1 Tesalonika 3 - Livulu lya Shukulu Kalunga

¹ Akukotoka, omwo kutwasele kutwalao lalo, twayongwele ngeci vatuseze mu Atena etu lika.

² Omo twacitumine Timateo, ndolome yetu muka-kupanga netu mu vipangi vya Njambi mukwambulula Vin̄anda Vyavivwa vya Kilistu. Twamutumine mukumitakamesa nakumikwasa akukulaela kweni,

³ ngeci naumo wai wa ali yeni akeluke munima omwo a mapakeso awa. Yeni vavenya mwazivuka ngweni mapakeso awa anapu a ku cizango ca Njambi ali yetu.

⁴ Omwo a simbu ije twakele amo neni, twamilekelele cimweja ngwetu tukawana mapakeso, ngwe mumwazivukila, evi vikevyo vyalingiwile.

⁵ Eci cikeco cinjatuminine Timateo. Omwo kunjasele kutwalao lalo, ngecivene, njamutumine akumone vati kukulaela kweni mucinafu. Mwa vushunga vene kucapwile ngeci Liyavola namyeseka, co vipangi vyetu vyoshe vinai mwangoco!

⁶ Oloni ololo Timateo neluka kuno, co natwambulwila muzimbu wauvwa akukulaela kweni na cizemo ceni. Natuleka ngwendi simbu yoshe mulinakutwanuka, co mulinakushaka kutumona ngwe yetu tulinakushaka kumimona.

⁷ Omwo a cuma eci, mu tuyando twetu twoshe na n̄avava twakele nakulitakamesa omwo ali yeni vakwetu. Kukulaela kweni kukekwo kwatutakamesele,

⁸ omwo ololo tulinakuyoya nga yeni mwimana mbe mukuyoya kweni muli Mwene.

⁹ Ololo twasa kukandelela kuli Njambi omwo yeni. Tulinakumukandelela akujolela kuje tulinakwo ku mesho endi omwo yeni.

¹⁰ Mutanya na vutsiki tulinakumulomba na vimbunge vyetu vyoshe ngeci atutave kumimona mesho na mesho nakumyana vije vimunajeneka mukukulaela kweni.

¹¹ Njambi yetu na Tatetu na Mwene yetu Yesu atuvwaesele ngila ngeci twije nakumimona!

¹² Mwene akolese cizemo ceni kuli umo na mukwavo na kuli vanu voshe nakucipwisa cakama ngwe cizemo cetu kuli yeni.

¹³ Mu ngila eyi akamitakamesa, co mukapwa vakulambasa na vaka-kujela ku mesho a Njambi yetu na Tatetu omo Mwene yetu Yesu akaija na voshe vaje vanakundama kuli ikeye.