1 Samwele 30 - Livulu lya Shukulu Kalunga

Nzita na vaAmaleke

¹ Omo Ndaviti na vanu vendi vetele ku Zikelange a litangwa lyamucitatu, vaAmaleke vazengelekele ku mbwela ya Yunda, co valwisile Zikelange. Venyekele nganda ya Zikelange,

² co vafungulwile vanakazi, na vanike voshe vakelemo, kuvatsiile munu naumo wai, oloni omo vaile, vambatele vanu voshe.

³ Omo Ndaviti na vanu vendi vetele, vawanene limbo linenye, co vanakazi vavo, na vana vavo va vanalume, na ava va vanakazi vanavatwala ku vunzinda.

⁴ Co Ndaviti na vanu vendi vashangumukile kulila noo vajukile.

⁵ Vanakazi va Ndaviti vavali, Ahinowame na Avingaile, na vakevo vavatwalele ku vunzinda.

⁶ Co Ndaviti wakele mu vukalu vwakama manene, omwo vanu vendi voshe vazivile ku vimbunge kuvavala manene a vana vavo va vanalume na ava va vanakazi, co vashungwiiye kumwasha mamanya, oloni Ndaviti walitakamesele muli Shukulu Kalunga Njambi yendi.

⁷ Ndaviti wendekele kuli Aviyatale muka-kukombelela muna Ahimeleki ngwendi, “Njinenele kangamuna.” Co Aviyatale wamuneneleleko.

⁸ Ndaviti wehwile Shukulu Kalunga ngwendi, “Njapande kukava mbunga eyi ndi? Co lalo njikavawana ndi?” Shukulu Kalunga wamukumbulwile ngwendi, “Eyo vakave, ngeci ukapatule vaje vavanafungulula.”

⁹ Ngecivene, Ndaviti na vanu vendi 600 vaile, co omo vetele ku muna ndonga Mbesole, vamo vavo vasalele kuje vene.

¹⁰ Ndaviti waile kulutwe amo na vanu vendi 400, co vanu 200 vajukile manene kujavuka muna ndonga, co vasalele munima.

¹¹ Vanu va Ndaviti vawanene mukwenje wa kaIngito mu shwata, co vamutwalele kuli Ndaviti. Vamwanene vyakulya na mema,

¹² na mikuyu yakuma, na makasha-kasha avali a mikolovozi ya vushuka vwa vinyu. Omo wamanesele kulya, wakele na nzili, omwo kalile cuma cimo nambe kunwa vimo a matangwa atatu.

¹³ Ndaviti wamwihwile ngwendi, “Shukulu yove iya? Co lalo utunda kuli?” Mukwenje wamukumbulwile ngwendi, “Yange nji kaIngito, ndungo ya kaAmaleke. Shukulu yange wanjisezele munima matangwa atatu omwo njakele nakuvinja.

¹⁴ Yetu twalwisile lifuti lya vaKalete mu mbwela ya lifuti lya Yunda, co lalo na ku mbwela ya lifuti lya Kalembi, co twenyekele Zikelange.”

¹⁵ Co Ndaviti wamwihwile ngwendi, “Wasa kunjitwala kuli vaje vitozi ndi?” Co ikeye wamukumbulwile ngwendi, “Njikutwala, nga ulisinga mu lizina lya Njambi ngeci kuukanjitsii nambe kunjana ku mavoko a shukulu yange.”

¹⁶ Co watwalele Ndaviti kuli vakevo, vawanene vaje vitozi vanashandokela mu mitambela mwoshe, nakulya, nakunwa, nakulisamba a vyuma vije vapukwile nakufungulula mu lifuti lya vaFilisitiya na Yunda.

¹⁷ Alikaki, akutuuka kwa litangwa, Ndaviti wavalwisile noo ku cingwezi. Co naumo wai waputumukileko, kuvanga vakwenje vakupwa 400 vaje valondele a tumelo vakevo vatewele.

¹⁸ Ndaviti wamenene vanu voshe, na vyuma vyoshe vije vivambatele vaAmaleke, amo na vanakazi vendi vavali,

¹⁹ nacimo cuma vajenekeleo cai. Ndaviti welukile na vana voshe va vanalume na ava va vanakazi va vanu vendi, co na vyoshe vije vivapukwile vaAmaleke welukile navyo.

²⁰ Ngecivene, welwisile lalo matanga a vimanga, na vingombe, co vanu vendi vasindikile vufuko vwoshe kulutwe lwavo, vendekele ngwavo, “Evi vinapu vya Ndaviti!”

²¹ Asinoni Ndaviti welukile kuli vaje vanu 200, vaje vajukile kuya amo na Ndaviti, vasalele munima ku muna ndonga Mbesole. Co vezile kulutwe nakuliwana na Ndaviti na vanu vendi, co Ndaviti waile kuli vakevo, wavakandelelele na cizango.

²² Oloni vanu vamo vavavi vaje vaile amo na Ndaviti vendekele ngwavo, “Omwo vakevo kuvaile netu, kutukavanako cuma cimo ku vyakupukula. Vambate vanakazi na vana vavo vaye.”

²³ Oloni Ndaviti wavakumbulwile ngwendi, “Vandolome vange, kesi mulinge ngacije na evi Shukulu Kalunga natwanavyo! Ikeye natunyungu mwamuvwa, co natuhyanesa kuli vaka-kutulwisa.

²⁴ Naumo wai asa kutava vije vimunendeka! Muvavoshe munapande kulipangela kupwisa amolika, voshe vanasalele kunima na vivala valipangele kupwisa amo na vaje vanaile ku nzita.”

²⁵ Ndaviti wemikile lishiko eli, co tunde aje mu Isalele mwoshe valikavele kweta ku lelo lino.

²⁶ Omo Ndaviti welukile ku Zikelange, watumine litambelo livapukwile kuli vasamba vendi, vantwama va Yunda, amo na lijwi ngwendi, “Vwana vwakupukula tunakambata kuli vitozi va Shukulu Kalunga ovu.”

²⁷ Ndaviti watumine litambelo livapukwile kuli vanu va ku Mbetele, na kuli vanu va mu Lama ku mbwela ya lifuti lya Yunda, na kuli vanu va mu nganda ya Njatile,

²⁸ na Aloele, na Sifemote, na Eshetemowa,

²⁹ na Lakale, na ku cikota ca Njalahamele, nakweta kuli vaKeni,

³⁰ co na kuli vanu va mu nganda ya Holema, na Mbolashane, na Atake,

³¹ na Hevelone. Watumine litambelo livapukwile ku mitambela yoshe kuje wakele na vanu vendi.