1 Tesalonika 5 - Livulu lya Shukulu Kalunga

Livwaeseleni cimweja akwija kwa Mwene

¹ Vasamba, kutwapandele kumisonekela a visimbu na myaka omo vyuma evi vikalingiwa.

² Omwo yeni vavenya mwazivuka ngweni Litangwa lya Mwene likaija ngwe mwizi omo akaija a simbu ya vutsiki.

³ Omo vanu vendeka ngwavo, “Vyuma vyoshe vili mwamuvwa kunoloka kuluu,” asinoni vwasi-vwasi kunyonga kuvawana! Kukaija vwasi-vwasi ngwe mushongo ali munakazi ashaka kukita, co vanu kuvakasa kuputumuka.

⁴ Oloni yeni vasamba vange, kumwesi mu lisusulungu, co Litangwa lije kesi likamikasumune ngwe mwizi.

⁵ Yeni voshe mwapwa vanu vaje vanakundama ku ceke, vaje vanakundama ku mutanya. Yetu kutwakundamene ku vutsiki nambe ku lisusulungu embwe.

⁶ Ngecivene, kutwapandele kulala tulo ngwe veka, tunapande kutona nakulikongomeka.

⁷ Ikapu simbu ya vutsiki omo vanu valala tulo, ikapu simbu ya vutsiki omo vanu vakapende.

⁸ Oloni yetu twakundama ku mutanya, co tunapande kulikongomeka. Tunapande kuzala kukulaela na cizemo ngwe ntelo ya a nulo, nakuzala cinyangavili cakwovoka kwetu ngwe tepa.

⁹ Njambi katwangwile kuyandela vukalu vwendi embwe, oloni tukatambule kwovoka ali Mwene yetu Yesu Kilistu,

¹⁰ uje watutsililile ngeci tukayoye amolika nendi, nambe tuyoya nambe tutsa omo akaija.

¹¹ Ngecivene, litakameseni umo na mukwavo nakulikwasa umo na mukwavo, ngwe muje mumuli nakulinga ololo.

Vilongesa vyakumanesela na viindu

¹² Vakwetu, tumilomba ngwetu aneni kasingimiko kakavwa kuli vaje valinakupanga akati keni, vaje vamitwamenena nakuminangula mukuyoya kwa vuka-Yesu.

¹³ Pangeni navo na kasingimiko kakama na cizemo, omwo a vipangi vije valinakulinga. Pweni vaka-kwoloka akati keni.

¹⁴ Vakwetu, tumisindiya ngwetu munangule volwa, takameseni vipapoki, kwaseni vaka-kuzeya, pweni vaka-lukakateya kuli voshe.

¹⁵ Kengeni ngeci kesi kukale umo elwisa vuvi ku vuvi, oloni simbu yoshe pweni vaka-kulinga mwamuvwa kuli umo na mukwavo na kuli vanu voshe.

¹⁶ Pweni vaka-kujolela simbu yoshe,

¹⁷ lombeleni simbu yoshe,

¹⁸ kandeleleni mu visimbu vyoshe. Eci cikeco cashaka Njambi mukuyoya kweni muli Kilistu Yesu.

¹⁹ Kesi muzime Munzinzime Wakujela,

²⁰ kesi mwombwanese lijwi lya Njambi.

²¹ Pweni vaka-kweseka vyuma vyoshe, co nyungeni vije vinapu vyavivwa,

²² co teweni vyuma vyoshe vyavivi.

²³ Njambi uje muka-kutwana kwoloka amipwise vaka-kujela mu vyoshe, co anyunge vunu vweni vwoshe, munzinzime, na mwonyo na muvila, kujeneka milonga yoshe akwija kwa Mwene yetu Yesu Kilistu.

²⁴ Uje namisana akacilinga, omwo wapwa wa kulongwa.

²⁵ Vakwetu, netu tulombeleleni lalo.

²⁶ Indwiseni voshe vaka-kukulaela nakulitsemba kwa kwoloka.

²⁷ Njimilambelela na moko ya Mwene kulava mukanda ou ku mesho a vaka-kukulalela voshe.

²⁸ Kutetela kwa Mwene yetu Yesu Kilistu kukale amo neni.