1 Samwele 4 - Livulu lya Shukulu Kalunga

VaFilisitiya vambata Cikasa ca Cikumiiyo

¹ A simbu ije vaFilisitiya valikungulwile kuya nakulwisa Isalele. Ngecivene, vaIsalele vaile nakuvalwisa. VaIsalele vatungile cilombo cavo ku Embenezele, co vaFilisitiya vatungile cilombo cavo ku Afeke.

² VaFilisitiya valwile nzita yakukomokesa, vafungulwile vaIsalele, co vatsiile vanalume 4,000 a mutambela aje avalwililile.

³ Omo mashwalale vaje vasaleleo ku nzita velukile ku cilombo, co vantwama va Isalele vendekele ngwavo, “Omwo vikajo Shukulu Kalunga natwecelela ngeci vaFilisitiya vatufungulule ku litangwa lya lelo? Tuyeni tukashake Cikasa ca Cikumiiyo ca Shukulu Kalunga ku Shilo, ngecivene, akuye netu amo, co akatwamene ku vitozi vetu.”

⁴ Ngecivene, vatumine miluwa ku Shilo vakashakele Cikasa ca Cikumiiyo ca Shukulu Kalunga Muka-nzili yoshe, uje ali akamwa ya vakelumbi. Co vana va Eli vavali, Hofene, na Finehase, vezile na Cikasa ca Cikumiiyo.

⁵ Omo Cikasa ca Cikumiiyo cetele mu cilombo, co vaIsalele vatambekele manene nakujolela, co asi ajajele.

⁶ Co omo vaFilisitiya vazivile muyoyo wakutambeka kwakama, vendekele ngwavo, “Tolilileni muyoyo owo mu cilombo ca vaHevelu! Unalumbunuka vika?” Omo vanangukile ngeci Cikasa ca Cikumiiyo ca Shukulu Kalunga cinaija mu cilombo ca vaHevelu,

⁷ co vaFilisitiya vakele na lyova, vendekele ngwavo, “Twavindama! Njambi naija mu cilombo cavo. Omwo simbu naimo yai kwasholokele kuvwaelela kwangacije!

⁸ Iyajo asa kutwamena ku nzili ya vinjambi va cifwa cangacije? Vakevo vinjambi vaje vatsiile vaka-Ingito mu mambo!

⁹ Nyanyameni, yeni vaFilisitiya! Lweni ngwe muvakalu vanalume, kutewa tukapwa vinzinda va vaHevelu, ngwe muvapwile vakevo vinzinda vetu. Ngecivene, lweni ngwe muvakalu vanalume!”

¹⁰ Co vaFilisitiya valwile manene na nzili, vafungulwile vaIsalele, co vaIsalele vatewelele ku vimbalaka vyavo. Kwakele kutsa kwakama manene, co kwatsile mashwalale va vaIsalele vakupwa 30,000.

¹¹ Ngecivene, vafungulwile Cikasa ca Cikumiiyo ca Njambi, co vana va Eli, Hofene, na Finehase voshe vavali vavatsiile.

Kutsa kwa Eli

¹² Co munalume wa ku muyati wa Mbenjemani wakele nakushatuka kutunda ku nzita, kwija ku Shilo, co wetele litangwa lije vene. Wamwesele kuviilila kwendi, watavozwele vuzalo vwendi nakulishawila livu ku mutwe.

¹³ Co Eli wakele nakulinyenga manene a Cikasa ca Cikumiiyo, watumbamene mu citumbamo cendi kumukulo wa ngila, nakukengelela. Co uje munalume omo wetele, washandwele muzimbu mu nganda mwoshe, co munu woshe walilile na lyova.

¹⁴ Omo Eli wazivile muyoyo wakulila, co wehwile ngwendi, “Muyoyo ou unapu wavika?” Co uje munalume wazambwilile kuli Eli nakumuleka muzimbu.

¹⁵ (Eli aje te ali laja na myaka makumi atanu na awana na myaka itanu na itatu, wapwile kapuputwa vene.)

¹⁶ Uje munalume wendekele ngwendi, “Yange vene njinatewa ku nzita, co njinashatuka ngila yoshe nakweta kuno lelo.” Eli wamwihwile ngwendi, “Munange, vika vinalingiwako?”

¹⁷ Co uje muka-kwambulula wamukumbulwile ngwendi, “Isalele vanatewa kuli vaFilisitiya, kutufungulula oku kwapwile kwakutukomokesa manene! Co lalo, vana vove, Hofene, na Finehase vanavatsii, na Cikasa ca Cikumiiyo ca Njambi vanacambata!”

¹⁸ Omo uje munalume wambulwile vya Cikasa ca Cikumiiyo, co Eli wawile mukali a citumbamo cendi kumukulo wa cikolo. Omwo wakuluvalele nakununa manene, co wawile nakupokoka mukoshi, ngeci watsile. Ikeye waakwilile Isalele myaka makumi awana.

Kutsa kwa fwile ya Finehase

¹⁹ Vainamweno ya Eli, munakazi wa Finehase, wakele na kafumba, co wakele muyehi nakukita mwana. Omo wazivile ngeci Cikasa ca Cikumiiyo ca Njambi vanacambata, co lalo ishemweno na munalume wendi vanatsi, aje vene mushongo wamushangumukile, co wakitile mwana.

²⁰ Omo wakele muyehi na kutsa, co vaje vifungwizi vamukwasele vendekele kuli ikeye ngwavo, “Simpa! Uli na mwana wa munalume!” Oloni ikeye kombileko mbunge nambe kukumbululako.

²¹ Co wamulukile lizina lya Ikambonde. Kunungulula ngwavo, “Vumpau vwa Njambi vwaseze Isalele!” Omwo vanambata Cikasa ca Cikumiiyo, na omwo kutsa kwa ishemweno na munalume wendi.

²² Ikeye wendekele ngwendi, “Vumpau vwa Njambi vwaseze Isalele, omwo vanambata Cikasa ca Cikumiiyo.”