1 Samwele 8 - Livulu lya Shukulu Kalunga

Vanu va Isalele valomba kukala na mwene

¹ Omo Samwele nakuluvala, waangwile vana vendi kupwa maako mu Isalele.

² Munendi wa ntwatwa wamulukile lizina lyendi Njwele, co wamucivali wamulukile lizina lyendi Aviya, vakevo vapwile maako mu Mbeleshemba.

³ Oloni kuvendele mu vingila vya ishavo, vakele nakuvwaelela lika na vimbongo, ngecivene, vakele nakutambula vimbongo vya lizika-kanwa, kuvakele nakusompa vin̄anda mu vushunga.

⁴ Asinoni vantwama voshe va Isalele valikungulwile amo, co vaile kuli Samwele ku Lama,

⁵ vendekele kuli ikeye ngwavo, “Kenga, ololo unakuluvala, co vana vove kuvesi nakwenda mu vingila vyove embwe. Ngecivene, twangwile mwene uje akatushwana ngeci tufwe ngwe miyati yeka.”

⁶ Samwele kavwaelelele a cihula cavo caali mwene, ngecivene, ikeye walombelele kuli Shukulu Kalunga,

⁷ co Shukulu Kalunga wendekele ngwendi, “Tolilila ku vyuma vyoshe vije vivendeka vanu kuli yove. Kesi yove ivanavyana embwe, oloni vanavyana yange kupwa mwene yavo.

⁸ Tunde aje njavatundisile mu Ingito, vananjikengesa nima, co valinakulemesa vinjambi veka, ololo evi vivalinga kuli yove vikevyo vije vakele nakulinga kuli yange.

⁹ Ngecivene, vatolilile, oloni vanangule manene uvaleke cifwa ca mwene uje akavashwana.”

¹⁰ Co Samwele wambulwile kuli vanu vaje vamulombele mwene vyuma vyoshe vije vyamulekele Shukulu Kalunga.

¹¹ Samwele wavanungulwilile ngwendi, “Eci cikeco cifwa ca mwene uje akamishwana. Akakwata vana veni va vanalume nakuvapwisa mashwalale, co akati ka vanu vaje, vamo vakapanga ku matemba endi a nzita, co vakwavo ku maunzi a vinzita.

¹² Co akapwisa vamo kushika vanu 1,000, vamo kushika makumi atanu a vanu. Co vana veni va vanalume vakalima mahya endi, na kuteja vimbuto vyendi, co vakapanga vitwa vya nzita, na vivala vya matemba.

¹³ Vana veni va vanakazi vakapwa vaka-kupanga vyuma vyakunika lwengo, co vakapwa vaka-kumutelekela nakumwocela makende.

¹⁴ Co akambata mahya eni, na vitungu vyeni vya mikolovozi ya vushuka vwa vinyu, na miti ya olive, akavyana kuli vamyata vendi.

¹⁵ Co akambata camulikumi ku vimbuto vyeni, na ku vitungu vyeni vya mikolovozi ya vushuka vwa vinyu, co akavyana kuli vamyata vendi, na vangamba vendi.

¹⁶ Akambata vangamba veni va vanalume na ava va vanakazi, na vingombe veni, na vimulu veni vavavwa, co vakamupangela.

¹⁷ Akambata camulikumi ku matanga eni. Co mukapwa vindungo vendi.

¹⁸ A litangwa lije, mukatatoka manene omwo mwene yeni uje imunalyangwila, oloni Shukulu Kalunga kakatolilila kukulinyenga kweni embwe.”

¹⁹ Oloni vanu vavyanene majwi endekele Samwele, vendekele ngwavo, “Embwe! Yetu tushaka mwene,

²⁰ netu tufwe ngwe miyati yeka, tushaka mwene yetu atushwane nakututwamenena ku nzita nakutulwila ku vinzita vyetu.”

²¹ Omo Samwele wazivile vyuma vyoshe vakele nakwendeka vanu, waile wakalekele Shukulu Kalunga.

²² Co Shukulu Kalunga wamukumbulwile ngwendi, “Linga vyoshe vije vivashaka, vaane mwene.” Asinoni Samwele walekele vanalume voshe va Isalele kwiluka ku membo avo.