1 Timateo 2 - Livulu lya Shukulu Kalunga

Kulemesa kwa mu cikungulukilo

¹ Ngecivene, akulivanga, njimisindiya ngwange lambeleleni, lombeleni, kwihula, kulomba na kukandelela vanapande kuvyana kuli Njambi ali vanu voshe,

² na ali vimyene na ali voshe vaje valinakushika, ngeci tuyoye mwamuvwa mu kwoloka na kasingimiko koshe kuli Njambi amo na vilinga vyavivwa.

³ Evi vinapu vyavivwa, co vivwaelelesa Njambi Muyoyesi wetu,

⁴ uje ashaka ngeci vanu voshe vovoke nakweta kukuzivuka vushunga.

⁵ Omwo kwali Njambi umolika, co kwali uje alinakunena Njambi na vanu amolika, munu ikeye Kilistu Yesu,

⁶ uje walyanene ikeye vavenya kupwa ndando yakupatula vanu voshe. Vuje vwapwile vukaleo a simbu yaivwa ngeci Njambi washakele vanu voshe vovoke,

⁷ omwo eci cikeco cuma vanjangwilile kupwa muluwa na mulongisi kuli vaje kesi vaYunda, nakwambulula lijwi lyakukulaela na lya vushunga. Kunjendeka makuli embwe, njilinakumileka vushunga!

⁸ Yange njishaka vanalume ngeci valombele, vanalume vaje vanalyana kuli Njambi, co vasa kujundula mavoko avo kwilu nakulomba kujeneka kuluvala nambe vimata.

⁹ Co njishaka lalo vanakazi vapwe vaka-kumwesa kulikeesa na mana avo a vuzalo vwavo, co vanapande kuzala mwamuvwa, kesi na vin̄ambu vyakuvinda mweka na mweka, nambe na ngolinde nambe yavuvwa vweka, nambe na makwalale akuvwaa manene, nambe na vinanga vyandando yakama,

¹⁰ oloni na vilinga vyavivwa, ngwe mucinapande kuli vanakazi vaje vanapu vaka-kukulaela.

¹¹ Vanakazi vanapande kulilongesa na kwoloka kuluu na kulikeesa kwoshe.

¹² Kunjitava ngeci vanakazi valongese nambe kushika akati ka vanalume embwe, vanapande kwoloka kuluu.

¹³ Omwo Andama ikeye vatangele akulivanga, co asinoni Eva.

¹⁴ Co kesi Andama uje vakwisile embwe, oloni munakazi ikeye vakwisile, co wapokwele lishiko lya Njambi.

¹⁵ Oloni munakazi vakamwamena akukita vana, nga akakateya mukukulaela na mu cizemo na mukujela na kasingimiko.