1 Samwele 29 - Livulu lya Shukulu Kalunga

VaFilisitiya vavyana Ndaviti

¹ VaFilisitiya vakungulwile mashwalale vavo voshe amolika ku Afeke, co vaIsalele vatungile cilombo cavo ku lisima lya kavwelu-vwelu ku Njezelele.

² Vimyene vatanu va Filisitiya vaile amo na vimbunga vya vanu mu mbunga imo na imo mwakele vanu 100 na 1,000, Ndaviti na vanu vendi vakele nakwendela munima amo na Mwene Akishe.

³ Co vaka-kushika nzita ya vaFilisitiya vehwile ngwavo, “Vikajo valinakulinga kuno ava vaHevelu?” Co Akishe wavakumbulwile ngwendi, “Ou ikeye Ndaviti, ntwama ya Mwene Saulu wa mu Isalele. Nakala nange matangwa amangi na myaka yaingi. Mulonga naumo wai njawana muli ikeye tunde aje ezilile kuli yange.”

⁴ Oloni vaka-kushika nzita ya vaFilisitiya valuvalele na Akishe, vendekele kuli ikeye ngwavo, “Ilwisa munu ou kwimbo lyendi lije wamwanene. Kesi umutave aye netu ku nzita, kutewa akatutengulukila omo tulinakulwa nzita. Vatijo akalyamba na shukulu yendi? Kesi akutapa mitwe ya vanalume ava tuli navo ndi?

⁵ Ou ikeye Ndaviti uje vembile vanakazi omo valisambele ngwavo, ‘Saulu natsii 1,000, oloni Ndaviti ikeye natsii 10,000.’ ”

⁶ Akishe wasanene Ndaviti wendekele nendi ngwendi, “Njilisinga ali Njambi wakuyoya wa Isalele ngwange yove wapwile wa kulongwa, njikavwaelela manene kuya nove amo mukulwa nzita eyi. Kunjawanene mulonga muli yove tunde a litangwa lije wezile kuli yange. Oloni ava vakwetu vimyene kuvakuzemene embwe.

⁷ Ngecivene, iluka mu kwoloka kwimbo, kesi ulinge cuma cimo cakuvaviililisa ku vimbunge.”

⁸ Ndaviti wamukumbulwile ngwendi, “Cuma mukajo cacivi njalingi shukulu? Ngwe muunendeka, kuwawanene mulonga muli yange tunde a litangwa lije njashangumukile kukupangela, co omwo vikajo kunjii amo nove mwene yange, na shukulu yange, nakulwisa vitozi vove?”

⁹ Co Akishe wamukumbulwile ngwendi, “Nange njatava, njazivuka ngeci yove wapwa wa kulongwa ngwe kangelo ka Njambi. Oloni vakwetu vimyene vanendeka ngwavo, ‘Kasa kuya amo netu ku nzita!’

¹⁰ Ngecivene, Ndaviti, imene mutondo-tondo, yeni voshe mwatundile kuli Saulu kwija kuli yange, indukeni a mungulungengu muye vwasi simbu kucili mutanya.”

¹¹ Co alikaki mutondo-tondo, Ndaviti na vanu vendi velukile ku lifuti lya Filisitiya, co vaFilisitiya vaile ku Njezelele.