1 Timateo 3 - Livulu lya Shukulu Kalunga

Vantwama va mu cikungulukilo

¹ Evi vinapu vyendeka vya vushunga, nga munu umo ashungwiya vipangi vya vuntwama mu cikungulukilo ikeye ashaka vipangi vyavivwa.

² Ntwama wa cikungulukilo napande kupwa munu wakujeneka mulonga, napande kupwa munalume wa munakazi umolika, kesi muka-kunwa vyakupendesa, muka-kulinyunga, muka-kulongwa, napande kujumbula vangenzi ku njuvo yendi, uje asa kulongesa vakwavo,

³ kapandele kupwa muka-kupenda nambe kupwa munu muka-lwozi, oloni apwe muka-lyovwa-ovwa na kwoloka, kapandele kupwa muka-kuzema vimbongo,

⁴ ikeye napande kupwa muka-kunyunga naanga yendi mwamuvwa na vana vendi vapwe vaka-kumwononoka na kasingimiko koshe.

⁵ Omwo nga munu kasa kunyunga naanga yendi, co vatijo akasa kulela cikungulukilo ca Njambi?

⁶ Kapandele kupwa munu uje nakulaela ololo, kutewa akalyalesa, co akavindama, ngwe mwalingile Liyavola.

⁷ Napande kupwa munalume wa kasingimiko kuli vanu vaje vali anja ya cikungulukilo, ngeci kesi azive shwamwa nakuwila mu mweto wa Liyavola.

Vakwasi va mu cikungulukilo

⁸ Vakwasi va mu cikungulukilo lalo vanapande kupwa va futisi yaivwa na kasingimiko, kuvapandele kupwa vaka-kunwa manene vinyu nambe vapwe vaka-cipululu ca vimbongo,

⁹ vanapande kukakateya vushunga nakusholoka kukulaela na citaku-taku cakutungukwa.

¹⁰ Vanapande kuvelula akulivanga, asinoni, nga vakevo vakumbulula mwamuvwa, co vanapande kupanga.

¹¹ Vanakazi vavo vanapande kupwa va futisi yaivwa, kesi vaka-lufwe, kesi vapwe vaka-kunwa vyakupendesa, oloni vapwe vaka-vushunga mu vyuma vyoshe.

¹² Mukwasi wa cikungulukilo napande kupwa muka-munakazi umolika, uje asa kunyunga vana vendi mwamuvwa amo na naanga yendi.

¹³ Omwo vaje vakwasi vapanga vipangi vyavo mwamuvwa vawanenamo lutsimo lwaluvwa, co vasa kwendeka nakusimpa akukulaela kwavo muli Kilistu Yesu.

Cisin̄iko cakama-kama

¹⁴ Omo njilinakusoneka ou mukanda kuli yeni, njili na cinyangavili cakwija kuli yeni vwasi nakumimona.

¹⁵ Oloni nga njishwala, ou mukanda ukewo wakumileka ngeci muzivuke vati futisi yetu inapande kupwa ku vanu mu naanga ya Njambi, ikeyo cikungulukilo ca Njambi wakuyoya, manda na vwimaneno vwa vushunga.

¹⁶ Naumo wai asa kuvyana a vukama vwa cisin̄iko ca vu Njambi vwetu! Uje washolokele mu cifwa ca vunu, Munzinzime wamusholwele kupwa wa vushunga, na tungelo vamumwene. Vamwambulwile akati ka miyati, vamukulaelele mu kaye mwoshe, co vamutwalele mwilu.