1 Tesalonika 2 - Livulu lya Shukulu Kalunga

Vipangi vya Paulu mu Tesalonika

¹ Vakwetu, yeni vavenya mwazivuka ngweni kuma kwija kwetu kuli yeni kukwapwile kwangoco embwe.

² Oloni mwazivuka muvatuyandesele nakutushaula mu Filipu simbu kanda twije kuli yeni mu Tesalonika. Co nambe kwakele kutulwisa kwakama, Njambi yetu watutakamesele mukumyambulwila Vin̄anda Vyavivwa vyakutunda kuli ikeye.

³ Kulombela kwetu kuli yeni kukwemanene a vutumbe vwakusevwisa nambe a matumbe amavi, nambe kukwisa munu umo.

⁴ Oloni visimbu vyoshe tulinakwendeka ngwe muje Njambi ashaka ngeci tulinge, omwo natusompela yetu ngeci twafwilamo kwambulula Vin̄anda Vyavivwa. Kutushaka kweseka kuvwaelelesa vanu, oloni kuvwaelelesa Njambi, uje muka-kweseka vimbunge vyetu.

⁵ Omwo mwazivuka mwamuvwa ngweni kutwezile kuli yeni mukwendeka vyakuseveleka, nambe kwendeka majwi akumifwikafwika a mbunge ya cipululu, Njambi ikeye mukaleo wetu!

⁶ Kutwashakele ngeci vatushangazale kuli munu umo embwe, nambe kuli yeni nambe kuli veka,

⁷ nambe ngwe miluwa va Kilistu twasele kumyana citele. Oloni twapwile tu vaka-lyovwa-ovwa omo twakele neni amo, ngwe lyovwa-ovwa lya cisemi wa munakazi omo alinakulela vana vendi vene.

⁸ Omwo a cizemo cetu kuli yeni twalivwaeselele ngeci tulipangele neni amo, kesi lika Vin̄anda Vyavivwa vyakutunda kuli Njambi oloni na myonyo yetu lalo. Omwo yeni munapu vaje vatwazema manene!

⁹ Mwa vushunga vene anukeni, vakwetu, vati twapangele nakuundangana! Twapangele vutsiki na mutanya ngeci kesi tupwe citele kuli yeni omo twambulwile Vin̄anda Vyavivwa vyakutunda kuli Njambi.

¹⁰ Yeni munapu mu vakaleo vetu, na Njambi lalo, ngeci mu myonyo yetu ku mesho eni vaka-kukulaela yapwile yakujela, ya vushunga na yakujeneka mulonga.

¹¹ Mwazivuka ngeci yetu twapangesele umo na umo weni ngwe visemi vapangesa vana vavo vavenya.

¹² Twamitakamesele, twamizembelekele, twamisindiiye kuyoya yoyesi ije ivwaelelesa Njambi, uje alinakumisana ngeci mulipangele amo Vumwene vwendi vavenya na vumpau.

¹³ Co kuli cuma cikwavo lalo omwo vikajo simbu yoshe tukakandelela kuli Njambi. Omo twaminenelele lijwi lya Njambi, yeni mwalizivile nakulitambula, kesi ngwe lijwi lyakutunda kuli vanu oloni ngwe lijwi lya Njambi, Lije linapu lijwi lya Njambi vene. Omwo Njambi alinakupanga akati keni vaje vanakulaela.

¹⁴ Vakwetu, vyuma vyalingiwile kuli yeni ngwe vije vyalingiwile ku vikungulukilo vya Njambi mu Yundeya, kuli vanu kuje vaje vanakundama kuli Kilistu Yesu. Mwayandele na mapakeso a cifwa cimo aje atundile kuli vanu veni aje vakevo vayandele kuli vaYunda,

¹⁵ vaje vatsiile Mwene Yesu na vaka-kwimanena, nakutupakesa yetu. Vakevo kuvesi nakuvwaelelesa Njambi! Vapwa vitozi kuli vanu voshe!

¹⁶ Vesekele kutuvindika kwambulula lijwi kuli vaje kesi vaYunda ngeci na vakevo vatambule kwovoka. Mu ngila eyi vene vakevo vanashulisa vene seteko ya vivi vije vivalingile simbu yoshe. Co ololo vukalu vwa Njambi akukotoka vunaija ali vakevo!

Cizango ca Paulu cakuvamona lalo

¹⁷ Ngwe ali yetu, vakwetu, omo twalyangunukile neni kasimbu kakandondo lika, kesi mu viyongola vyetu embwe, oloni mu muvila lika, twamijenekele, co twaundanganene nakweseka kumimona lalo!

¹⁸ Twashakele kwiluka kuli yeni. Yange vene njesekele manene kwiluka lwalungi, oloni Satana katutavesele.

¹⁹ Ngecivene, munapu yeni, kesi veka embwe, vaje vanapu cinyangavili cetu nakujolela kwetu na kulyalesa kwetu akuhyana ku mesho a Mwene Yesu omo akaija.

²⁰ Mwa vushunga vene, yeni munapu kulyalesa kwetu nakujolela kwetu!