1 Timateo 4 - Livulu lya Shukulu Kalunga

Valongisi va makuli

¹ Munzinzime alinakwendeka nakutungukwa ngwendi vanu vamo a simbu yakukotoka vakaseze kukulaela kwavo, vakononoka minzinzime ya makuli nakukavangeya vilongesa vya minzinzime yakujwala.

² Vilongesa evi vilinakutunda kuli vanu vaka-kuseveleka na vaka-makuli, vaje vitaku-taku vyavo vinatsi, ngwe vyakwenyeka na cikuvo ca tuhya.

³ Vanu va cifwa cangacije valinakulongesa ngwavo kesi mwamuvwa kwambata nakulya vyakulya vimo. Oloni Njambi ikeye watangele vyakulya evi ngeci vavilye, omo munalombela lilombelo lyakukandelela, kuli vaje vaka-kukulaela vaje vanete akuzivuka vushunga.

⁴ Omwo vyuma vyoshe vije vyanatanga Njambi vinapu vyavivwa, nacimo twasa kuvyana cai, oloni vyoshe twasa kuvitambula na lilombelo lyakukandelela,

⁵ omwo vanavikundika a lijwi lya Njambi na a kulombela.

Ngamba wamuvwa wa Kilistu Yesu

⁶ Nga ulongesa vakweni vyuma evi, ukapwa ngamba wamuvwa wa Kilistu Yesu, ulinakulilisa yove vavenya vyuma vya munzinzime a lijwi lyakukulaela nakulongesa kwa vushunga kuje ulinakukavangeya.

⁷ Oloni litenge ku visimo vyangoco, vije kuvyapandelemo kuvyambulula. Linyunge yove vavenya mukuyoya kwa vu Njambi.

⁸ Omwo akupangesa muvila cili na seo kamandondo, oloni kupangesa vya munzinzime vili na seo yakama manene mu vyuma vyoshe, omwo muvuvali vwavyo vikulaesa kuyoya kwa lelo nakuyoya kwa kulutwe.

⁹ Evi vinapu vyendeka vya vushunga, ngeci tuvitambule mwamuvwa nakuvikulaela.

¹⁰ Omwo tuundangana nakupanga manene na nzili, omwo tunaaka cinyangavili cetu muli Njambi wakuyoya, uje napu Muyoyesi wa vanu voshe, vunene kuli vaje vakulaela.

¹¹ Vashike nakuvalongesa vyuma evi.

¹² Kesi utave munu umo ashaule vukwenje vwove, oloni unapande kupwa cimweso kuli vaka-kukulaela mu endekesi yove, mu futisi yove, mu cizemo cove, mukukulaela kwove na mukujela kwove.

¹³ Ana simbu yove kukulava lijwi kuli vanu na kukwambulula na kukulongesa, noo njikaija.

¹⁴ Kesi wecele vwana vwa munzinzime vuje vuli muli yove, vuje vuvakwanene omo vaka-kwimanena vendekele nomo vakulunu vakambekele mavoko avo ali yove.

¹⁵ Panga manene a vyuma evi, co lilambule yove vavenya ku vyuma evi, ngeci vipangi vyove visholoke kuli voshe.

¹⁶ Linyunge yove vavenya, co lalo ilula vilongesa vyove. Twalao nakulinga vyuma evi, omwo nga yove ulinga vyuma evi, ukalyamena yove vavenya na vaje vakakutolilila.