1 Timateo 5 - Livulu lya Shukulu Kalunga

Vipangi vyeni kuli vaka-kukulaela

¹ Kesi uluvalese mukulunu, oloni munangule ngwe isho. Pangesa vakwenje ngwe vishongo vyove,

² na vakulunu va vanakazi ngwe vanyoko, na vambanda ngwe vandokazi vove, mukujela mwoshe.

³ Sholola kasingimiko kuli vifwile vaje vanapu vifwile vene.

⁴ Oloni nga fwile ali na vana nambe vatekulu, vanapande akulivanga vanapande kulilongesa kupanga vipangi vyakukulalela kwavo ku naanga yavo, co mu ngila eyi vakevo lalo vanapande kukwasa visemi vavo na vakukulwila vavo, omwo omu mukemwo mukavwaelelesa Njambi.

⁵ Fwile uje alinakuyoya endi lika, uje kesi na uje mukakumulela, uje naaka cinyangavili cendi muli Njambi na kukakateya mukulombela vutsiki na mutanya ngeci amukwase.

⁶ Oloni fwile uje alyana ikeye vavenya mu senga yangoco natsi laja, nambe alinakuyoya.

⁷ Valeke mashiko awa, ngeci kesi kukakale umo avane mulonga.

⁸ Oloni nga umo kasa kunyunga vavushoko vwendi, vunene kuli vanu vaka-naanga yendi, navyana kukulaela, navihya kutuvakana uje kesi muka-kukulaela.

⁹ Kesi uwezeleleko vifwile veka lalo ku mukana wa mazina a vifwile kuvanga ikeye natuvakana myaka makumi atanu na limo ku vukulunu vwendi. Mukuwezelelako, napande kupwa munakazi wa munalume umolika,

¹⁰ co ali na lutsimo lwa vilinga vyavivwa, munakazi uje nalele vana vendi mwamuvwa, muka-kutambula vangenzi ku njuvo yendi, muka-kulinga vilinga vya kulikeesa kuli vakwavo vaka-Yesu, nakukwasa vaje vali mu tuyando nakulikundika ku vipangi vyavivwa.

¹¹ Oloni kesi uwezeleleko vifwile vacili vambanda ku mazina awa lalo, omwo vakevo vacili na cizango cakushaka kushomboka, co vakaseza Kilistu,

¹² co vakapwa vaka-milonga nakupokola mashiko avo alizivasano lyavo lyakulivanga.

¹³ Co lalo vanalilongesa kumbila simbu yavo mukwendangana ku njuvo na njuvo, oloni nameme ngoco, vanalilongesa lufwe nakulikovelesa mu vyuma vyambala, nakwendeka vyuma vije kuvyavapandele kuvyendeka.

¹⁴ Ngecivene, njishaka ava vifwile vacili vambanda vashomboke, ngeci vakele na vana, nakunyunga vinjuvo vyavo, ngeci kesi twane mwela kuli vitozi vetu a kwendeka vyuma vyavivi ali yetu.

¹⁵ Omwo vifwile vamo vaneluka laja munima nakukavangeya Satana.

¹⁶ Oloni nga munakazi umo muka-Yesu ali na vifwile mu naanga yendi, napande kuvalela, co kesi atwike citele ku cikungulukilo, ngeci cikungulukilo cilele lika vifwile vaje kuvesi na ava vavalela.

¹⁷ Vakulunu vaje valinakupanga mwamuvwa ngwe vantwama vanapande kuvayongola na kasingimiko kakama, vunene kuli vaje valinakuundangana mukwambulula nakulongesa.

¹⁸ Omwo visoneka vyendeka ngwavyo, “Kesi ukute kanwa ka ngombe uje mupangesa mukujungula tiliku,” na “Muka-kupanga napande kutambula fweto yendi.”

¹⁹ Kesi utolilile vukaleo vwakulwisa mukulunu wa cikungulukilo kuvanga vavunene kuli vanu vavali nambe vatatu.

²⁰ Voshe vaje valinakulinga vuvi vavendekele ku mesho a vanu mutanya mwelu, ngeci vaje vanasalao vazive lyova.

²¹ Ku mesho a Njambi na ku mesho a Kilistu Yesu na ku mesho a tungelo vakujela njilinakukushika ngwange unapande kwononoka vilongesa evi kujeneka kumwesa cizemo kuli umo na civembulu kuli mukwavo, nambe kesi usompe na cin̄asi ali umo a cuma cimo yove ulinakucilinga.

²² Kesi uzambule vwasi-vwasi kukambeka mavoko ali vanu mukuvakundika ku vipangi vya Mwene. Kesi ulipandakane mu vuvi vwa vanu veka, linyunge yove vavenya nakulijelesa.

²³ Kesi unwe mema like embwe, oloni pandakanako tumo tu vinyu vikwase mwimo lyove omwo kumwesi kupanga mwamuvwa omwo a simbu na simbu ulinakuvinja.

²⁴ Vuvi vwa vanu vamo vunasholoka mwamuvwa anja, co vivi vyavo vulinakuvashwenyesa kukusompa, oloni vuvi vwa vamo veka vukasholoka akukotoka.

²⁵ Mu ngila imolika, vilinga vyavivwa visholoka mwamuvwa anja, co nambe vivanda oloni kuvikasa kuvanda.