1 Samwele 5 - Livulu lya Shukulu Kalunga

Cikasa ca Cikumiiyo akati ka vaFilisitiya

¹ Omo vaFilisitiya vafungulwile Cikasa ca Cikumiiyo, vacitundisile ku Embenezele, co vacitwalele ku nganda yavo ya Ashendonde,

² vacitwalele mu njuvo ya njambi yavo Ndangone, co vacakele muyehi na Ndangone.

³ Alikaki mutondo-tondo, vanu va mu Ashendonde vamwene ngeci Ndangone nawila asi navulumana kulutwe lwa Cikasa ca Cikumiiyo ca Shukulu Kalunga. Ngecivene, vamwindwile nakumwaka mu mwela muje mwakele.

⁴ Co alikaki mutondo-tondo vamwene lalo Ndangone nawila asi kulutwe lwa Cikasa ca Cikumiiyo. Co a simbu ije mutwe wendi na mavoko endi oshe avali vyavatukile nakuwila mu cikolo, kwasalele lika muvila.

⁵ (Mukemwo vene na lelo lino vaka-kukombelela va Ndangone na voshe vaka-kumulemesa mu Ashendonde, vakajomboka lika a mutambela uje oloni kuvesi kulyata a mutambela uje.)

⁶ Shukulu Kalunga wahisile vanu va ku Ashendonde manene, nakuvazivisa lyova. Wavahisile na mazimbo, amolika na vanu vaje vaatele ku membo aje avazengelekele.

⁷ Omo vamwene vije vyakele nakulingiwa, vendekele ngwavo, “Njambi ya Isalele alinakutuhisa amo na njambi yetu Ndangone. Kutwapandele kutumbika Cikasa ca Cikumiiyo kuno.”

⁸ Ngecivene, vatumine miluwa, co vasanene vimyene voshe vatanu va vaFilisitiya, vavehwile ngwavo, “Vatijo tulinga na Cikasa ca Cikumiiyo ca Njambi ya Isalele?” Co vakumbulwile ngwavo, “Citwaleni ku Ngate.” Ngecivene, vacitwalele ku Ngate, nganda ikwavo ya vaFilisitiya.

⁹ Oloni omo cetele kuje, co Shukulu Kalunga wahisile nganda ije, nakuvaiya-yiisa manene. Co Shukulu Kalunga wahisile vanu va mu nganda ije na mazimbo, vanike na vakulunu voshe.

¹⁰ Ngecivene, vatumine Cikasa ca Cikumiiyo ku Ekelone, nganda ikwavo ya vaFilisitiya, oloni omo Cikasa cetele kuje, co vanu vatambekele ngwavo, “Vananena Cikasa ca Cikumiiyo ca Njambi ya Isalele kuno, ngeci vakututsiise yetu voshe!”

¹¹ Ngecivene, vasanene lalo vimyene voshe va vaFilisitiya, co vendekele ngwavo, “Ilwiseniko Cikasa ca Cikumiiyo ca Isalele ku mwela waco, ngeci kesi citutsiye yetu na naanga yetu.” Co kwakele kuuya-uya mu nganda ije yoshe omwo Njambi wavahisile manene.

¹² Nameme vaje kuvatsile, oloni vakele na mazimbo, co vanu valililile kuli vinjambi vavo ngeci vavakwase.