1 Samwele 31 - Livulu lya Shukulu Kalunga

Kutsa kwa Saulu na vana vendi

¹ VaFilisitiya valwile nzita na vaIsalele a Munkinda wa Ngilembowa. VaIsalele vavangi vavatsiilile aje vene, co vungi vwa vaje vasaleleo, amo na Mwene Saulu, na vana vendi va vanalume, vatewele.

² Oloni vaFilisitiya vakwatele nakutsiya vana va Saulu vatatu, Yonatana, na Avinandave, na Malekishwa.

³ Nzita yapwile yakama manene ku mutambela wa Saulu, co mikili ivashele vitozi yamukwatele, co yamuvetwesele manene.

⁴ Co Saulu wendekele kuli uje mukwenje wambatele vitwa vyendi ngwendi, “Shomona mukwale wove unjitsiye, ngeci ava vaFilisitiya vaka-kujeneka kukulaela kesi vanjishaule nakunjitsiya.” Oloni uje mukwenje katavele, omo wakele na lyova. Ngecivene, Saulu wambatele mukwale wendi, co wawililileko ikeye vavenya.

⁵ Co uje mukwenje omo wamwene Saulu natsi, co nendi lalo wawililile ku mukwale wendi vavenya, co watsile amo na Saulu.

⁶ Ngecivene, Saulu, na vana vendi vatatu va vanalume, na uje mukwenje vatsile, na vanu voshe va Saulu vatsile ku litangwa lije vene.

⁷ Omo vaIsalele vaje vakele ku mutambela ukwavo wa musambwa ya Cana ca Njezelele mu ngangela ku Ndonga ya Yondau vazivile ngeci vaIsalele vanatewa ku nzita, co lalo Saulu na vana vendi vanavatsii, vasezele vinganda vyavo vatewele. Co vaFilisitiya vezile nakuvifungulula.

⁸ Alikaki munima ya nzita, vaFilisitiya vaile nakushulula vivimbi vuzalo vwa nzita, vawanene Saulu na vana vendi vatatu vanatsi ku nzita a Munkinda wa Ngilembowa.

⁹ Co vavatwile mutwe wa Saulu, nakumushulula vuzalo vwendi vwa nzita, co vavyanene kuli vanu vaje vavatumine mu Filisitiya nakuleka muzimbu wauvwa kuli vinjambi vavo na kuli vanu vavo.

¹⁰ Co vaakele vitwa vyendi mu njuvo ya njambi yavo Asitalete, co vashukikile muvila wendi a civumbe mu nganda ya Mbete Shane.

¹¹ Co omo vanu va ku Njambeshe mu Ngilyande vazivile vije vivalingile vaFilisitiya kuli Saulu,

¹² co vanalume vakusimpa vakalukile nakuya, vendele vutsiki vwoshe nakweta ku Mbete Shane. Co vatundisile muvila wa Saulu, na mivila ya vana vendi a civumbe, co vanenele vivimbi vyavo ku Njambeshe, vavicavelelele kuje.

¹³ Asinoni vambatele vitsiya, vavitsindile mwisi ya muti wa tamalisiki mu nganda, co valikelele kulya matangwa atanu na avali.