1 Tesalonika 4 - Livulu lya Shukulu Kalunga

Kuyoya kuje kuvwaelelesa Njambi

¹ Mukumanesela, vasamba vetu, mwalilongesele kuli yetu vati munapande kuyoya ngeci muvwaelelese Njambi. Mwa vushunga vene, omu mukemwo mumunakala nakuyoya. Co ololo tumilomba nakumisindiya mu lizina lya Mwene Yesu ngwetu muwezeleleko manene.

² Omwo mwazivuka vilongesa vitwamilongesele na moko ya Mwene Yesu.

³ Njambi ashaka ngeci mupwe vakujela nakupatuka ku vupangala.

⁴ Munu ku munu kuli yeni vanalume azivuke vati napande kuyoya na munakazi wendi mu ngila yakujela na kalemeso,

⁵ kesi na mashungu amavi, ngwe vaka-kujeneka kukulaela vaje kuvazivuka Njambi.

⁶ Mu cifwa eci vene, naumo wai weni napande kulinga mwamuvi kuli vakwavo vaka-Yesu nambe kuvanyanyamena. Twamilekele laja cuma eci, co twaminangwile na nzili ngwetu Mwene akanyanyamesa vaje voshe valinakulinga ngacije.

⁷ Omwo Njambi katusanene ngeci tuyoye mu vupangala embwe, oloni mukujela.

⁸ Ngecivene, woshe uje avyana vilongesa evi kavyana munu, oloni alinakuvyana Njambi, uje akamyana Munzinzime wendi Wakujela.

⁹ Kutwapandele kumisonekela a cizemo kuli umo na mukwavo. Omwo yeni vavenya Njambi wamilongesele vati munapande kulizema umo na mukwavo.

¹⁰ Co munakala nakulinga ngeci kuli vaka-kukulaela voshe mu Masendoniya mwoshe. Ngecivene, tumilomba vakwetu, wezeleleniko manene.

¹¹ Pweni vaka-kuyoya mu kwoloka, akeni mana eni ku vyuma vyeni, nakupanga vyakulikwasa navyo yeni vavenya, ngwe muje twamilekeke laja.

¹² Mu ngila eyi vene, mukatambula kasingimiko kuli vaje kesi vaka-kukulaela, co kumukayoyela ali munu umo kuli vije munajeneka.

Kwija kwa Mwene

¹³ Vakwetu, tushaka muzivuke vushunga ali vaje vanatsi, ngeci kesi mukale na vusiwa, ngwe vaje kuvesi na cinyangavili.

¹⁴ Omwo tunakulaela ngwetu Yesu watsile, co wasangukile lalo, co tunakulaela ngwetu Njambi akanena amo na Yesu vaje vatsile mukukulaela kuli ikeye.

¹⁵ Evi tumilongesa ololo vinapu vilongesa vya Mwene ngeci, yetu tucili nakuyoya a litangwa lije Mwene akaija kutukatwama kulutwe lwa vaje vatsile laja.

¹⁶ Kukakala mutambi wa lijwi lyakama lyakushika, lijwi lya kangelo wakama, nakwoya kwa lupembo lwa Njambi, co Mwene ikeye vavenya akashuluka kutunda mwilu. Co vaje vatsile mukukulaela kuli Kilistu vakasangukila ku mwonyo akulivanga,

¹⁷ asinoni yetu tucili nakuyoya a simbu ije vakatukungulwila amo navo mu mashelwa nakuliwana na Mwene a mukambwila. Co tukakala amo na Mwene simbu yoshe.

¹⁸ Ngecivene, litakameseni umo na mukwavo na majwi awa.