo a cuma eci vanazimbalesa kukulaela kwavo. Kutetela kwa Njambi kukale neni voshe.