1 Samwele 6 - Livulu lya Shukulu Kalunga

Cikasa ca Cikumiiyo ciiluka ku Isalele

¹ Munima yevi, omo Cikasa ca Cikumiiyo ca Shukulu Kalunga cakele mu Filisitiya vingonde vitanu na vivali,

² co vanu vasanene vaka-kukombelela na vaka-manseno, vavehwile ngwavo, “Vatijo tulinga na Cikasa ca Cikumiiyo ca Shukulu Kalunga? Nga tuciilwisa kuje kucakele, co tukaciilwisa mu ngila ikajo?”

³ Co vakumbulwile ngwavo, “Nga mwilwisako Cikasa ca Cikumiiyo ca Njambi ya Isalele, kuvanga muciilwiseko na vwana vwa n̄ombelo ya a vuvi vweni. Cikasa ca Cikumiiyo kucapandele ciiluke mavoko-voko kujeneka vwana. Mu ngila eyi mukakanguka, co mukawana oni cuma mukajo camihisilile.”

⁴ Co vanu vehwile ngwavo, “N̄ombelo ya a vuvi mukajo tukamutumina?” Co vakumbulwile ngwavo, “Tumponya tutanu twa ngolinde twa mazimbo, na tumponya tutanu twa ngolinde twa vimuku, umo na umo ngwe ku vimyene va vaFilisitiya. Omwo mushongo umolika wakele ali yeni voshe na ali vimyene ava vatanu.

⁵ Co munapande kushonga tumponya twa mazimbo na vimuku vikevyo vilinakuviisa lifuti lyeni, co munapande kwana kasingimiko kuli Njambi ya Isalele. Amo akalikela kumihisa, na vinjambi veni, na lifuti lyeni.

⁶ Omwo vikajo mulinakukaluwisila vimbunge vyeni, ngwe mwalingile mwene wa Ingito na vaka-Ingito? Kesi mwivale muje Njambi mwavapwisile vilema noo vecelele vaIsalele kutunda mu Ingito.

⁷ Ngecivene, vwaeseni litemba lyaliha na vingombe vavali va lwavo vaje valinakujamwesa vaje kanda vavalemeke mandauluwa, vaakeni ku litemba, ilwisileni vana vavo ku licakana.

⁸ Co noneni Cikasa ca Cikumiiyo ca Shukulu Kalunga, mucake mu litemba, co kumukulo waco, akeniko cikasa cije cili na tumponya twa ngolinde, mutuminenivyo, ngeci ipwe n̄ombelo ya a vuvi. Tumeni litemba liye alyo lika.

⁹ Likengeleleni omo lilinakuya, nga likelyo lilinakukengesela ku nganda ya ku Mbete Shemeshe, co cikapwa ngeci kuma Njambi ya vaIsalele ikeye natunenelele vukalu vwakama ngacije. Oloni nga embwe, co tukazivuka ngwetu kesi ikeye natumine mushongo wangacije, cinapwile lika cuma cakulizila cikeco vavenya.”

¹⁰ Co valingile ngwe muvavalekele, vaakele vingombe vavali va lwavo ku mandauluwa ya litemba, co vashokelele vana vavo mu licakana.

¹¹ Co vaakele Cikasa ca Cikumiiyo mu litemba, amolika na cikasa muje mwakele tumponya twa ngolinde twa vimuku na twa mazimbo.

¹² Ngecivene, vaje vingombe va lwavo vaile mu ngila ya ku Mbete Shemeshe, vashungamene kuje vene, kuvaangunukile mu ngila, vaile nakutamuna oku venda. Co vimyene vatanu va vaFilisitiya vavakavele munima noo ku nginga ya Mbete Shemeshe.

¹³ Co vanu va ku Mbete Shemeshe vakele na kuteja tiliku mu cana, co omo vandwile mesho avo, vamwene Cikasa ca Cikumiiyo. Co vavwaelelele akucimona.

¹⁴ Co litemba lyezile mu lihya lya Yoshwa, uje wakele ku Mbete Shemeshe, co lyemanene kumukulo wa limanya lyakama. Co vanu vavatozwele mavaya a litemba nakutsiya vije vingombe va lwavo nakuvakombelela kupwa n̄ombelo ya kwenyeka kuli Shukulu Kalunga.

¹⁵ Co vaLevi vakakwile Cikasa ca Cikumiiyo ca Shukulu Kalunga, na cikasa ca tumponya twa ngolinde tuje twakelemo, vavyakele a limanya lyakama. Asinoni vanu va ku Mbete Shemeshe vakombelelele vin̄ombelo vya kwenyeka, na vin̄ombelo vikwavo kuli Shukulu Kalunga.

¹⁶ Co vaje vimyene vatanu va Filisitiya vavakengelelele omo valingile evi, co velukile ku Ekelone a litangwa lije vene.

¹⁷ VaFilisitiya vatumine tumponya twa mazimbo twa ngolinde tutanu kupwa n̄ombelo ya a vuvi vwavo kuli Shukulu Kalunga, kamo na kamo a vinganda vya Ashendonde na Ngaza, na Ashekelone na Ngate, na Ekelone.

¹⁸ Co lalo vatumine tumponya twa vimuku twa ngolinde, kamo na kamo ku vinganda vije vashwanene vimyene vatanu va Filisitiya, ku vinganda vya vimpaka, na membo lalo a vivumbe. Co limanya lyakama lya mu lihya lya Yoshwa wa ku Mbete Shemeshe, aje avaakele Cikasa ca Cikumiiyo ca Shukulu Kalunga, na lelo lino kulicili kuje muje mu lihya, kupwa vukaleo vwa vije vyalingiwile.

¹⁹ Co Shukulu Kalunga watsiile vanalume makumi atanu na avali va ku Mbete Shemeshe omwo vashumbilile mu Cikasa ca Cikumiiyo. Co vanu valilile omwo Shukulu Kalunga wanenele kutsa kwangacije akati kavo.

Cikasa ca Cikumiiyo mu Kilyate Njealime

²⁰ Ngecivene, vanu va ku Mbete Shemeshe vendekele ngwavo, “Iyajo asa kwimana ku mesho a Shukulu Kalunga, Njambi wakujela? Tukamutuma kulijo ngeci atunde kuli yetu?”

²¹ Co vatumine tunganda kuli vanu va ku Kilyate Njealime nakwendeka ngwavo, “VaFilisitiya vanelwisako Cikasa ca Cikumiiyo ca Shukulu Kalunga. Ijeni mucizile.”